សម្តេចធិបតី បញ្ជាក់ជាថ្មីថា កម្ពុជាជាកន្លែងដែលអ្នកវិនិយោគទុកចិត្តបាន និងទទួលបានអត្ថប្រយោជន៍ជាច្រើន

ក្នុងរយៈពេល ៥​ ខែ ឆ្នាំ ២០២៥ គម្រោងវិនិយោគចំនួន ២៩០ គម្រោងត្រូវបានអនុវត្តម័តក្នុងទុនវិនិយោគ ៤ ២០០ លានដុល្លារអាមេរិក ធៀបរយៈពេលដូចគ្នាឆ្នាំ ២០២៤ កើនឡើង ១៣៧ គម្រោង ស្មើនឹង ៩០ % ខណៈទុនវិនិយោគកើនឡើង ១,៤ ពាន់លានដុល្លារ ស្មើនឹង ៥២%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ដែលត្រូវបាននាយករដ្ឋមន្រ្តី សម្តេចធិបតី ហ៊ុន ម៉ាណែត ថ្លែងឱ្យដឹង នាឱកាសអញ្ជើញជាធិបតីភាព ក្នុងពិធីអបអរសាទរការដាក់ដំណើរការ១ឆ្នាំ របស់សមាគមសហព័ន្ធអ្នកវិនិយោគកម្ពុជា និងពិសារភោជនាហាសាមគ្គី នារសៀលថ្ងៃទី២០ ខែមិថុនា ឆ្នាំ២០២៥នេះ។

ដោយឡែកសម្រាប់វិស័យទេសចរណ៍ ក្នុងរយៈពេល ៥ខែឆ្នាំនេះ ទេសចរណ៍អន្តរជាតិបានកើនប្រមាណ ១១,៧ % ធៀបនឹងរយៈពេលដូចគ្នាក្នុងឆ្នាំ ២០២៤។ សម្តេចបញ្ជាក់ថា៖«ទាំងអស់នេះបានបង្ហាញអំពីការទុកចិត្តទៅលើស្ថិរភាព និងលំនឹងសេដ្ឋកិច្ចរបស់កម្ពុជា សេដ្ឋកិច្ចសង្គម សន្តិសុខសង្គម ដែលធានាបាននូវសុខសន្តិភាព ក្រោមនយោបាយឈ្នះ ឈ្នះ»។

ក្នុងស្មារតីនេះ រាជរដ្ឋាភិបាលកម្ពុជា បានប្តេជ្ញាចិត្តថែទាំ ការពារថែរក្សាសន្តិភាពពេញលេញ ទោះក្នុងតម្លៃណាក៏ដោយ ។ សម្តេចធិបតីអះអាងថា៖« មិនតែប៉ុណ្ណោះ កម្ពុជា​ក៏ជាកន្លែងមួយដែលអ្នកវិនិយោគទាំងអស់នៅលើពិភពអាចរាប់ថា ទន្ទឹមនឹងការរក្សាបាននូវសុខសន្តិភាព និងស្ថិរភាព រាជរដ្ឋាភិបាលបន្តគិតគូរ និងយកចិត្តទុកដាក់លើការអភិវឌ្ឍន៍ហេដ្ឋារចនាសម្ព័ន្ធ ជាមួយនឹងការអភិវឌ្ឍន៍ធនធាន ពលកម្មវ័យក្មេង ប្រកបដោយភាពប្រកួតប្រជែងខ្ពស់ ដែលនឹងជួយគាំទ្រដល់ផលិតកម្មនានា បានយ៉ាងសកម្ម និងប្រសិទ្ធភាព»។

ក្នុង​នោះកម្ពុជាមានទីផ្សារអាស៊ាន ដែលមានប្រជាជនជាង ៦៦២ លាននាក់ ហើយកម្ពុជាក៏ជាទីផ្សារនៃបណ្តាប្រទេស ជាសមាជិក RCEP ដែលមានប្រជាជនសរុបប្រមាណ ២,៣ ពាន់លាននាក់។ ជាមួយនឹងបរិយាកាសដ៏អំណោយផលនេះ​ រាជរដ្ឋាភិបាលក៏បានខិតខំពង្រឹងនូវបរិយាកាស ធុរកិច្ចនៅកម្ពុជា តាមរយៈការដាក់ចេញនូវគោលនយោបាយជាច្រើន ដើម្បីធានាបាននូវស្ថិរភាព ក៏ដូចជាលំនឹងនៃការវិនិយោគ និងការការពារផលប្រយោជន៍ផ្សេងៗរបស់វិនិយោគិនទាំងក្នុង និងក្រៅប្រទេស។

ក្នុងន័យនេះ រាជរដ្ឋាភិបាលអាណត្តិទី ៧ បានដាក់ចេញនូវយុទ្ធសាស្រ្តជាច្រើនបន្ថែមទៀត ក្នុងការទាក់ទាញ និងថែរក្សាការវិនិយោគនៅកម្ពុជា។ ជាមួយគ្នានេះ សម្តេចធិបតី លើកទឹកចិត្តបណ្តាវិនិយោគិនជាតិ អន្តរជាតិ ជាពិសេសភ្ញៀវបរទេសថ្មីៗ សូមសម្រេចចិត្តជ្រើសរើសកម្ពុជាជាទីតាំងសម្រាប់កិច្ចសហការវិនិយោគ ពីព្រោះថារាជរដ្ឋាភិបាលកម្ពុជា តែងតែគិតគូរខ្ពស់ចំពោះវិនិយោគិនគ្រប់រូបដោយគ្មានការរើសអើង។ សម្តេចក៏បានសម្តែងការសាទរចំពោះភាពរីកចម្រើនរបស់បណ្តារោងចក្រ សហគ្រាស ដែលបានបណ្តាក់ទុននៅកម្ពុជា។

លើសពីនេះ សម្តេចធិបតី បញ្ជាក់ថា៖« ទោះបីជាកម្ពុជាកំពុងកើតមានបញ្ហាខ្លះជាមួយប្រទេសថៃ តាមព្រំដែនក៏ដោយ តែរដ្ឋាភិបាល នឹងខិតខំរកដំណោះស្រាយលើបញ្ហាទាំងនេះ ពិសេសគឺការធានានូវសន្តិភាព សន្តិសុខ និងស្ថិរភាពរវាងប្រទេសទាំងពីរ កម្ពុជា និងថៃ»៕