ព័ត៌មានជាតិ

ក្រសួងបរិស្ថាន លើកទឹកចិត្តអង្គការដៃគូរួមចំណែកជាមួយគោលដៅលំហែបៃតង ដើម្បីការពារអត្ថប្រយោជន៍ប្រជាសហគមន៍តាមមូលដ្ឋាន

បានផុស

១ year មុន

នៅ

ថ្ងៃពុធ ១៩ កុម្ភៈ ២០២៥

ដោយ

លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានគូសបញ្ជាក់ថា រាជរដ្ឋាភិបាលតាមរយៈក្រសួងបរិស្ថាន នៅតែបន្តគាំទ្រ និងលើកទឹកចិត្តឱ្យអង្គការដៃគូរួមចំណែកជាមួយគោលដៅលំហែបៃតង ដើម្បីការពារអត្ថប្រយោជន៍ ប្រជាសហគមន៍នៅតាមមូលដ្ឋាន។

នៅថ្ងៃទី១៨ ខែកុម្ភៈ ម្សិលមិញនេះ ក្នុងជំនួបសម្តែងការគួរសម និងពិភាក្សាការងារជាមួយប្រធានសមាគមអ្នកជំនាញអភិរក្សសត្វត្មាតពីការផុតពូជប្រចាំទ្វីបអាស៊ី លោក អ៊ាង សុផល្លែត បានមានប្រសាសន៍ថា ការបណ្តុះជំនាញដល់ប្រជាសហគមន៍ អាចទាញយកប្រាក់ចំណូលប្រចាំថ្ងៃបានពីការងារអភិរក្សធនធានធម្មជាតិ តាមរយៈការផ្តល់សេវាកម្មទេសចរណ៍ នៅតាមរបៀងទេសចរណ៍ធម្មជាតិនីមួយៗ ជាទិសដៅសំខាន់នៃគោលដៅលំហែបៃតង ដែលក្រសួងបរិស្ថានបានដាក់ចេញនៅក្នុងយុទ្ធសាស្រ្តចក្រាវិស័យបរិស្ថាន។

ក្រសួងបរិស្ថាន នៅតែបន្តផ្តល់ការគាំទ្រយ៉ាងពេញទំហឹងលើគម្រោងការងារអភិរក្សសត្វត្មាតពីការផុតពូជ ដោយលទ្ធភាពជាក់ស្តែង គឺបានរួមចំណែកធ្វើឱ្យចំនួនសត្វសត្វត្មាតមានការកើនឡើងជាលំដាប់ ជាពិសេសគម្រោងបានបង្រៀន និងបណ្តុះជំនាញដល់ប្រជាសហគមន៍ផ្លាស់ប្តូរពីរបរចូលព្រៃចាប់សត្វមកជាអ្នកការពារ និងអភិរក្សសំបុកសត្វ ដើម្បីបង្កើនចំនួនសត្វត្មាតពីការផុតពូជ តាមរយៈការពារទីជម្រក លុបបំបាត់ការបំពុលនានា បញ្ឈប់ការដាក់អន្ទាក់ និងការបរបាញ់ និងបញ្ឈប់សកម្មភាពរំខានដោយមនុស្សផ្សេងៗទៀត ដើម្បីផលប្រយោជន៍ដល់ប្រព័ន្ធអេកូឡូស៊ី ភាពសម្បូរបែបនៃជីវៈចម្រុះ និង រក្សាបានកេរតំណែលធម្មជាតិសម្រាប់មនុស្សជំនាន់ក្រោយ ដែលសកម្មភាពទាំងនេះបានឆ្លើយតបទៅនឹងយុទ្ធសាស្រ្តចក្រាវិស័យបរិស្ថាន ដែលមានភាពស្អាត ភាពបៃតង និងចីរភាព។

នៅក្នុងឆ្នាំ២០២២ យោងតាមលទ្ធផលជំរឿនស្តីពីស្ថានភាពសត្វត្មាតកម្ពុជា បានបង្ហាញថា កម្ពុជាមានសត្វត្មាតទាំង ៣ ប្រភេទ សរុបចំនួន ១៣៤ ក្បាល ក្នុងនោះរួមមានត្មាតផេះ ៧១ ក្បាល ត្មាតត្នោត ៤៤ ក្បាល និងត្មាតភ្លើងចំនួន ១៩ ក្បាល ហើយចំនួនសត្វត្មាត មានការកើនឡើងចំនួន ១៣ ក្បាល បើប្រៀបធៀបនឹងឆ្នាំ ២០២១ ដែលមានចំនួន ១២១ ក្បាល ដែលនេះគឺជាដំណឹងដ៏ល្អ សម្រាប់ក្រុមអ្នកអភិរក្ស និងសម្រាប់ជីវៈចម្រុះនៅប្រទេសកម្ពុជា និងនៅលើពិភពលោក៕