Barcelona នឹងបញ្ចេញកីឡាករ ៧ នាក់ ដើម្បីទុកកន្លែងចុះឈ្មោះឱ្យ Joan Garcia និង Williams

ក្លិបអ្នកមានបុណ្យ FC Barcelona គ្រោង​បញ្ចេញកីឡាករចំនួន ៧ នាក់នៅរដូវក្តៅនេះ ដើម្បីទុកកន្លែងក្នុងការចុះឈ្មោះកីឡាករចំណូលថ្មី គឺអ្នកចាំទី Joan Garcia និងកីឡាករគោលដៅ Nico Williams។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិបត្តិហិរញ្ញវត្ថុ នៅតែជាបញ្ហាចម្បងសម្រាប់ Barcelona ក្នុងការចុះឈ្មោះកីឡាករថ្មីចូលក្លិប ដោយសារពួកគេនៅមិនទាន់អាចបំពេញតាមលក្ខខណ្ឌហិរញ្ញវត្ថុរបស់ខ្លួនឱ្យត្រឹមត្រូវតាមច្បាប់របស់ La Liga ឡើយ។ ជាក់ស្តែងកាលពីរដូវកាលមុន ពួកគេធ្លាប់ជួបបញ្ហានេះម្តងហើយ ដោយខ្សែបម្រើប្រយុទ្ធ Dani Olmo ត្រូវពន្យារពេលដល់ពាក់កណ្តាលរដូវកាល ទើបអាចចុះឈ្មោះចូលក្លិបបានជាផ្លូវការ។

យោងតាមការចុះផ្សាយដោយ Mundo Deportivo បានឱ្យដឹងថា ក្លិបយក្ស អេស្ប៉ាញ នឹងបញ្ចេញកីឡាករក្រៅផែនការរបស់ខ្លួនចំនួន ៧ នាក់នៅរដូវក្តៅនេះ ដើម្បីដោះស្រាយហិរញ្ញវត្ថុ និងអាចចុះឈ្មោះកីឡាករថ្មីៗចូលក្លិបបាន។ កីឡាករទាំង ៧ នាក់នោះរួមមាន Ansu Fati, Pau Victor, Pablo Torre, Inaki Pena, Andreas Christensen, Oriol Romeu និង Marc-Andre ter Stegen។

គួរបញ្ជាក់ថា ថ្មីៗនេះក្រុមអ្នកមានបុណ្យទើបប្រកាសជាផ្លូវការអំពីការចុះកិច្ចសន្យាយកបានអ្នកចាំទីសញ្ជាតិ អេស្ប៉ាញ Joan Garcia ពី Espanyol ក្នុងតម្លៃ ២៩ លានដុល្លារអាមេរិក។ ចំណែកគោលដៅបន្ទាប់ ពួកគេកំពុងកៀកក្នុងការចុះកិច្ចសន្យាយកបាន Nico Williams ម្នាក់ទៀតពី Athletic Bilbao ស្របពេលភាគីទាំង ២ បានព្រមព្រៀងលក្ខខណ្ឌផ្ទាល់ខ្លួនជាមួយគ្នារួចរាល់ហើយ៕

ប្រែសម្រួល៖ សេម កុសល
ប្រភព៖ Sportskeeda