ព័ត៌មានជាតិ

នាយករដ្ឋមន្ត្រីសិង្ហបុរីនឹងបំពេញទស្សនកិច្ចផ្លូវការនៅកម្ពុជាក្នុងសប្ដាហ៍ក្រោយ

បានផុស

២៤ វិនាទី មុន

នៅ

ថ្ងៃសៅរ៍ ២៨ មិថុនា ២០២៥

ដោយ

នាយករដ្ឋមន្ត្រីប្រទេសសិង្ហបុរី លោក Lawrence Wong នឹងបំពេញទស្សនកិច្ចផ្លូវការនៅកម្ពុជានៅថ្ងៃទី២ ខែកក្កដា ខាងមុខ ស្របពេលនឹងការប្រារព្ធខួប៦០ឆ្នាំនៃទំនាក់ទំនងការទូតកម្ពុជា សិង្ហបុរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីប្រកាសព័ត៌មានចុះថ្ងៃទី២៨ ខែមិថុនា ក្រសួងការបរទេសកម្ពុជាឱ្យដឹងថាក្នុងដំណើរទស្សនកិច្ចនេះលោក Lawrence Wong នឹងមានព្រះរាជសាវនាការជាមួយ ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង ព្រមទាំងមានជំនួបសម្តែងការគួរសមជាមួយប្រធានព្រឹទ្ធសភា សម្ដេចតេជោ ហ៊ុន សែន និងនាយករដ្ឋមន្ត្រី សម្ដេចធិបតី ហ៊ុន ម៉ាណែត ផងដែរ។

ក្នុងសេចក្ដីប្រកាសនោះបន្ថែមថា៖ «នាយករដ្ឋមន្ត្រីទាំងពីរនឹងធ្វើការពិភាក្សាស៊ីជម្រៅបន្ថែមទៀត លើទំនាក់ទំនងដ៏យូរអង្វែង និងកិច្ចសហប្រតិបត្តិការ ដែលមានផលប្រយោជន៍ទៅវិញទៅមក រវាងកម្ពុជា និង សិង្ហបុរី»។

លោក Lawrence Wong គឺជានាយករដ្ឋមន្ត្រីទី៤របស់ប្រទេសសិង្ហបុរីកាន់អំណាចពីឆ្នាំ២០២៤ និងត្រូវបានបន្តតណែងជានាយករដ្ឋមន្ត្រីបន្តទៀតបន្ទាប់ពីទទួលជ័យជម្នះលើការបោះឆ្នោតសភាកាលពីខែឧសភា កន្លងទៅផងដែរ។

ដំណើរទស្សនកិច្ចនាយករដ្ឋមន្ត្រីសិង្ហបុរីនេះកើតឡើងស្របពេលជាមួយនឹងការប្រារព្ធខួបលើកទី៦០ នៃការបង្កើត ទំនាក់ទំនងការទូតរវាងកម្ពុជា និងសិង្ហបុរី។ ប្រទេសសិង្ហបុរី និងកម្ពុជាបានបង្កើតទំនាក់ទំនងការទូតកាលពីថ្ងៃទី១៥ ខែកញ្ញា ឆ្នាំ១៩៦៥ ១ខែបន្ទាប់ពីប្រទេសសិង្ហបុរីទទួលបានឯករាជ្យពីម៉ាឡេស៊ី៕

អត្ថបទដោយ ហ៊ុន សិរីវឌ្ឍន៍