ព័ត៌មានអន្ដរជាតិ

ការនាំចេញកសិផលវៀតណាម ប្រឈមការត្រួតពិនិត្យគុណភាពតឹងរុឹង

បានផុស

១ year មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

វៀតណាមមានសក្ដានុពលខ្លាំងសម្រាប់ការវិនិយោគលើផលិតកម្ម ការកែច្នៃ និងការនាំចេញកសិកម្ម ប៉ុន្តែអ្នកជំនាញកំពុងព្រួយបារម្ភចំពោះការណ៍ដែលថា ការនាំចេញកសិផលវៀតណាមប្រឈមនឹងការត្រួតពិនិត្យគុណភាពតឹងរុឹង រួមជាមួយឧបសគ្គរារាំងជាច្រើនទៀត។ នេះបើតាមការចុះផ្សាយរបស់កាសែត Viet Nam News។

យោងតាមសមាគមផ្លែឈើ និងបន្លែវៀតណាម (VINAFRUIT) ការនាំចេញផ្លែឈើ និងបន្លែក្នុងខែមីនា ឆ្នាំ ២០២៥ រំពឹងថានឹងមានចំនួន ៤២១ លានដុល្លារអាមេរិក ធ្លាក់ចុះ ១០,៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។ វាគឺជាការធ្លាក់ចុះប្រាក់ចំណូលនៃការនាំចេញប្រចាំខែ ខែទី៣ជាប់ៗគ្នា ដែលផ្ទុយពីឆ្នាំ ២០២៤ ពេលវៀតណាមបានកត់ត្រាពីកំណើនជារៀងរាល់ខែ។

គិតត្រឹមចុងខែមីនានេះ ពោលគឺត្រីមាសទី១ ឆ្នាំ ២០២៥ ការនាំចេញផ្លែឈើ និងបន្លែវៀតណាម មានចំនួនសរុប ១,១ ប៊ីលានដុល្លារ ដោយធ្លាក់ចុះ ១៣,២ ភាគរយ ធៀបនឹងរយៈពេលដូចគ្នាកាលពីឆ្នាំមុន។

ការនាំចេញទុរេនក្លាសេ បង្ហាញពីការលំបាកដែលវិស័យវៀតណាមមួយនេះប្រឈមមុខ។ វៀតណាមទទួលបានការអនុញ្ញាតនាំចូលទុរេនក្លាសេទៅកាន់ទីផ្សារចិន ក្នុងខែសីហា ឆ្នាំមុន។ យ៉ាងណាមិញ រហូតមកដល់ពេលនេះ គេមិនទាន់ឃើញមានការនាំចេញណាមួយនៅឡើយទេ ហើយធ្វើឱ្យពិបាកសម្រេចបានគោលដៅបង្កើនប្រាក់ចំណូលពីការនាំចេញ។

VINAFRUIT បានព្រមានថា ប្រសិនបើនិន្នាការធ្លាក់ចុះនៅតែបន្ត វៀតណាមនឹងមិនអាចសម្រេចបាននូវគោលដៅនាំចេញឆ្នាំ ២០២៥ របស់ខ្លួននោះទេ។

កាលពីដើមឆ្នាំនេះ អាជ្ញាធរចិនបានរឹតត្បឹតតឹងរុឹងលើការនាំចូល ដោយតម្រូវឱ្យមានការត្រួតពិនិត្យសារធាតុគីមីបង្កជំងឺមហារីកលើទុរេននាំចូលពីប្រទេសថៃ និងវៀតណាម។ ការណ៍នេះធ្វើឱ្យការនាំចេញទុរេនរបស់វៀតណាម ដែលពឹងផ្អែកលើទីផ្សារចិន ធ្លាក់ចុះយ៉ាងគំហុក ដែលធ្វើឱ្យការនាំចេញនៃវិស័យកសិផលទាំងមូល ធ្លាក់ចុះដែរ។

ក្រៅពីធុរេន ផលិតផលពីវិស័យកសិកម្មផ្សេងទៀត ក៏ប្រឈមមុខនឹងការត្រួតពិនិត្យស្រដៀងគ្នាពីប្រទេសទីផ្សារនាំចូលផ្សេងៗទៀតផងដែរ រួមទាំងបញ្ហាស្លាកយីហោ និងការត្រួតពិនិត្យគុណភាព។ បទប្បញ្ញត្តិតឹងរុឹងនៅក្នុងប្រទេសជាគោលដៅនាំចេញសំខាន់ៗ តម្រូវឱ្យអាជីវកម្មវៀតណាមបំពេញតាមស្តង់ដារអន្តរជាតិ។

អនុប្រធាននាយកដ្ឋានគុណភាព ការកែច្នៃ និងអភិវឌ្ឍន៍ទីផ្សារ នៃក្រសួងកសិកម្ម និងអភិវឌ្ឍន៍ជនបទវៀតណាម លោក Lê Thanh Hoa បាននិយាយថា វិស័យកសិកម្មវៀតណាមនៅតែងាយរងគ្រោះ។ បញ្ហាដូចជាផលិតកម្មខ្នាតតូច ការចំណាយខ្ពស់ ដំណើរការមិនល្អក្រោយការប្រមូលផល និងកង្វះការត្រួតពិនិត្យគុណភាពតាមស្តង់ដារ បានធ្វើឱ្យកំណើននៃវិស័យនេះនៅមានកម្រិត។ ការត្រួតពិនិត្យគុណភាពជាច្រើនអាស្រ័យលើបទពិសោធន៍ក្រៅបច្ចេកវិទ្យា ដែលធ្វើឲ្យអាជីវកម្មពិបាកបំពេញតាមបទប្បញ្ញត្តិនៃការនាំចូលដ៏តឹងរុឹង។

លោក Hoa ស្នើឱ្យអាជីវកម្មប្រើប្រាស់កិច្ចព្រមព្រៀងពាណិជ្ជកម្មសេរីរបស់វៀតណាម ដើម្បីទទួលបានការកាត់បន្ថយពន្ធគយ និងបង្កើនសមត្ថភាពប្រកួតប្រជែង។ ក្រសួងកំពុងរឹតបន្តឹងការត្រួតពិនិត្យគុណភាព ដើម្បីបំពេញតាមស្តង់ដារប្រទេសនាំចូល និងកំពុងកែលម្អការត្រួតពិនិត្យ ចេញការព្រមាន និងអនុវត្តការពិន័យដើម្បីការពារកេរ្តិ៍ឈ្មោះកសិកម្មរបស់វៀតណាម៕