តួឯកស្រីក្នុង​រឿង «ក្រមុំឡិកឡក់កំលោះទុយ​មុយ​»​ នៅតែរក្សាមុខក្មេង ទោះបី​កន្លង​១៩ឆ្នាំ

ជឿជាក់ថា ទស្សនិកជនដែលនិយមតាមដានភាពយន្តភាគ​ដ៏ល្បី​ល្បាញ​ប្រចាំ​ប្រវត្តិសាស្ត្រ K-Drama ក្រោមចំណងជើងថា «Princess Hours ឬ ក្រមុំឡិកឡក់កំលោះទុយមុយ» ចាក់ផ្សាយកាលពីឆ្នាំ ២០០៦ ប្រាកដជាស្គាល់យ៉ាងច្បាស់នូវតួឯកស្រី Chae kyung Shin ដែលដើរតួដោយតារាសម្ដែងស្រី Yoon Eun Hye ជាក់ជាមិនខានឡើយ។

បន្ទាប់ពីបាត់មុខច្រើនឆ្នាំក្នុងវិស័យកម្សាន្ត​របស់​កូរ៉េ កាលពីពេលថ្មីៗនេះដែរ តារាសម្ដែងវ័យ៤០ឆ្នាំស្រាប់តែបង្ហាញខ្លួនយ៉ាងភ្ញាក់ផ្អើលបំផុតក្នុងឯកសណ្ឋានសិស្សសាលា អមដោយការតុបតែងមុខនិងម៉ូតសក់ដូចទៅនឹងតួស្រីក្នុងភាពយន្ត «Princess Hours» ដែលនោះ បានធ្វើឲ្យអ្នកទស្សនាជាច្រើនមានការនឹករលឹក និងចង់ឲ្យរូបនាងវិលត្រលប់ មកចាប់អាជីពសម្ដែងឡើងវិញ។

ទោះជាយ៉ាងណា ការស្លៀកពាក់ធ្វើ​ត្រាប់តាមតួអង្គដែលខ្លួនធ្លាប់សម្ដែងគឺជារឿងមួយប្លែក ហើយ​​អ្វីដែលកាន់តែធ្វើឲ្យអ្នកគាំទ្រភ្ញាក់ផ្អើលបំផុតនោះគឺទម្រង់មុខរបស់ Yoon Eun Hye នៅ​រក្សាភាព​ជា«យុវវ័យ» និង​ សូម្បី​តែ​ពេលវេលាបានកន្លងផុតទៅ ១៩ ឆ្នាំទៅ​ហើយក្តី ក៏នាងនៅតែរក្សាភាពស្រស់ស្អាត ស្នាមញញឹមរីករាយមិនផ្លាស់ប្តូរសូម្បីតែបន្តិចណាឡើយ។ មនុស្ស​ជា​ច្រើន​ថែម​ទាំង​បាន​បញ្ចេញ​មតិ​ស្របគ្នាថា «ច្បាស់ណាស់ថា នេះ​ពិត​ជា​ជំនាន់​ឆ្នាំ ២០០៦ របស់ Shin Chae Young មិនប្រួលប្រែ»។

Yoon Eun Hye បានចាប់ផ្តើមអាជីពដំបូង នៅក្នុងឧស្សាហកម្មកម្សាន្តកូរ៉េក្នុងនាមជាសមាជិកនៃក្រុមចម្រៀងនារី Baby V.O.X ក្នុងឆ្នាំ ១៩៩៩ មុនពេលល្បីល្បាញក្លាយជាតួឯកស្រីដំបូងក្នុងរឿងភាគ «Princess Hours» ដែលបានក្លាយជាស៊េរីដ៏ពេញនិយមបំផុតមួយនៅលើទូរទស្សន៍ MBC ហើយក៏ត្រូវអ្នកទស្សនាជាច្រើនលើកសរសើរថា វាជាភាពយន្តស៊េរីមនោសញ្ចេតនាដ៏ល្អបំផុតមួយ ក្នុងសម័យកាលផងដែរ។

ដោយឡែក សម្រាប់ការវិលត្រឡប់របស់ Yoon Eun Hye ក្នុងរូបរាងរបស់តួអង្គ Shin Chae Young ក្នុងឆ្នាំ ២០២៥នេះ មិនត្រឹមតែធ្វើឲ្យអ្នកគាំទ្រនឹកនាងប៉ុណ្ណោះទេ ប៉ុន្តែថែមទាំងបញ្ជាក់សារជាថ្មីអំពីភាពទាក់ទាញរបស់តារាស្រីក្នុងនាមជាតារាសម្តែងជួរមុខ ដែលស្ថិតក្នុងបេះដូងអ្នកទស្សនាជិតពីរទសវត្សរ៍មកហើយ។

មិនតែប៉ុណ្ណោះ អ្នក​ធ្លាប់​តាមដាន​រឿងភាគមួយ​នេះ​ នៅ​ចាំ​មិនភ្លេច​ទេនូវ​សាច់រឿង ព្រមទាំងឈុតឆាក​សំខាន់ៗ​ក្នុងភាពយន្តដែល​និយាយ​ពី​ក្មេង​ស្រី​វិទ្យាល័យ​ម្នាក់ ដែល​ត្រូវ​ក្លាយជា​មហេសី​របស់​ស្ដេច​គ្រងរាជ្យ តាម​រយៈ​មង្គលការ​ដែលកើត​ចេញ​ពីការ​ផ្គូរផ្គង​របស់​ចាស់ទុំ។ ភាពយន្ត​នេះ​ផងដែរ ចូលរួម​សម្ដែង​ដោយ​តារា​ប្រុស-​ស្រី​ល្បីៗ​ជា​ច្រើន​នាក់​ដូចជា៖  Yoon Eun Hye, Ju Ji Hoon, Kim Jeong Hoon, និង Song Ji Hyo ជាដើម៕

ខាងក្រោមនេះ គឺជាឈុតថ្មីដែលតារាសម្ដែង Yoon Eun Hye តុបតែងឲ្យដូចតួអង្គស្រី Shin Chae Young

អត្ថបទ៖ សាង ស្រីល័ក្ខ

ចុចអាន៖រាជិនីសម្រស់​ប្រទេស ​កូតឌីវ័រ ទាក់ទាញ​ការ​ចាប់​អារម្មណ៍​ ពី​បវរកញ្ញា​ពិភពលោក