អាមេរិក វាយប្រហារសាហាវបំផុតនៅយេម៉ែន សម្លាប់មនុស្ស៨០នាក់ របួស១៥០នាក់

តាមការចុះផ្សាយរបស់ AFP នៅថ្ងៃសៅរ៍ទី១៩ខែមេសាឆ្នាំ២០២៥, សហរដ្ឋអាមេរិក បានបើកការវាយប្រហារដ៏ប្រល័យលើឃ្លាំងស្តុកប្រេងនៅកំពង់ផែ Ras Issa នៃសមុទ្រក្រហម ប្រទេសយេម៉ែន ដោយសម្លាប់មនុស្សយ៉ាងតិច៨០នាក់ និងរបួស១៥០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាការវាយប្រហារដ៏សាហាវបំផុតរបស់អាមេរិក ក្នុងយុទ្ធនាការរយៈពេល១៥ខែ ប្រឆាំងនឹងក្រុមសកម្មប្រយុទ្ធហ៊ូធី ដែលគ្រប់គ្រងភាគច្រើននៃប្រទេសអារ៉ាប់ដ៏ក្រីក្រមួយនេះ។

ពាក់ព័ន្ធការវាយប្រហារនេះ ទីបញ្ជាការកណ្តាលអាមេរិក (CENTCOM) បានបង្ហោះលើប្រព័ន្ធផ្សព្វផ្សាយសង្គមថា «កងកម្លាំងអាមេរិកបានចាត់វិធានការបំបាត់ប្រភពប្រេងឥន្ធនៈរបស់ក្រុមភេរវករហ៊ូធី ដែលមានប្រទេសអ៊ីរ៉ង់នៅពីក្រោយខ្នង។ គោល​បំណង​នៃ​ការ​វាយ​ប្រហារនេះ ​គឺ​ដើម្បីកម្ចាត់ប្រភព​សេដ្ឋកិច្ច​​របស់​ក្រុមហ៊ូធី»។

ជុំវិញការវាយប្រហារនេះដែរ ទូរទស្សន៍ Al-Masirah របស់ក្រុមហ៊ូធី បានផ្សាយថា មិនមែនតែកំពង់ផែ Ras Issa ទេ អាមេរិកក៏វាយប្រហារអាកាសលើទីតាំងផ្សេងទៀតនៅក្បែរនោះផងដែរ ខណៈក្រុមសង្គ្រោះព្រមានថា តួលេខមនុស្សស្លាប់អាចកើនឡើងទៀត ព្រោះនៅមានអ្នកខ្លះរបួសធ្ងន់ និងខ្លះទៀតបាត់ខ្លួន រកមិនទាន់ឃើញ។

សូមជម្រាបថា មួយខែមកនេះ កងទ័ពអាមេរិក បានបើកការវាយប្រហារមិនប្រណីដៃសឹងរាល់ថ្ងៃលើក្រុមឧទ្ទាមហ៊ូធី ដោយសារតែចលនាសកម្មប្រយុទ្ធមួយនេះ មិនអើពើនឹងការព្រមានរបស់ទីក្រុងវ៉ាស៊ីនតោន ដោយនៅតែគឃ្លើនបាញ់សន្ធាប់លើកប៉ាល់ដឹកទំនិញនៅសមុទ្រក្រហមនិងឈូងសមុទ្រអាដេន។

ម្យ៉ាងវិញទៀត បើយោងតាមអ្នកជំនាញ, ការវាយប្រហារដ៏សាហាវបំផុតរបស់អាមេរិកលើកនេះ គឺជាសារយ៉ាងច្បាស់ផ្ញើទៅប្រទេសអ៊ីរ៉ង់ ស្របពេលមានសេចក្តីរាយការណ៍ថា ទីក្រុងតេហេរ៉ង់ ជិតផលិតបានអាវុធបរមាណូហើយ។

សហរដ្ឋអាមេរិក ក៏បានត្រៀមខ្លួនហើយដែរ ដើម្បីចាប់ផ្តើមការចរចាជាថ្មីជាមួយអ៊ីរ៉ង់ ស្តីពីកម្មវិធីនុយក្លេអ៊ែរក្នុងទីក្រុងរ៉ូម នៃប្រទេសអ៊ីតាលី នៅចុងសប្តាហ៍នេះ៕ 

អត្ថបទ៖ សុខ សុវណ្ណ

ចុចអាន៖ ​អាមេរិកវាយ​ប្រហារ​​លើ​ក្រុម​ហ៊ូធី សម្លាប់​មនុស្ស​៣៨​នាក់និង​របួស​១០២​នាក់​នៅ​យេម៉ែន​