កីឡា

សេង គីមហាប់ ការចេញទៅតៃវ៉ាន់លើកនេះមានសម្ពាធជាងលើកមុន ប៉ុន្តែសង្ឃឹមខ្ពស់

បានផុស

១ year មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

កីឡាករលីប្រូរបស់ក្រុមបាល់ទះវិសាខា សេង គីមហាប់ ថាការចេញទៅប្រកួតនៅតៃវ៉ាន នៃពានរង្វាន់ Win Streak Volleyball Invitational (WSVI) លើកនេះមានសម្ពាធជាងលើកមុន ព្រោះលើកនេះជាការប្រកួតការពារពាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេង គីមហាប់

កីឡាករ សេង គីមហាប់ បានលើកឡើងថា ចំពោះការហ្វឹកហាត់សម្រាប់វិសាខាគឺល្អជាធម្មតា គ្រាន់តែកីឡាករចំណូលថ្មីដែលជាបរទេស៤រូបនោះមិនសូវសាំងបរិយាកាសនៅប្រទេសកម្ពុជា។ អាកាសធាតុនៅកម្ពុជាក្ដៅជាងនៅស្រុករបស់ពួកគេ ដូច្នេះចាប់ផ្ដើមហាត់មិនសូវបានយូរនោះទេឆាប់អស់កម្លាំងហើយ។ ប៉ុន្តែគ្រូៗក៏បានកែប្រែម៉ោងហាត់ជួយសម្រួលឲ្យសមស្រប និងមានភាពងាយស្រួលដល់អ្នកទាំង៤នាក់វិញហើយ។

សេង គីមហាប់ និងមិត្តរួមក្រុម

ការចេញទៅប្រកួតលើកទី២ នៅឯតៃវ៉ាន់នេះ គីមហាប់ បញ្ជាក់ទៀតថាមានសម្ពាធបន្តិចហើយ កាលពីមុនទៅលេងដណ្ដើមពាន ចំណែកលើកនេះលេងការពារពានទៅវិញ។ យ៉ាងណាក្រុមទាំងមូលបានដាក់គោលដៅថាយកពានមកស្រុកខ្មែរជាលើកទី២ ឲ្យបាន។ ការហ្វឹកហាត់ត្រៀម និងជំនឿចិត្ត រួមទាំងមានបរទេសល្អៗ៤រូបទៀតនោះរូបគេសង្ឃឹមដល់ទៅ ៨០% ឯណោះសម្រាប់ការប្រកួតនៅតៃវ៉ាន់លើកនេះ។

សេង គីមហាប់ និងមិត្តរួមក្រុម

បញ្ជាក់ដែរថា ក្រុមបាល់ទះវិសាខា របស់កម្ពុជា នឹងត្រូវចេញទៅប្រកួតការពារពានរង្វាន់ Win Streak Volleyball Invitational (WSVI) ចាប់ពីថ្ងៃទី៣០ ខែមេសា ឆ្នាំ២០២៥ តទៅ។ ពានរង្វាន់នេះរៀបចំដោយម្ចាស់ផ្ទះតៃវ៉ាន់ និងមានក្រុមចូលរួមសរុប ៨ក្រុមមកពី ៦ប្រទេសរួមទាំងកម្ពុជា៕