អាជ្ញាធរសង្កាត់ចោមចៅទី៣ បន្តចុះបូមស្តារប្រព័ន្ធលូក្រោយមានភ្លៀងធ្លាក់ជាបន្តបន្ទាប់

លោក​ វ៉ា​ សាវឿន​ ចៅសង្កាត់រដ្ឋបាលសង្កាត់ចោមចៅទី៣ នៅរសៀលថ្ងៃទី២១ ខែឧសភា ឆ្នាំ២០២៥នេះ បានដឹកនាំក្រុមការងារ​ សហការជាមួយរថយន្តបូមលូរបស់សាលារាជធានីភ្នំពេញ​ ចុះបូមស្ដារប្រព័ន្ធលូនៅក្នុងភូមិព្រៃព្រីងខាងជើង២ ដេីម្បីសម្រួលចរន្តទឹកហូរឲ្យបានលឿនក្រោយមានភ្លៀងធ្លាក់ជាបន្តបន្ទាប់។

លោក​ចៅសង្កាត់ បានឲ្យដឹងថា​ ដោយសារតែប៉ុន្មានថ្ងៃមកនេះមានភ្លៀងធ្លាក់មកផ្ទួនៗគ្នាធ្វេីឲ្យតំបន់មួយចំនួនក្នុងមូលដ្ឋានជន់លិច និងស្ទះនូវចរន្តទឹហូរយឺតប៉ះពាល់ដល់បងប្អូនប្រជាពលរដ្ឋ។ ដោយទទួលបានការស្នើសុំពីប្រជាពលរដ្ឋលោក​ចៅសង្កាត់ក៏ស្នើសុំទៅលោក សាំ​ ពិសិដ្ឋ​ ប្រធានមន្ទីរសាធារណការ និងដឹងជញ្ជូន​ រាជធានីភ្នំពេញ ដេីម្បីបានរថយន្តមកបូមលូសម្រួលចរន្តទឹក។

ជាមួយគ្នានោះផងដែរ​ លោក​ វ៉ា​ សាវឿន​ ចៅសង្កាត់ចោមចៅទី៣ តំណាងឲ្យរដ្ឋបាលសង្កាត់ចោមចៅទី៣ទាំងមូល​ សូមថ្លែងអំណរគុណដល់លោក ឃួង ស្រេង អភិបាលរាជធានីភ្នំពេញ និង​លោក​ សាំ​ ពិសិដ្ឋ​ ប្រធានមន្ទីរសាធារណការនិងដឹងជញ្ជូន​ លោក សក់ ចាន់កញ្ញារិទ្ធ អភិបាលខណ្ឌពោធិ៍សែនជ័យ រួមទាំងក្រុមការងារ​ រាជធានីភ្នំពេញ ដែលបានផ្តល់រថយន្តសម្រាប់បូមលូទាន់ពេលវេលា៕

អត្ថបទ៖ សុខា