ព័ត៌មានអន្ដរជាតិ

វិស័យឯកជនថៃបារម្ភពីការពន្យារពេលចរចាពន្ធជាមួយអាមេរិក

បានផុស

៤ សប្តាហ៍ មុន

នៅ

ថ្ងៃពុធ ២៥ មិថុនា ២០២៥

ដោយ

វិស័យឯកជនថៃព្រួយបារម្ភព្រមានពីការពន្យារពេលចរចាពន្ធជាមួយសហរដ្ឋអាមេរិក ខណៈព្រមានពីការធ្លាក់ចុះយឺតយ៉ាវនៃការបញ្ជាទិញនាំចេញពីខាងក្រៅសម្រាប់ឆមាសទី២ឆ្នាំនេះ។ នេះបើតាមការចុះផ្សាយរបស់កាសែត The Nation កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សភាពាណិជ្ជកម្មថៃ (TCC) បានសម្តែងការព្រួយបារម្ភយ៉ាងខ្លាំងចំពោះការជាប់គាំងនៃការចរចាពាណិជ្ជកម្មជាមួយអាមេរិក ខណៈមកទល់ពេលនេះ វឌ្ឍនភាពនៃការចរចាពន្ធហាក់មានភាពយឺតយ៉ាវធៀបនឹងប្រទេសដទៃក្នុងតំបន់ ដូចជាវៀតណាម ដោយជំនួបផ្លូវការរវាងថ្នាក់មន្រ្តីជាន់ខ្ពស់ថៃ-អាមេរិក ត្រូវបានពន្យារពេលជាច្រើនដង។ យ៉ាងណាមិញ មានសេចក្ដីរាយការណ៍ថា ថៃបានរៀបចំកិច្ចប្រជុំចរចាជាមួយអាមេរិកកាលពីថ្ងៃពុធសប្ដាហ៍មុន ហើយបើតាមការចុះផ្សាយរបស់កាសែតបាងកកប៉ុស្តិ៍មុននោះមួយថ្ងៃ រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បានលើកឡើងថា ការចរចាពន្ធផ្លូវការជាមួយអាមេរិក នឹងចាប់ផ្ដើមនៅ «សប្ដាហ៍នេះ» ដោយថៃនឹងដាក់សំណើផ្លូវការចុងក្រោយ មុន «ការចរចាផ្លូវការចាប់ផ្ដើមជាលើកដំបូងតាមអនឡាញ»។

ក្នុងបរិបទនៃក្ដីបារម្ភពីផលប៉ះពាល់ពន្ធ ប្រធានសភាពាណិជ្ជកម្ម និងក្រុមប្រឹក្សាភិបាលពាណិជ្ជកម្មថៃ លោក Poj Aramwattananont បានគូសបញ្ជាក់ថា បរិមាណនៃការបញ្ជាទិញនាំចេញ បានបង្ហាញពីការធ្លាក់ចុះគួរឱ្យកត់សម្គាល់រួចហើយ ចាប់តាំងពីចុងខែឧសភា និងដើមខែមិថុនា។

លោក Poj បាននិយាយថា៖ «ប្រសិនបើគ្មានភាពច្បាស់លាស់ក្នុងការចរចាជាមួយសហរដ្ឋអាមេរិកក្នុងខែកក្កដា និងបន្ថែមពីនោះទេ វានឹងប៉ះពាល់យ៉ាងខ្លាំងដល់តួលេខនៃការនាំចេញសម្រាប់ឆមាសទី ២ នៃឆ្នាំនេះ»។ លោកបានជំរុញឱ្យក្រុមចរចាថៃ ធ្វើការដោយឧស្សាហ៍ព្យាយាម ដើម្បីទទួលបានកិច្ចព្រមព្រៀងពាណិជ្ជកម្មដោយស្មើភាពសម្រាប់ប្រទេសទាំង២។

គួរគូសបញ្ជាក់ថា ថៃកំពុងប្រឈមនឹងហានិភ័យនៃពន្ធគយបដិការ ៣៦ ភាគរយ ពីសហរដ្ឋអាមេរិក ប្រសិនបើការចរចាបរាជ័យមុនថ្ងៃទី ៩ កក្កដា ដែលជាពេលផុតកំណត់ពន្យារពេលអនុវត្តពន្ធបដិការ។ យ៉ាងណាមិញ មន្រ្តីថៃបានសម្ដែងសុទិដ្ឋិនិយមនាពេលកន្លងមកថៃ ការចរចាជាមួយអាមេរិកអាចទម្លាក់អត្រាពន្ធនោះមកត្រឹម ១០ ភាគរយ ដែលជាអត្រាពន្ធមូលដ្ឋាន ហើយថា ការចរចាអាចនឹងបន្តអូសបន្លាយហួសថ្ងៃទី ៩ កក្កដា៕