អតីតទីប្រឹក្សាសម្តេចតេជោ ប្រតិកម្មចំពោះ​គ្រឹះស្ថានបោះពុម្ពថៃ (នគរណាខន)

សមាជិកក្រុមប្រឹក្សាភិបាលសមាគមអ្នកនិពន្ធខ្មែរ និងជាអតីតទីប្រឹក្សាផ្ទាល់សម្តេចតេជោ ហ៊ុន សែន អតីតនាយករដ្ឋមន្រ្តីកម្ពុជា លោក ពៅ សុខ នៅថ្ងៃទី២៩ ខែមិថុនា ឆ្នាំ២០២៥នេះ បានប្រតិកម្មនិងស្នើឱ្យមានការកែតម្រូវ ចំពោះការលើកឡើងរបស់​គ្រឹះស្ថានបោះពុម្ពថៃ (នគរណាខន) ដែលបានលើកឡើងថា ហេតុអ្វីសម្តេច ហ៊ុន សែន មានប្រសាសន៍​​នៅថ្ងៃទី២៧ ខែមិថុនាឆ្នាំ២០២៥ ពីខេត្តព្រះវិហារថា សម្តេចមិនមានជំពាក់គុណប្រទេសថៃ?

លោក ពៅ សុខ បាន​ពន្យល់ថា សម្តេចតេជោលោកមានប្រសាសន៍រួចហើយ ចំពោះជាតិ និងជាតិ សម្តេចលោកសុំមិននិយាយទេ។ ប៉ុន្តែចំពោះបុគ្គល និងបុគ្គល គឺសម្តេចលោកមិនជំពាក់គុណអ្នកណាម្នាក់ឡើយ ហើយការលើកឡើងរបស់សម្តេចតេជោ គឺផ្តោតតែលើត្រកូល ស៊ីណាវ៉ាត្រា មានអតីតនាយករដ្ឋមន្រ្តីថៃលោក ថាក់ស៊ីន អ្នកស្រី យីងឡាក់ និងលោកស្រីផែ ថងថាន នាយករដ្ឋមន្រ្តីថៃបច្ចុប្បន្ន ដែលរមិលគុណសម្តេចតែប៉ុណ្ណោះ។

ក្រៅពីនោះ សម្តេចតេជោ ក៏លោកមានប្រសាសន៍កោតសរសើរមេដឹកនាំថៃចំៗឈ្មោះផងដែរ។ ការលើកឡើងដែល​ថា សម្តេចតេជោបំភ្លេចគុណឬមិនរម្លឹកពីគុណបំណាច់របស់ថៃ គឺជារឿងមិនត្រឹមត្រូវ និងគួរឱ្យសោកស្តាយ។

លោក ពៅ សុខ មានប្រសាសន៍ថា ការដែល​គ្រឹះស្ថានបោះពុម្ពថៃ (នគរណាខន) លើកឡើងថា សម្តេច ហ៊ុន សែន មិនបាន​លើកឡើងពីគុណសម្បត្តិរបស់ថៃចំពោះកម្ពុជា គឺជារឿងខុសឆ្គង ដូច្នេះលោកស្នើឱ្យសមាគមអ្នកនិពន្ធថៃ ស្តាប់ប្រសាសន៍​សម្តេចតេជោឱ្យបានច្បាស់និងកែតម្រូវ នូវអត្ថបទរបស់ខ្លួនឡើងវិញ ដើម្បីចៀសវាងការភ័ន្តច្រឡំណាមួយទៅថ្ងៃក្រោយ។

លោក ពៅ សុខ លើកឡើងទៀតថា សមាគមអ្នកនិពន្ធខ្មែរ ឬក៏ប្រជាជនកម្ពុជាពិតជាមិនចង់មានបញ្ហាជាមួយប្រទេសជិត​ខាងទេ គឺកម្ពុជាចង់បានតែសេចក្តីសុខ សុខសន្តិភាព និងការអភិវឌ្ឍជាមួយប្រទេសជិតខាង ប៉ុន្តែប្រទេសជិតខាងខ្លះតែងតែបំពានកម្ពុជា។ ដូចកាលពីទសវត្សរ៍១៩៧០ ខណៈកម្ពុជាកំពុងមានវិបត្តិផ្ទៃក្នុង (សង្រ្គាម) គឺថៃបានលួចហោះចូលមកទម្លាក់គ្រាប់បែកនៅតំបន់ព្រំដែនខេត្តព្រះវិហារ និងសៀមរាប រហូតធ្វើឱ្យសមាគមអ្នកនិពន្ធខ្មែរសម័យកាលនោះ ចេញសេចក្តីថ្លែងការណ៍ថ្កោលទោសថៃយ៉ាងខ្លាំងក្លា។

ប៉ុន្តែសម្រាប់សម័យកាលនេះ ដើម្បីសុខដុមជាតិសាសន៍ និងប្រទេសជិតខាង សមាគមអ្នកនិពន្ធខ្មែរមិនបានចេញសេចក្តីថ្លែងការណ៍ថ្កោលទោសថៃដែលលបចូលមកឈ្លានពាន និងបាញ់សម្លាប់ទាហាន​កម្ពុជាកាលពីថ្ងៃទី២៨ ខែឧសភា ឆ្នាំ២០២៥នោះទេ។ ជាថ្មី​ម្តង​ទៀត លោក ពៅ សុខ ស្នើ​ឱ្យ​គ្រឹះស្ថានបោះពុម្ពថៃ (នគរណាខន) ពិនិត្យពីសកម្មភាពរបស់ខ្លួនឡើងវិញ ដើម្បីរក្សាមិត្តភាពនិងសន្តិភាពសំណេរក្នុងតំបន់៕