ត្រាំ ប្រកាសផលិតយន្តហោះចម្បាំងជំនាន់ទី៦ «F-47» ខ្លាំងគ្មានគូផ្ទឹម លើលោក

ប្រធានាធិបតីអាមេរិក ដូណាល់ ត្រាំ បានប្រកាសផលិតយន្តហោះចម្បាំងពិសេសជំនាន់ទី៦ ឈ្មោះថា F-47 សម្រាប់កងទ័ពអាកាស ដោយលោកអះអាងថា​ ជាយន្តហោះខ្លាំងបំផុតលើពិភពលោកគ្មានគូផ្ទឹម ហើយ Boeing គឺជាក្រុមហ៊ុនទទួលបានកុងត្រាផលិតយន្តហោះនេះ ក្នុងទំហំទឹកប្រាក់ ២០ពាន់លានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់លោក ត្រាំ ធ្វើឡើងក្នុងសេតវិមានកាលពីថ្ងៃសុក្រទី២១ខែមីនាឆ្នាំ២០២៥ ខណៈលោកនៅជាមួយរដ្ឋមន្ត្រីក្រសួងការពារជាតិ Pete Hegseth។

យន្តហោះនេះនឹងត្រូវផលិតក្រោមគម្រោងឧត្តមភាពដែនអាកាសជំនាន់ថ្មី (NGAD)។ NGAD គឺជាកម្មវិធីរបស់កងទ័ពអាកាសអាមេរិក ដើម្បីអភិវឌ្ឍប្រព័ន្ធអាវុធច្រើនប្រភេទ រួមទាំងយន្តហោះដែលមានមនុស្សបើកនិងយន្តហោះគ្មានមនុស្សបើក (UAV) ដោយផ្តោតសំខាន់លើយន្តហោះចម្បាំងបំបាំងកាយរយៈចម្ងាយឆ្ងាយជំនាន់ទី៦ ដែលមានឈ្មោះកូដថា Penetrating Air Defenses (PCA) ហើយគម្រោងនេះទៀតសោត ត្រូវបានគេមើលឃើញថា ជាកិច្ចខិតខំប្រែងដើម្បីផលិតយន្តហោះថ្មីៗ ជំនួសកងយន្តហោះ F-22 Raptor ចាស់ៗ។

មានព័ត៌មានជាច្រើនដែលលោក ត្រាំ ព្យាយាមលាក់បាំងជាការណ៍សម្ងាត់អំពីយន្តហោះនេះ ប៉ុន្តែចំណុចខ្លះដែលគេដឹងគឺថា F-47 មានសមត្ថភាពហោះហើរបំបាំងកាយនិងភាពធន់ខ្លាំងនិងទំនើបជាងយន្តហោះចម្បាំងជំនាន់ទី៥ ដូចជា F-22 និង F-35។

វាក៏នឹងបំពាក់នូវប្រព័ន្ធចាប់សញ្ញាទំនើប និងសមត្ថភាពក្នុងការធ្វើប្រតិបត្តិការរួមគ្នាជាមួយក្រុមយន្តហោះគ្មានមនុស្សបើកផងដែរ ខណៈគេរំពឹងថា F-47 នឹងដាក់ឲ្យធ្វើប្រតិបត្តិការក្នុងអាណត្តិរបស់លោក ត្រាំ នេះតែម្តង។

ជុំវិញការផលិតយន្តហោះថ្មីដ៏ទំនើបនេះដែរ រដ្ឋមន្ត្រីក្រសួងការពារជាតិ Pete Hegseth បានព្រមានទៅសត្រូវថា សហរដ្ឋអាមេរិក មានសមត្ថភាពក្នុងការគ្រប់គ្រងអំណាចនៅទូទាំងពិភពលោក គ្មានអ្វីអាចរារាំងបានឡើយ ហើយយ៉ាងណា ទីក្រុងវ៉ាស៊ីនតោនក៏មិនបោះបង់ចោលសម្ព័ន្ធមិត្តរបស់ខ្លួនដែរ។

ចំណុចពិសេសមួយដែលគេមិនចាប់អារម្មណ៍ថាតើហេតុអ្វីបានជាយន្តហោះនេះដាក់ឈ្មោះថា F-៤៧? នោះគឺដោយសារតែ លេខ៤៧គឺតំណាងឲ្យលោក ត្រាំ ជាប្រធានាធិបតីអាមេរិកទី៤៧៕

អត្ថបទ៖ សុខ សុវណ្ណ

ចុចអាន៖ បារាំង ប្រកាសបញ្ជូនយន្តហោះចម្បាំងនុយក្លេអ៊ែរ ទៅជិតព្រំដែនអាល្លឺម៉ង់ ដើម្បីកំញើញរុស្ស៊ី