រដ្ឋមន្ត្រីការងារ៖ រោងចក្រកើន៥០៨៦ ក្នុងពេល២០ខែ ខណៈប្រាក់ឈ្នួលសរុបប្រចាំឆ្នាំមានជិត៦ពាន់លានដុល្លារ

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២២ ខែឧសភា ឆ្នាំ២០២៥ បានអះអាងថា ប្រាក់ឈ្នួលសរុបរបស់កម្មករប្រចាំឆ្នាំនៅកម្ពុជា បានកើនឡើងជិត ៦ពាន់លានដុល្លារក្នុងមួយឆ្នាំៗ ខណៈរោងចក្រសហគ្រាសបានកើនឡើងពី៤០ ៣០០ ដល់៤៥ ៣៨៦សហគ្រាស គិតនៅត្រឹមខែមេសា ឆ្នាំ២០២៥។

នេះគឺជាការគូសបញ្ជាក់ ដែលលោករដ្ឋមន្ត្រី បានថ្លែងក្នុងពិធីអបអរសាទរការទទួលបានក្រុមហ៊ុនវិនិយោគចំនួន២០០ និងសំណេះសំណាលជាមួយបងប្អូនកម្មករនិយោជិត នៅក្នុងតំបន់សេដ្ឋកិច្ចពិសេសក្រុងព្រះសីហនុ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោករដ្ឋមន្ត្រី ហេង សួរ បានគូសបញ្ជាក់ថា ក្នុងរយៈពេល ២០ខែ ចំនួនរោងចក្រសហគ្រាស បានកើនពីចំនួន ៤០ ៣០០ ដល់ ចំនួន ៤៥ ៣៨៦សហគ្រាស ហើយកម្មករនិយោជិតបានកើនពីប្រមាណ១,៦៥លាននាក់ ដល់ប្រមាណ ១,៨៧លាននាក់ ដែលអាចផ្តល់ប្រាក់ឈ្នួលជូនបងប្អូនកម្មករនិយោជិតមធ្យមសរុបប្រចាំឆ្នាំប្រមាណ៥,៩ប៊ីលានដុល្លារអាម៉េរិក។ ក្នុងនោះ គ្រាន់តែវិស័យកាត់ដេរមានសហគ្រាសសរុបចំនួន ១៦៥៧សហគ្រាស ជាមួយនឹងកម្មករនិយោជិតប្រមាណ ៩៧ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ប៊ីលានដុល្លារអាម៉េរិក។

សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយរដ្ឋបាលខេត្តព្រះសីហនុ និងស្ថាប័នពាក់ព័ន្ធ បានរៀបចំពិធីអបអរសាទរការទទួលបានក្រុមហ៊ុនវិនិយោគចំនួន២០០ ក្នុងតំបន់សេដ្ឋកិច្ចពិសេសក្រុងព្រះសីហនុ ដោយមានកម្មករនិយោជិតចូលរួមសរុបប្រមាណ៣,២ម៉ឺននាក់មកពីតំបន់សេដ្ឋកិច្ចពិសេសក្រុងព្រះសីហនុ ក្នុងនោះស្ត្រីមានផ្ទៃពោះចំនួន៧៥១នាក់៕