ហ្វីលីពីន និងអាមេរិក ធ្វើសមយុទ្ធដែនសមុទ្ររួមគ្នា នៅសមុទ្រចិនខាងត្បូង

ហ្វីលីពីន និងសហរដ្ឋអាមេរិក បានធ្វើសមយុទ្ធដែនសមុទ្ររួមគ្នានៅសមុទ្រចិនខាងត្បូង ដែលនេះជាលើកទីមួយហើយដែលនាវាឆ្មាំឆ្នេរសមុទ្ររបស់ប្រទេសទាំងពីរបានចូលរួមជាមួយអង្គភាពទ័ពជើងទឹក និងទ័ពអាកាសក្នុងសមយុទ្ធបែបនេះ។

សមយុទ្ធដែលបានធ្វើឡើងនៅថ្ងៃទី​២០​ខែឧសភានៅក្នុងដែនទឹកនៃ​ខេត្ត Palawan និង​ខេត្ត Occidental Mindoro មាន​ការ​ចូលរួម​ពី​កងទ័ពជើងទឹក កងកម្លាំងអាកាស និងឆ្មាំឆ្នេរសមុទ្រ​របស់​ហ្វីលីពីន ក៏ដូចជា​កង​ឆ្មាំឆ្នេរសមុទ្រអាមេរិក Cutter Stratton និងយន្តហោះល្បាតដែនសមុទ្រអាមេរិក P-8A Poseidon។

សមយុទ្ធដែលត្រូវបានពិពណ៌នាថាជា«សកម្មភាពសហប្រតិបត្តិការដែនសមុទ្រ» រួមមាន សមយុទ្ធទំនាក់ទំនង និងសេណារីយ៉ូស្វែងរក និងជួយសង្គ្រោះ។ ព្រឹត្តិការណ៍នេះគឺ​ជា​សកម្មភាពលើកទីពីរក្នុងឆ្នាំ​២០២៥ និងជារួមលើកទី​៦​ចាប់តាំងពីសម្ព័ន្ធមិត្ត​ទាំង​ពីរ​បានផ្តួចផ្តើមធ្វើសមយុទ្ធរួមគ្នាកាល​ពី​ឆ្នាំ​២០២៣។

លោក Romeo Brawner អគ្គសេនាធិការនៃកងកម្លាំងប្រដាប់អាវុធហ្វីលីពីន បានសង្កត់ធ្ងន់ថា សកម្មភាពរួមគ្នាទាំងនេះ បញ្ជាក់ឡើងវិញនូវការប្តេជ្ញាចិត្តរបស់​ហ្វីលីពីន ក្នុងការធ្វើទំនើបកម្មសមត្ថភាពរបស់ខ្លួន និងពង្រឹងភាពជាដៃគូការពារជាតិ ដើម្បីទទួលបានផលប្រយោជន៍ដែនសមុទ្រជាតិ និង​ក្នុង​តំបន់។

ភាព​តានតឹង​រវាងហ្វីលីពីន និងចិន បាន​កើន​ឡើង​ជា​លំដាប់ ពាក់ព័ន្ធ​នឹង​ជម្លោះលើអធិបតេយ្យភាពនៅសមុទ្រចិនខាងត្បូង ដែល​​ជា​ផ្លូវ​ទឹក​​ពាណិជ្ជកម្ម​អន្តរជាតិ​ដ៏​សំខាន់ និង​មាន​តម្លៃ​ប្រចាំឆ្នាំជាង​៣​ទ្រី​លានដុល្លារ។

ចិនទាមទារភាគច្រើននៃផ្លូវទឹកយុទ្ធសាស្ត្រ​នេះ បើទោះបីជាមានសេចក្តីសម្រេចឆ្នាំ​២០១៦ ដោយតុលាការអាជ្ញាកណ្តាលអន្តរជាតិដែលបានរកឃើញថា ការអះអាង​របស់ទីក្រុងប៉េកាំងមិនមានមូលដ្ឋាននៅក្រោមច្បាប់អន្តរជាតិក៏ដោយ៕

ដោយ៖ ឈាង