ព័ត៌មានជាតិ

បេឡាជាតិសន្តិសុខសង្គម ព្រមានចាត់វិធានការជនឆបោកក្លែងបន្លំលិខិត ប.ស.ស ខុសពីលក្ខណៈដើម

បានផុស

១ year មុន

នៅ

ថ្ងៃអង្គារ ១១ កុម្ភៈ ២០២៥

ដោយ

បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ហៅកាត់ (ប.ស.ស) បានព្រមានចាត់វិធានការផ្លូវច្បាប់លើជនឆបោកដែលយកលិខិត ប.ស.ស ទៅកែខុសពីលក្ខណៈដើម ព្រមទាំងក្លែងបន្លំខ្លឹមសារ ដោយប្រើប្រាស់និមិត្តសញ្ញា (Logo) និងត្រារបស់ ប.ស.ស។ បេឡាជាតិសន្តិសុខសង្គម ចាត់ទុកការក្លែងបន្លំ និងការប្រើប្រាស់លិខិតក្លែងជាកម្មវត្ថុ នៃបណ្ដឹងអាជ្ញា ស្របតាមមាត្រា ៦២៦, ៦២៧, ៦២៨, ៦២៩ នៃក្រមព្រហ្មទណ្ឌ នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីជូនដំណឹងរបស់បេឡាជាតិសន្តិសុខសង្គម កាលពីព្រឹកថ្ងៃទី ១១ កុម្ភៈ នេះ បានប្រកាសថា បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ បដិសេធទាំងស្រុងចំពោះលិខិតក្លែងបន្លំរបស់ជនឆបោក ដែលបានយកលិខិតលេខ ០១៣១/២៥ ប.ស.ស./ប.ភ ចុះថ្ងៃទី ៣១ ខែមករា ឆ្នាំ ២០២៥ យកទៅកែខុសពីលក្ខណៈដើម ក្លែងបន្លំខ្លឹមសារ ដោយប្រើប្រាស់និមិត្តសញ្ញា (Logo) និងត្រារបស់បេឡាជាតិសន្តិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ ខុសពីលិខិតដើម។

ជាមួយគ្នានេះ បេឡាជាតិសន្តិសុខសង្គម ក៏បានអំពាវនាវឲ្យប្រជាពលរដ្ឋ ក៏ដូចជាសាធារណជន ជាពិសេសសមាជិក ប.ស.ស ទាំងអស់ ជ្រាបជាព័ត៌មាន និងបង្កើនការប្រុងប្រយ័ត្នឲ្យបានខ្ពស់ ជៀសវាងចាញ់បោកជនឆបោកទាំងនេះ ហើយ ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ នឹងចាត់វិធានការ ដោយសហការជាមួយអាជ្ញាធរមានសមត្ថកិច្ចពាក់ព័ន្ធ ដើម្បីរកជនឆបោកទាំងនោះមកទទួលខុសត្រូវចំពោះមុខច្បាប់៕

អត្ថបទ ៖ ពិសី