ព័ត៌មានអន្ដរជាតិ

លោក Rubio៖ ដាក់ទណ្ឌកម្មឬអត់ គឺរង់ចាំមើលបំណងពិតរបស់រុស្ស៊ីជុំវិញកិច្ចចរចាសន្តិភាព

បានផុស

២ ខែ មុន

នៅ

ថ្ងៃពុធ ២១ ឧសភា ២០២៥

ដោយ

Chheang

រដ្ឋមន្ត្រីការបរទេសអាមេរិក លោក Marco Rubio បានបង្ហាញថា សហរដ្ឋអាមេរិកអាចនឹងដាក់ទណ្ឌកម្មបន្ថែមលើរុស្ស៊ី ប្រសិនបើទីក្រុងមូស្គូបរាជ័យក្នុងការជំរុញកិច្ចចរចាសន្តិភាពទាក់ទងនឹងជម្លោះដែលកំពុងបន្តនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅចំពោះមុខគណៈកម្មាធិការទំនាក់ទំនងបរទេសព្រឹទ្ធសភាកាលពីថ្ងៃទី២០ខែឧសភាឆ្នាំ២០២៥ លោក Rubio បានបញ្ជាក់ថា អាមេរិកកំពុងរង់ចាំសំណើបទឈប់បាញ់ជាផ្លូវការពីរុស្ស៊ី។ លោកបានសង្កត់ធ្ងន់ថា បើមានភស្តុតាងបង្ហាញថា រុស្ស៊ីមិនចាប់អារម្មណ៍ពិតប្រាកដក្នុងការបង្កើតកិច្ចព្រមព្រៀងសន្តិភាព និងបន្តការឈ្លានពានផ្នែកយោធា អាមេរិកនឹងពិចារណាអនុវត្តទណ្ឌកម្មបន្ថែមទៀត។

លោក Rubio ក៏បានកត់សម្គាល់ផងដែរថា ប្រធានាធិបតី ដូណាល់ ត្រាំ នឹងជៀសវាងធ្វើការគំរាមកំហែងទណ្ឌកម្មនៅដំណាក់កាលនេះ ដោយជឿថា ការគំរាមកំហែងបែបនេះអាចរារាំងការពិភាក្សាការទូត។ រដ្ឋបាលលោក ត្រាំ មានគោលបំណងរក្សាបណ្តាញទំនាក់ទំនងបើកចំហ ដើម្បីសម្រួលដល់ដំណោះស្រាយដ៏មានសក្តានុពលចំពោះជម្លោះ។

លោក Rubio បានលើកឡើងថា «វាជាការយល់ឃើញរបស់យើងដែលថា រុស្ស៊ីនឹងសរសេរលក្ខខណ្ឌសម្រាប់អ្វីដែលពួកគេចង់បាន ដើម្បីឈានដល់បទឈប់បាញ់ដែលបន្ទាប់មកនឹងអនុញ្ញាតឲ្យមានការចរចាកាន់តែទូលំទូលាយ»។

លោកបានបន្ថែមថា «យើងរង់ចាំលក្ខខណ្ឌទាំងនោះ ហើយក្រោយមកខ្ញុំនឹងយល់កាន់តែច្បាស់អំពីការគិតគូររបស់លោក ពូទីន នៅពេលដែលយើងឃើញថាលក្ខខណ្ឌទាំងនោះជាអ្វី»។

ប្រមុខការទូតកំពូលអាមេរិក បានសង្កត់ធ្ងន់ថា ការដាក់ទណ្ឌកម្មគឺជាសារព្រមានដល់ក្រុងមូស្គូ នៅពេលដែលគ្មានការរីកចម្រើនណាមួយនៅក្នុងកិច្ចចរចាសន្តិភាព។

សូមរឭកថា កាលពីថ្ងៃទី១៩ខែឧសភា លោក ត្រាំ បានប្រកាសថា លោកនឹងមិនដាក់ទណ្ឌកម្មថ្មីលើប្រទេសរុស្ស៊ីឡើយ ដោយសង្កត់ធ្ងន់ទៅលើសារៈសំខាន់នៃការសម្របសម្រួលកិច្ចចរចាសន្តិភាពរវាងរុស្ស៊ី និងអ៊ុយក្រែនជាមុនសិន។ ការសម្រេចចិត្តរបស់មេដឹកនាំអាមេរិក ធ្វើឡើងបន្ទាប់ពីមានការសន្ទនាតាមទូរសព្ទរយៈពេលពីរម៉ោងជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ក្នុងអំឡុងពេលដែលមេដឹកនាំទាំងពីរបានយល់ព្រមផ្តួចផ្តើមការពិភាក្សាបទឈប់បាញ់ភ្លាមៗ៕

ដោយ៖ ឈាង

ចុចអាន៖ ហ្សេលេនស្គី ស្នើកិច្ចប្រជុំសន្តិភាពកម្រិតខ្ពស់ដែលមានភាគីចំនួន៥ចូលរួម