លោក ពៅ សុខ ៖ សម្តេចតេជោ ហ៊ុន សែន គឺជាកំពូលមនុស្សយ៉ាងពិតប្រាកដ

លោក ពៅ សុខ ដែលជាសមាជិកក្រុមប្រឹក្សាភិបាលសមាគមអ្នកនិពន្ធខ្មែរ និងជាអ្នកសរសេរសៀវភៅអំពីថ្នាក់ដឹកនាំដ៏លេចធ្លោម្នាក់ បានរៀបរាប់នៅលើបណ្តាញសង្គមហ្វេសប៊ុករបស់លោកនៅថ្ងៃទី១១ ខែកក្កដា ឆ្នាំ២០២៤នេះថា តាមរយៈការស្រាវជ្រាវរបស់លោកដោយយោងទៅលើទស្សនវិទូចិន ស៊ុន អ៊ូ ឬស៊ុន ជឺ គឺថា សម្តេច ហ៊ុន សែន គឺជាកំពូលមេទ័ព និងជាកំពូល​មនុស្ស​យ៉ាង​ពិតប្រាកដ។

កំពូលទស្សនវិទូចិន ស៊ុន អ៊ូ ឬស៊ុន ជឺ បាននិយាយថា អ្នកឈ្នះសង្រ្គាម ឬយកសង្រ្គាមបញ្ចប់សង្រ្គាម មិនមែន​ជា​កំពូលមនុស្ស ឬកំពូលមេទ័ពទេ។ តែអ្នកឈ្នះ ឬបញ្ចប់សង្រ្គាម ដោយមិនបាច់​ច្បាំងទើបជាកំពូលមេទ័ព ឬ​កំពូល​មនុស្សពិតប្រាកដ។ តាមការកត់ត្រារបស់លោក ពៅ សុខ  សម្តេច ហ៊ុន សែន បានឈ្នះលើសមរភូមិ​ប្រយុទ្ធដោយ​មិនបាច់ច្បាំងចំនួន៣លើក។

លោក ពៅ សុខ បានរៀបរាប់ថា ក្នុងដំណាក់កាលសម័យសង្រ្គាម៥ឆ្នាំ គឺនៅអំឡុងចុងខែមិថុនា ឆ្នាំ១៩៧០ បន្ទាប់​ពីបាន​សិក្សាពីយុទ្ធសាស្រ្តសង្រ្គាម និងចម្បាំងបានប្រមាណជាង២សប្តាហ៍ សម្តេច ហ៊ុន សែន ត្រូវបានមេ​បញ្ជាការ បញ្ជា​ឱ្យដឹក​នាំកម្លាំងជាង១០នាក់ឡើងទៅប្រយុទ្ធនៅសមរភូមិស្នួល ដែលជាសមរភូមិលើកដំបូង លើក​ទី១ក្នុង​ឆាកជីវិតរបស់​សម្តេច​។ សមរភូមិនេះ សម្តេច ហ៊ុន សែន បានយកឈ្នះសត្រូវ គឺកងទ័ពសាធារណរដ្ឋខ្មែររបស់​លោក លន់ នល់ ដោយ​មិន​បាច់​ច្បាំង ដោយមិនបាច់ប្រយុទ្ធ ព្រោះតែពួកបានសុំចុះចូលជាមួយសម្តេច នៅពេល​រសៀល។ ទោះយ៉ាង​ណា កាលពី​ម៉ោ​ង​៨​ព្រឹ​ក ពេលសម្តេច ចាប់ផ្តើមចងមេក្រូ ដើម្បីនិយាយឃោសនាទៅកាន់​កងទ័ព​សាធារណរដ្ឋខ្មែរ មេក្រូរបស់សម្តេច ត្រូវ​បាន​គេ​បាញ់ឱ្យធ្លាក់ពីលើដើមកៅស៊ូ។

លោក ពៅ សុខ បានបញ្ជាក់ទៀតថា សមរភូមិប្រយុទ្ធទី២ ដែលសម្តេចទទួលបានជោគជ័យដោយមិនបាច់ច្បាំងដែរនោះ គឺសមរភូមិកោះទ្រុង ស្ថិតនៅចំពីមុខទីរួមខេត្តក្រចេះបច្ចុប្បន្ន ហើយទម្រង់នៃការឈ្នះសង្រ្គាមនេះ មាន​សភាពដូចគ្នា គឺការសុំចុះចូលរបស់កងទ័ពសាធារណរដ្ឋខ្មែរ។

លោក ពៅ សុខ បានសង្កត់ធ្ងន់ថា រឿងដែលអស្ចារ្យចុងក្រោយបង្អស់មួយទៀត ដែលមនុស្សក្នុងលោក​ពិបាកនឹង​ធ្វើបាននោះ គឺសម្តេច ហ៊ុន សែន បាបញ្ចប់សង្រ្គាមជាស្ថាពរ១០០%នៅកម្ពុជា ដោយមិនបាច់ច្បាំង ដោយគ្មានកា​រ​ចំណាយអាវុធសូម្បីមួយគ្រាប់ ឬការបង្ហូរឈាមសូម្បីមួយតំណក់ តាមរយៈយុទ្ធសាស្រ្តឌីហ្វីដ និងនយោបាយឈ្នះ ឈ្នះ។ លោក ពៅ សុខ អះអាងថា នេះហើយដែលអ្នកប្រាជ្ញចិន ស៊ុន អ៊ូ ឬស៊ុន ជឺ និយាយថា ជាកំពូលមេទ័ព កំពូល​មនុស្ស​នោះ៕