រាជរដ្ឋាភិបាល បន្តជំរុញលើកកម្ពស់វិស័យទេសចរណ៍

លោក ហួត ហាក់ រដ្ឋមន្រ្តីក្រសួងទេសចរណ៍ បានលើកឡើងថា ប្រមុខដឹកនាំ​រាជរដ្ឋាភិ​បាល​កម្ពុជា​បានដាក់ចេញនូវយុទ្ធសាស្រ្តបញ្ចកោណ-ដំណាក់កាលទី១ ដោយបន្តចាត់ទុកវិស័យទេស​ចរណ៍​ជាវិស័យអាទិភាព និងជា(មាសបៃតង) រួមចំ​ណែក​ដល់ការអភិវឌ្ឍសង្គម-សេដ្ឋកិច្ចជាតិ តាមរយៈការបង្កើតឱកាសការងារ, បង្កើនប្រាក់ចំណូលជូនប្រជាជន និងទ្រទ្រង់​​កំណើនសេដ្ឋកិច្ច។

លោក ហួត ហាក់ បានលើកឡើងនៅក្នុងពិធីបើកព្រឹត្តិការណ៍ សម្តែងសិល្បៈអន្តរជាតិសៀមរាប-អង្គរ នៅសួនច្បារព្រះរាជដំណាក់ ខេត្តសៀមរាប នាថ្ងៃទី ១៥ ខែមីនា ឆ្នាំ ២០២៥។

ការសម្តែងសិល្បៈអន្តរជាតិ សៀមរាប-អង្គរ បានប្រមូលផ្តុំនូវទស្សនីយភាពជាច្រើនប្រភេទប្លែកៗ រួមមាន, របាំកូរសមុទ្រទឹកដោះ, នឹកស្រុក, របាំក្រមាខ្មែរ, របាំមរតកដូនតា ការប្រគុំឧបករណ៍តន្រ្តី និងចម្រៀង ដែលបង្កប់អត្តន័យ រូបភាព បរិយាកាសដ៏ស្រស់ស្អាតដល់ភ្ញៀវទេសចរណ៍។

ក្នុងការសម្តែង និងការប្រគុំតន្រ្តី មានការចូលរួមដោយសិល្បករសិល្បការិនីពីសហភាពអឺរ៉ុប និងកម្ពុជា ដែលបង្ហាញឲ្យឃើញពីទំនាក់ទំនងរវាងគ្នាយ៉ាងជិតស្និទ្ធ គ្រប់វិស័យ រួមទាំងសិល្បៈវប្បធម៌ផងដែរ។

លោក ង៉ូវ សេងកាក់ អភិបាលរងខេត្ត បានលើកឡើងថា ព្រឹត្តិការណ៍សម្តែងសិល្បៈអន្តរជាតិ ក្នុងគោលបំណងសំដៅជំរុញការផ្សព្វផ្សាយគោលដៅទេសចរណ៍ខេត្តសៀមរាប ឲ្យកាន់តែទូលំ​ទូលាយទៅកាន់ទីផ្សារអន្តរជាតិ ក្នុងន័យចូលរួមចំណែកលើកកម្ពស់ប្រពៃណី វប្បធម៌ អរិយ​ធម៌ខ្មែរ ក៏ដូចជាផ្សព្វផ្សាយពីសក្តានុពលធនធានវប្បធម៌ ប្រវត្តិសាស្រ្ត និងធនធាន​ធម្មជាតិ​ទៅកាន់ពិភពលោក ដើម្បីជម្រុញឲ្យមានការរីកចម្រើននូវវិស័យ​ទេសចរណ៍ក្នុងខេត្ត​សៀមរាប ក៏ដូចជាវិស័យទេសចរណ៍ទូទាំងព្រះរាជាណាចក្រកម្ពុជា។

លោក ហួត ហាក់ អះអាងថា ការរៀបចំព្រឹត្តិការណ៍នេះឡើង គឺដើម្បីលើកកម្ពស់​វិស័យសិល្បៈកម្ពុជា ផ្លាស់ប្តូរវប្បធម៌  អរិយធម៌ ពង្រឹងទំនាក់ទំនងចំណងមិត្តភាពរវាងកម្ពុជា និងអន្តរជាតិ ក្នុងកិច្ចសហប្រតិបត្តិការល្អនៃវិស័យទេសចរណ៍រវាងផ្នែករដ្ឋ-ឯកជន និងផ្សព្វផ្សាយពីសក្តានុពលទេសចរណ៍ដ៏សម្បូរបែបរបស់កម្ពុជាឲ្យកាន់តែទូលំទូលា​យទៅកាន់ភ្ញៀវទេសចរ ទាំងជាតិ-អន្តរជាតិ ជាពិសេសមកទស្សនាគោល​ដៅទេសចរណ៍ក្នុងខេត្តសៀមរាប និងជំរុញចលនាការផ្លាស់ប្តូររវាងប្រជាជន និងប្រជាជន ការផ្សារភ្ជាប់សិល្បៈ វប្បធម៌ ប្រពៃណី សំដៅទាក់ទាញទេសចរ និងវិនិយោគិនអន្តរជាតិឱ្យ​មកទស្សនា និងវិនិយោគនៅកម្ពុជាកាន់តែច្រើនថែមទៀត។

លោក ហួត ហាក់ បានលើក ក្នុងបញ្ចកោណទី២.មុំទី១.ចំណុចទី៥បញ្ជាក់ថា រាជរដ្ឋាភិបាល​នឹងបន្តលើកកម្ពស់វិស័យទេសចរណ៍ ជាពិសេសការបន្តជំរុញការអភិវឌ្ឍទេសចរណ៍វប្បធម៌ និងធម្មជាតិ ដោយបន្ថែមទេសចរណ៍បៃតង ស្អាត និងវៃឆ្លាត, ការជំរុញការបង្កើតប្រភេទ​ទេសចរណ៍ថ្មីៗ ដែលមានតម្លៃបន្ថែមខ្ពស់ និងទេសចរណ៍ធុរកិច្ច តាមរយៈការលើកកម្ពស់​ការអនុវត្ត ក៏ដូចជាការរៀបចំ និងការដាក់ចេញគោលនយោបាយ និងផែនការមេអភិវឌ្ឍន៍​វិស័យទេសចរណ៍នានា ស្របតាមអភិក្រម(​ជវភាពនៃប្រព័ន្ធ​តួអង្គតែមួយ) និងទស្សនទាន (មិនទុកតួអង្គណាមួយ និងទីកន្លែងណាមួយចោល៕

អត្ថបទ៖ គឿនវេត