កីឡា

ច្បាស់ៗ ពេជ្រ សុផាន់៖ កីឡាករបើវាយដូរបាយ កុំមកហាត់ បើវាយចង់ល្បីចាំមក

បានផុស

១ year មុន

នៅ

ថ្ងៃសុក្រ ១៨ មេសា ២០២៥

ដោយ

លោក ពេជ្រ សុផាន់ និង ពេជ្រ សឹង្ហៈ បានផ្ដាំផ្ញើកីឡាករក្នុងក្លឹបថា បើហាត់វាយគ្រាន់តែដូរបាយទេកុំមកហាត់ល្អជាង ប៉ុន្តែបើវាយចង់ល្បីវាយចង់រកលុយបានច្រើនចាំមកហាត់វិញ។

រូបភាពផេកលោក ពេជ្រ សុផាន់

គ្រូឆ្នើម ពេជ្រ សុផាន់ ហាក់បង្ហាញអារម្មណ៍មិនសូវពេញចិត្តចំពោះកូនសិស្សក្នុងក្លឹបរបស់លោកឡើយមួយរយៈពេលនេះបន្ទាប់ពីរងបរាជ័យច្រើនតាមបណ្ដាស្ថានីយ។ ការរងបរាជ័យនេះត្រូវបានគេដឹងថាកត្តាមកពីលោកមិននៅជាមួយក្លឹបរយៈពេលជិតកន្លះខែដោយសារជាប់ទៅសហរដ្ឋអាមេរិកជាមួយ ពេជ្រ សម្បត្តិ។

កីឡាករ ពេជ្រ សឹង្ហៈ

បើតាមវីដេអូឆ្លងឆ្លើយគ្នារវាងលោក ពេជ្រ សុផាន់ និង ពេជ្រ សឹង្ហៈ បង្ហោះមុននេះគឺបានបញ្ជាក់ពីការចូលហ្វឹកហាត់វិញរបស់ក្លឹបប្រដាល់ពេជ្រសុផាន់គុនខ្មែរ បន្ទាប់ពីអនុញ្ញាតឲ្យសិស្សៗសម្រាកទៅលេងស្រុកកំណើតដើម្បីប្រារឰពិធីបុណ្យចូលឆ្នាំប្រពៃណីខ្មែរកន្លងទៅនេះ។

កីឡាករក្លឹបលោក ពេជ្រ សុផាន់

លោក ពេជ្រ សុផាន់ បានបញ្ជាក់ទៀតថា អ្នកដែលឧស្សាហ៍ហ្វឹកហាត់គឺទទួលបានផលល្អដូចការដែរឧស្សាហ៍ចំណែកអ្នកខ្ជិលហ្វឹកហាត់ក៏ទទួលបានផលតាមការខ្ជិលរបស់ខ្លួនដែរ។ បន្ថែមពីនេះអ្នកមកហាត់ប្រដាល់បើគិតថាគ្រាន់តែហាត់ដូរបាយទេកុំមកហាត់ធ្វើអ្វី។ បើហ្វឹកហាត់ចង់ល្បីចង់រកលុយបានច្រើនចាំមកចាប់អាជីពនេះបន្តទៀត។

បញ្ជាក់ដែរថា ការបង្ហោះវីដេអូផ្ដាំផ្ញើទៅសិស្សៗនេះគឺនៅលើហ្វេសបុកផេកលោក ពេជ្រ សុផាន់ (Pich Sophann KunKmmer1 ) កាលពីព្រឹកថ្ងៃទី១៨ ខែមេសា ឆ្នាំ២០២៥។ លោក ពេជ្រ សុផាន់ ជាគ្រូបង្វឹក និងជាម្ចាស់ក្លឹបពេជ្រសុផាន់គុនខ្មែរ។ ក្លឹបរបស់លោកជាក្លឹបធំ និងល្បីឈ្មោះក្នុងចំណោមក្លឹបប្រដាល់គុនខ្មែរធំៗនៅកម្ពុជានាពេលបច្ចុប្បន្ននេះ។ ក្លឹបនេះមានសិស្សគុនច្រើនកំពុងល្បីឈ្មោះខ្លាំងពិសេស ពេជ្រ សម្បត្តិ ពេជ្រ សឹង្ហៈ ពេជ្រ ប៊ុនសិទ្ធ ពេជ្រ អាទិទេព និងកីឡាករមួយចំនួនទៀត៕

អត្ថបទដោយ៖ នួន ស៊ីណា