អ្នកនាង ម៉េង កែវពេជ្ជតា ចេញវីដេអូចម្រៀងច្រៀងរួមគ្នានឹង ព្រីន បទ “ចាប៉ីផ្អែម” អបអរទិវាវប្បធម៌ជាតិ ៣មីនា

ក្នុងឱកាសអបអរសាទរទិវាវប្បធម៌ជាតិ ៣មីនា លើកទី២៧ អ្នកនាង ម៉េង កែវពេជ្ជតា បានចេញវីដេអូចម្រៀងច្រៀងរួមគ្នានូវបទ “ចាប៉ីផ្អែម” ជាមួយកូនស្រី ម៉េងពេជ្ជតា សង្វាពេជ្រ ព្រមនឹងលោកព្រីន ដែលពោរពេញដោយអត្ថន័យលើកតម្កើងវប្បធម៌ជាតិ ខណៈចម្រៀងមួយបទនេះ ជាការផលិតលើកទី២ ។

ទន្ទឹមនឹងវីដេអូចម្រៀងច្រៀងរួមគ្នានេះ អ្នកនាង ម៉េង កែវពេជ្ជតា ស្នើថា “សូមឱ្យយើងទាំងអស់គ្នារួមគ្នាថែរក្សា និងផ្សព្វផ្សាយវប្បធម៌ជាតិរបស់យើង ដើម្បីឱ្យកូនចៅជំនាន់ក្រោយបានស្គាល់ និងឱ្យពិភពលោកបានឃើញពីភាពស្រស់ស្អាត និងភាពសម្បូរបែបនៃវប្បធម៌ខ្មែរ”។

គួរជម្រាបថា “ចាប៉ីផ្អែម” ជាបទចម្រៀងរបស់អ្នកនាង ម៉េង កែវពេជ្ជតា ច្រៀងរួមគ្នានឹងលោកព្រីន ដែលពោរពេញដោយអត្ថន័យ និងបានផ្តិតយកទីតាំងសំណង់ប្រាសាទខ្មែរ រួមបញ្ចូលសំឡេងចាប៉ីដងវែង ដេញផ្ទាល់ដោយកូនស្រីរបស់អ្នកនាង គឺកុមារី ម៉េងពេជ្ជតា សង្វាពេជ្រ ក្នុងន័យលើកស្ទួយតម្លៃវប្បធម៌ជាតិ។ ខណៈនេះមិនមែនជាលើកទី១ឡើយ សម្រាប់ចម្រៀងច្រៀងរួមគ្នារវាងលោកព្រីន និងរាជិនីសំឡេងផ្អែម ម៉េង កែវពេជ្ជតា ៕