ព័ត៌មានអន្ដរជាតិ

ជប៉ុន គាំទ្រឲ្យកូរ៉េខាងត្បូង ចាប់ដៃជាមួយឥណ្ឌា ប្រឆាំងនឹងឥទ្ធិពលចិន

បានផុស

១ year មុន

នៅ

ថ្ងៃពុធ ២៦ មីនា ២០២៥

ដោយ

Chheang

ប្រទេសជប៉ុន បានសម្តែងការគាំទ្រចំពោះការពង្រឹងកិច្ចសហប្រតិបត្តិការសន្តិសុខរវាងឥណ្ឌា និងកូរ៉េខាងត្បូងនៅក្នុងតំបន់ឥណ្ឌូប៉ាស៊ីហ្វិក។

បើយោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២៥ខែមីនា ការលើកឡើងរបស់លោក Gen Nakatani រដ្ឋក្រសួងការពារជាតិជប៉ុន ធ្វើឡើងក្រោយពីមានសំណើរបស់ប្រមុខយោធាហ្វីលីពីនក្នុងការពង្រីកក្រុមសន្តិសុខដែលគាំទ្រដោយសហរដ្ឋអាមេរិកនិងវត្តមានរបស់អូស្ត្រាលី ជប៉ុន និងហ្វីលីពីន ដើម្បីរួមបញ្ចូលប្រទេសឥណ្ឌា និងកូរ៉េខាងត្បូង។

ក្រសួងការពារជាតិជប៉ុន បានសង្កត់ធ្ងន់លើសារៈសំខាន់នៃការបង្កើតក្រុមសន្តិសុខចម្រុះនេះ ដើម្បីដោះស្រាយបញ្ហាប្រឈមផ្នែកសន្តិសុខដែលកំពុងកើនឡើង ជាពិសេសពីប្រទេសចិន។ ក្រុមចម្រុះនេះ មានឈ្មោះថា «Squad» ហើយវាផ្តោតលើកិច្ចសហប្រតិបត្តិការលើវិស័យការពារជាតិ ការចែករំលែកព័ត៌មានសម្ងាត់ ព្រមទាំងសមយុទ្ធ និងប្រតិបត្តិការយោធារួមគ្នា។

ហ្វីលីពីន បាននិងកំពុងស្វែងរកយ៉ាងសកម្មក្នុងការពង្រីកសមាជិកភាពរបស់ «Squad» ដើម្បីពង្រឹងសន្តិសុខក្នុងតំបន់។ ប្រមុខកងកម្លាំងប្រដាប់អាវុធហ្វីលីពីន លោក Romeo Brawner បានគូសបញ្ជាក់ពីការដាក់បញ្ចូលសក្តានុពលនៃប្រទេសឥណ្ឌា និងកូរ៉េខាងត្បូង ជាមធ្យោបាយមួយដើម្បីបង្កើនសមត្ថភាពការពារជាតិជាសមូហភាព ក្នុងការឆ្លើយតបទៅនឹងការបង្កើនការទាមទាររបស់ចិននៅក្នុងតំបន់។

ឥណ្ឌាក៏បាននិងកំពុងបន្តទំនាក់ទំនងសន្តិសុខ និងសេដ្ឋកិច្ចកាន់តែស៊ីជម្រៅជាមួយជប៉ុន និងកូរ៉េខាងត្បូង ដោយឆ្លុះបញ្ចាំងពីចំណាប់អារម្មណ៍រួមគ្នាក្នុងការប្រឆាំងនឹងឥទ្ធិពលដែលកំពុងកើនឡើងរបស់ចិននៅក្នុងឥណ្ឌូប៉ាស៊ីហ្វិក។ ដំណើរទស្សនកិច្ចរបស់រដ្ឋមន្ត្រីការបរទេសឥណ្ឌាលោក Subrahmanyam Jaishankar ទៅកាន់ជប៉ុន និងកូរ៉េខាងត្បូងនាពេលកន្លងមក មានគោលបំណងជំរុញកិច្ចសហប្រតិបត្តិការត្រីភាគី និងដោះស្រាយបញ្ហាប្រឈមសន្តិសុខក្នុងតំបន់ជាសមូហភាព៕

ដោយ៖ ឈាង