ព័ត៌មានអន្ដរជាតិ

ធ្លាក់ឧទ្ធម្ភាគចក្រពន្លត់អគ្គិភ័យនៅកូរ៉េខាងត្បូង ស្លាប់អ្នកបើកម្នាក់ ខណៈកំពុងមានភ្លើងឆេះព្រៃដ៏អាក្រក់បំផុតក្នុងប្រទេស

បានផុស

៤ ថ្ងៃ មុន

នៅ

ថ្ងៃពុធ ២៦ មីនា ២០២៥

ដោយ

Chheang

នៅក្នុងឧប្បត្តិហេតុនាថ្ងៃទី២៦ខែមីនាឆ្នាំ២០២៥នេះ ឧទ្ធម្ភាគចក្រពន្លត់អគ្គិភ័យមួយគ្រឿង បានធ្លាក់ខណៈពេលកំពុងប្រយុទ្ធនឹងភ្លើងឆេះព្រៃដ៏ធ្ងន់ធ្ងរនៅក្នុងទីក្រុង Uiseong ភាគអាគ្នេយ៍នៃប្រទេសកូរ៉េខាងត្បូង ដែលបណ្តាលឲ្យអ្នកបើកម្នាក់បានបាត់បង់ជីវិត។

ឧទ្ធម្ភាគចក្រពន្លត់អគ្គិភ័យនៅកូរ៉េខាងត្បូង /រូបតំណាង (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧទ្ធម្ភាគចក្រនេះ បានធ្លាក់នៅលើភ្នំមួយកន្លែង ចម្ងាយប្រហែល ១៨០គីឡូម៉ែត្រពីភាគអាគ្នេយ៍នៃរដ្ឋធានីសេអ៊ូល។ អ្នកបើកឧទ្ធម្ភាគចក្រអាយុ៧៣ឆ្នាំ ត្រូវបានគេប្រកាសថាស្លាប់នៅកន្លែងកើតហេតុ។ មូលហេតុនៃការធ្លាក់ឧទ្ធម្ភាគចក្រកំពុងស្ថិតនៅក្រោមការស៊ើបអង្កេត។

ឧប្បត្តិហេតុនេះ បានកើតឡើងចំពេលដែលកំពុងមានភ្លើងឆេះព្រៃដ៏អាក្រក់បំផុតនៅក្នុងប្រវត្តិសាស្ត្ររបស់កូរ៉េខាងត្បូង ដែលបានបំផ្លាញតំបន់ភាគខាងត្បូងនៃប្រទេស។ អគ្គិភ័យបានឆក់យកជីវិតមនុស្សយ៉ាងហោចណាស់ ១៨នាក់ បំផ្លាញសំណង់ជាង ២០០កន្លែង និងបង្ខំអ្នកស្រុកប្រហែល ២៧ ០០០នាក់ត្រូវជម្លៀសខ្លួនចេញ។ ភ្លើងបានលេបត្របាក់ផ្ទៃដីប្រមាណ ៤៣ ៣៣០ហិចតា ប៉ះពាល់ដល់ព្រះវិហារ ផ្ទះសម្បែង និងរោងចក្រជាច្រើន។

ការដាក់ពង្រាយយ៉ាងសន្ធឹកសន្ធាប់នៃអ្នកពន្លត់អគ្គិភ័យ ទាហាន និងបុគ្គលិកផ្សេងៗទៀតចំនួន ៤ ៦៥០នាក់ត្រូវបានចល័តដើម្បីប្រយុទ្ធប្រឆាំងនឹងអណ្តាតភ្លើង។ ការស៊ើបអង្កេតកំពុងដំណើរការដើម្បីកំណត់ពីមូលហេតុនៃភ្លើងឆេះព្រៃថាតើវាបណ្ដាលមកពីកំហុសរបស់មនុស្ស ឬក៏កត្តាផ្សេងទៀត៕