ពូទីន ថា រុស្ស៊ីវាយប្រហារទីតាំងស៊ីវិល ព្រោះមានទ័ពអ៊ុយក្រែននិងបរទេស លាក់ខ្លួននៅទីនោះ 

ឆ្លើយតបទៅនឹងសំណើពីអ៊ុយក្រែន ដែលស្នើសុំឲ្យ ភាគីទាំងសងខាងត្រូវតែផ្អាកការវាយប្រហារលើទីតាំងស៊ីវិល, ប្រធានាធិបតីរុស្ស៊ី វ្ល៉ាឌីមៀរ ពូទីន អះអាងថា ទីក្រុងមូស្គូ កំណត់គោលដៅទាំងនោះ ព្រោះកងទ័ពអ៊ុយក្រែននិងបរទេស បានប្រើវាជាកន្លែងលាក់ខ្លួន និងធ្វើជាខែល ហើយយកទីតាំងទាំងនោះដើម្បីប្រព្រឹត្តអំពើឧក្រិដ្ឋកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថ្លែងបែបនេះទៅកាន់ទូរទស្សន៍ Russia 1 កាលពីថ្ងៃចន្ទទី២១ខែមេសាឆ្នាំ២០២៥ ដោយនិយាយថា «រុស្ស៊ីនឹងនៅតែបន្តកំណត់គោលដៅលើកងទ័ពអ៊ុយក្រែននិងបរទេស ដោយមិនគិតពីថាតើពួកគេស្ថិតនៅទីតាំងស៊ីវិលឬយ៉ាងណានោះទេ។ យើងបានសិក្សាយ៉ាងហ្មត់ចត់មុននឹងបើកការវាយប្រហារព្រោះទីក្រុងកៀវ បានប្រើប្រាស់ហេដ្ឋារចនាសម្ព័ន្ធស៊ីវិលម្តងហើយម្តងទៀតសម្រាប់តម្រូវការយោធា»។

ពាក់ព័ន្ធប្រតិបត្តិការនៅតំបន់ Kursk, ប្រធានាធិបតីរុស្ស៊ីបានឲ្យដឹងថា «ជាការពិតគ្រប់គ្នាដឹងថាយើងបាញ់មីស៊ីលលើសាកលវិទ្យាល័យមួយក្នុងទីក្រុង Sumy។ មែន! នោះជាទីតាំងស៊ីវិល ប៉ុន្តែវាត្រូវបានគេប្រើធ្វើជាជម្រកកងទ័ព ដែលប្រព្រឹត្តិអំពើឧក្រិដ្ឋកម្មនៅតំបន់ Kursk ដូច្នេះយើងនឹងឲ្យពួកគេទទួលខុសត្រូវចំពោះអ្វីដែលពួកគេធ្វើ»។

សម្តីលោកពូទីន កើតឡើងភ្លាមៗបន្ទាប់ពីបទឈប់បាញ់បុណ្យ Easter ផុតកំណត់ ហើយកងទ័ពរុស្ស៊ី បើកយុទ្ធនាការវាយប្រហារទ្រង់ទ្រាយធំលើអ៊ុយក្រែន ដោយបាញ់ស្រោចមិនញញើតដៃ។

តាមការចុះផ្សាយរបស់សារព័ត៌មាន Independent, នៅព្រឹកព្រលឹមថ្ងៃចន្ទទី២១ខែមេសាឆ្នាំ២០២៥ ស៊ីរ៉ែនប្រកាសអាសន្នការវាយប្រហារអាកាស បានបន្លឺឡើងសឹងពេញប្រទេសអ៊ុយក្រែន ខណៈមានសេចក្តីរាយការណ៍ថា ការផ្ទុះដ៏ធំបានអង្រួនទីក្រុងភាគខាងកើត Mykolaiv។

ស៊ីរ៉ែនប្រកាសអាសន្នបានបន្លឺឡើងនៅតាមទីក្រុងនិងតំបន់ធំៗដូចជា Kyiv, Kherson, Dnipro, Cherkasy, Mykolaiv និង Zaporizhzhia ហើយនៅកន្លែងខ្លះក៏មានរបាយការណ៍អំពីការវាយប្រហារដោយមីស៊ីលនិងដ្រូនផងដែរ។

ទោះបីជាយ៉ាងណាក៏ដោយ មិនមានសេចក្តីរាយការណ៍អំពីតួលេខជនរងគ្រោះឡើយ៕

អត្ថបទ៖ សុខ សុវណ្ណ

ចុចអាន៖ ផុតបទឈប់បាញ់បុណ្យ Easter ភ្លាម រុស្ស៊ី បាញ់ស្រោចមិនញញើតដៃ លើអ៊ុយក្រែនភ្លែត