ការនាំចេញចំណិតដំឡូងមីក្រៀមកើនជាង ៥០% ខណៈដំឡូងមីស្រស់ធ្លាក់ចុះ

គិតចាប់ពីខែមករា-ឧសភា ឆ្នាំ ២០២៥ ការនាំចេញដំឡូងមីក្រៀមសម្រេចបានជាង ១,២២ លាន​តោន កើនឡើង ៥២,៧៣% ធៀបនឹងរយៈពេលដូចគ្នាកាលពីឆ្នាំមុន ដែលមានចំនួន ១,៦ លានតោន។

យោងតាមរបាយការណ៍របស់ក្រសួងកសិកម្មនៅក្នុងរយៈពេល ៥ ខែ ឆ្នាំ ២០២៥ ការនាំចេញ​ចំណិត​ដំឡូងមីក្រៀមសម្រេចបាន ១,២២ លានតោន កើន ៥២,៧៣% ចំណែកឯដំឡូង​មី​ស្រស់​​នាំចេញបាន ១,៤២ លានតោន ធ្លាកចុះ ១០,៩២% ធៀបនឹងរយៈពេលដូចគ្នាក្នុងឆ្នាំ ២០២៤​។

លោក អិល ឈិញ ប្រធានសមា​គមកសិករដំឡូងមីខ្មែរ មានប្រសាសន៍ថា កំណើននៃការនាំ​ចេញ​ចំណិតដំឡូងមីស្ងួត ដោយសារតម្លៃដំឡូងមីស្រស់មានការធ្លាក់ចុះនៅឆ្នាំនេះ។

លោក អិល ឈិញ បន្ថែមថា តម្លៃ​ដំឡូងមីស្ងួត កសិករអាចទទួល​យកបាន ដោយលក់បាន​ក្នុងតម្លៃ ៤៨០ រៀលក្នុងមួយ​គីឡូក្រាម ប៉ុន្តែពួកគាត់ពិ​បាកធ្វើ ដោយសារអាកាសធាតុធ្លាក់ភ្លៀង ខណៈ​ដំឡូង​មីស្រស់តម្លៃប្រមាណ ១២០ រៀល ក្នុងមួយគីឡូក្រាម។

លោក អិល ឈិញ បញ្ជាក់ថា មានកត្តាមួយចំនួនធ្វើឱ្យតម្លៃដំឡូងមីធ្លាក់ចុះ ដូចជាអាកាស​ធាតុ​ក្ដៅខ្លាំង ធ្វើ​ឱ្យដំឡូងបាត់​​បង់ទិន្នផល និងគុណភាព។ ម្យ៉ាងទៀត ប្រទេស​នៅក្នុង​តំបន់​ដូច​ជា​ឥណ្ឌូនេស៊ី ថៃ វៀតណាម និងកម្ពុជាបង្កើនការដាំដុះដំឡូងមី ដែលធ្វើឱ្យលើសតម្រូវការ។

រដ្ឋាភិបាលកម្ពុជា កំពុងរៀបចំស្តង់ដាដំឡូងមីក្រៀម និងដំឡូងមីស្រស់ ដើម្បី​បង្កភាពងាយស្រួល​ដល់កិច្ចសម្រួលពាណិជ្ជ​កម្មទិញ-លក់ដំឡូងមី ការ​កំណត់​តម្លៃ​ ដោយផ្អែក​តាមស្តង់ដា ដែលបាន​ដាក់​ចេញតាម​ប្រភេទដំឡូងមីស្រស់ ឬក្រៀម និងទៅតាមកម្រិតជាតិម្សៅ។ គិតត្រឹមឆ្នាំ ២០២៥ កម្ពុជាមានផ្ទៃដីដាំដុះដំឡូងមីប្រមាណ ៧០ ម៉ឺន ហិកតា៕

អត្ថបទ៖ ឡេង ដេត