ក្រុង​ក្រចេះ បញ្ចប់​ការ​វាស់វែង​ដីធ្លីជាប្រព័ន្ធ ខណៈ​អាជ្ញាធរ​ខេត្ត​បន្ត​ជំរុញ​បញ្ចប់​​ទូទាំំង​ខេត្ត​នៅ​ឆ្នាំ​២០២៥

មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ បានធ្វើការប្រកាសតំបន់វិនិច័្ឆយ​ចំនួន ៥១ ភូមិ បានវាស់វែងចំនួន ៣០.៦៤៨ ក្បាលដី ស្មេីនឹង ១៨.៤១៨,៩៤ ហិកតា ក្នុងនោះបានធ្វើការបិទផ្សាយក្បាលដីជាសាធារណៈ ចំនួន ៩.៣៩៧ ក្បាលដី ស្មេីនឹង ១០.២៣៥ គ្រួសារ ស្មេីនឹង ១៨.៤១៨,៩៤ ហិកតា និងបានចេញបណ្ណ ២.៩៥៣ ក្បាល​​ដី ស្មេីនឹង ១.៤៧៥ គ្រួសារ ស្មេីនឹង ២.៦៩៨,៣៦ ហិកតា នេះយោងតាមរបាយការណ៍រយៈពេល ៥ ខែ ក្នុងឆ្នាំ ២០២៥ របស់មន្ទីរ។

ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ និងជានាយកចាត់ការកម្មវិធីអនុវិស័យរដ្ឋបាលដីធ្លីខេត្ត លោក អ៊ូ សុបុណ្ណកា បានឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធក្នុងភូមិសាស្រ្តខេត្តក្រចេះ បច្ចុប្បន្ន​ក្រុមចុះបញ្ជីដីធ្លីមានលក្ខណៈជាប្រព័ន្ធមានចំនួន ០៦ ក្រុម ដែលបានកំពុងអនុវត្តការវាស់វែងក្នុងស្រុកចំនួន ០៦ ក្នុង​នោះរួមមាន៖ ស្រុកចិត្របុរី ឆ្លូង ព្រែកប្រសព្វ សំបូរ ស្នួល និងស្រុកអូរគ្រៀងសែនជ័យ។ ដោយឡែក ក្រុងក្រចេះបានបិទបញ្ចប់ការវាស់វែងរួច ១០០ ភាគរយ និងបានចេញបណ្ណកម្មសិទ្ធផងដែរ។

ដេីម្បីអនុវត្តតាមគោលដៅរបស់ក្រសួងរៀបចំដែនដី នគរូបនីយកម្ម និងសំណង់ គឺការចុះបញ្ជីដីធ្លីបង្ហើយ សេវាគាប់ចិត្ត និងស្របតាមយុទ្ឋសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលបានជម្រុញលេីការធ្វើកំណែទម្រង់ដីធ្លី និងនគរូបនីយកម្មឱ្យកាន់តែស៊ីជម្រៅ ជាមួយនឹងការបង្កើតឱ្យមាននូវគោលនយោបាយ​ដីធ្លី ៣ ចំណុច រួមមាន៖ ការចុះបញ្ជីដីធ្លីមានលក្ខណៈជាប្រព័ន្ធ ការដោះស្រាយវិវាទដីធ្លីក្រៅប្រព័ន្ធតុលាការ និងការផ្ដល់សេវារដ្ឋបាលដីធ្លីជូនប្រជាពលរដ្ឋប្រកបដោយតម្លាភាព និងប្រសិទ្ធភាពខ្ពស់ សំដៅលើកកម្ពស់កម្រិតជីវភាពរស់នៅរបស់ប្រជាពលរដ្ឋ។

រដ្ឋបាលខេត្តក្រចេះ រួមជាមួយមន្ទីររៀបចំដែនដី នគរូបនីយកម្មសំណង់ និងសុរិយោដីខេត្ត កំពុង​ប្រឹងប្រែងដើម្បីជម្រុញការចុះបញ្ជីដីទូទាំងខេត្តឱ្យបានចប់នៅឆ្នាំ ២០២៥នេះ។

លោកប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ ក៏បានអំពាវនាដល់ប្រជាពលរដ្ឋទាំងអស់ដែលមិនទាន់មកទទួលយកបណ្ណកម្មសិទ្ធិដីធ្លី ដែលមន្ទីរបានចេញបណ្ណរួច សូមអញ្ជើញមកទទួលបណ្ណកម្មសិទ្ធិឱ្យបានគ្រប់ៗគ្នា។

ចំពោះម្ចាស់ក្បាលដីដែលពុំបានចូលរួមក្នុងការងារវាស់វែងដីធ្លីមានលក្ខណៈជាប្រព័ន្ធនាពេលកន្លងមក អាចស្នើសុំធ្វើការវាស់វែង និងចុះបញ្ជីបំពេញបន្ថែមជាក្រោយបាន។ ម្យ៉ាងទៀត ចំពោះក្បាលដីដែលកំពុងមានវិវាទ អាចស្នើសុំធ្វើការវាស់វែង និងចុះបញ្ជីបាននៅពេលករណីវិវាទនោះ ត្រូវបានដោះស្រាយចប់សព្វគ្រប់ជាស្ថាពរតាមនីតិវិធី។ 

បើតាម​មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ លទ្ធផលបិទផ្សាយ និងចែកប័ណ្ណកម្មសិទ្ធិ តាំងពីចាប់ផ្ដើមរហូតមកដល់បច្ចុប្បន្ន ចែកប័ណ្ណសរុបទូទាំងខេត្តបានចំនួន ៥០ ដង ស្មើនឹង ៤៦,៨៣២ បណ្ណ័ ស្មើនឹង ៣២,៥០៣ គ្រួសារ ស្មើនឹង ៣១,៩៧៣,១៤ ហិកតា៕

អត្ថបទ៖ ប្រុញ វិធិន