ព័ត៌មានអន្ដរជាតិ

NASA ឲ្យម្នាក់៥ដុល្លារក្នុង១ថ្ងៃ សម្រាប់អវកាសយានិក២រូបដែលជាប់ខ្លួនលើយាន ISS អស់៩ខែ

បានផុស

១ year មុន

នៅ

ថ្ងៃសុក្រ ២១ មីនា ២០២៥

ដោយ

Chheang

អវកាសយានិករបស់អង្គការណាសាចំនួន២រូបគឺលោកស្រី Sunita Williams និងលោក Butch Wilmore ថ្មីៗនេះ បានត្រឡប់មកផែនដីវិញ បន្ទាប់ពីជាប់ខ្លួនអស់រយៈពេល៩ខែនៅលើស្ថានីយអវកាសអន្តរជាតិ (ISS) ព្រោះបញ្ហាបច្ចេកទេស។ មនុស្សភាគច្រើនប្រហែលជាគិតថា ពួកគេអាចទទួលបានប្រាក់ឧបត្ថម្ភយ៉ាងច្រើនក្រាស់ក្រែល ប៉ុន្តែវាមិនដូចអ្វីដែលគេយល់ឃើញឡើយ ពោលគឺ អង្គការណាសាឧបត្ថម្ភឲ្យអវកាយានិកទាំង២នូវប្រាក់ប្រចាំថ្ងៃត្រឹមម្នាក់៥ដុល្លារប៉ុណ្ណោះ។

លោកស្រី Sunita “Suni” Williams និងលោក Barry “Butch” Wilmore (រូបភាព៖ NASA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Williams និងលោក Wilmore ដើមឡើយមានគម្រោងធ្វើបេសកកម្មនៅក្នុងលំហត្រឹមតែ៨ថ្ងៃប៉ុណ្ណោះ តែត្រូវបានជាប់គាំងខ្លួននៅទីនោះព្រោះបញ្ហាបច្ចេកទេសរហូតដល់ ២៨៦ថ្ងៃ គិតចាប់តាំងពីថ្ងៃធ្វើដំណើរកាលពីថ្ងៃទី៥ខែមិថុនាឆ្នាំ២០២៤ រហូតដល់ថ្ងៃវិលត្រឡប់មកផែនដីវិញនៅថ្ងៃទី១៩ខែមីនាឆ្នាំ២០២៥។

ថ្វីត្បិតជាប់គាំងខ្លួននៅលើលំហក៏ដោយ ក៏លោកស្រី Williams និងលោក Wilmore នៅតែអាចទទួលបានប្រាក់ខែប្រចាំឆ្នាំរបស់ពួកគេដដែល ដែលមានចាប់ពី ១២៥ ០០០ដុល្លារ ដល់ ១៦៣ ០០០ដុល្លារ អាស្រ័យលើបទពិសោធន៍ និងឋានៈរបស់ពួកគេ។ យ៉ាងណា បន្ថែមពីលើប្រាក់បៀវត្សរ៍នេះ អង្គការណាសា បានផ្តល់ឲ្យអវកាសយានិកនូវប្រាក់ឧបត្ថម្ភប្រចាំថ្ងៃចំនួន ៥ដុល្លារ ក្នុងអំឡុងពេលពួកគេជាប់ខ្លួននៅក្នុងលំហ។ ចំពោះបេសកកម្មរយៈពេល ២៨៦ថ្ងៃរបស់ពួកគេ គឺស្មើនឹង ១ ៤៣០ដុល្លារសម្រាប់អវកាសយានិកម្នាក់ៗ។

វាជារឿងសំខាន់ក្នុងការកត់សម្គាល់ថា អវកាសយានិកមិនទទួលបានប្រាក់ឈ្នួលបន្ថែមសម្រាប់ការបន្ថែមម៉ោង ឬថ្ងៃឈប់សម្រាកក្នុងអំឡុងពេលបេសកកម្មនោះឡើយ។ ប្រាក់ឈ្នួលគឺផ្អែកលើម៉ោងធ្វើការធម្មតា ហើយពួកគេទទួលបានប្រាក់បន្ថែមមួយចំនួនសម្រាប់ការចំណាយដោយចៃដន្យនៅពេលបំពេញបេសកកម្មរបស់ពួកគេតែប៉ុណ្ណោះ៕