លោក ពៅ សុខ៖ រៀនសូត្រពីសម្តេច ហ៊ុន សែន នឹងក្លាយជាអ្នកយុទ្ធសាស្រ្តដ៏ឆ្នើម

ថ្លែងប្រាប់អ្នកសារព័ត៌មាន នៅថ្ងៃទី១៣ ខែឧសភា ឆ្នាំ២០២៥នេះ លោក ពៅ សុខ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ និងជាទីប្រឹក្សា​ផ្ទាល់​សម្តេចនាយក​រដ្ឋមន្រ្តី ហ៊ុន ម៉ាណែត ដែលជាអ្នករៀបរៀងសៀវភៅស្តីពី សម្តេច​តេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចធិបតី ហ៊ុន ម៉ាណែត បានលើកឡើងថា ខណៈពេលនេះ សៀវភៅ «អ្នកយុទ្ធសាស្រ្ត​វ័យ​ក្មេង​នៅអាស៊ី» ភាគ២ ភាគ៣ និងភាគ៤ បានបញ្ចប់ការរៀបរៀងជាស្ថាពរហើយ  ហើយនឹងត្រូវបានបោះពុម្ពផ្សាយជាសាធារណៈ​ក្នុង​ពេលឆាប់ៗនេះ។

លោក ពៅ សុខ បានបញ្ជាក់ថា ប្រសិនបើយុវជន ឬអ្នកនយោបាយបន្តវេន ចង់ក្លាយជាអ្នកនយោបាយ អ្នកការទូត អ្នកសេដ្ឋកិច្ច អ្នកគ្រប់​គ្រង និងជាអ្នកយុទ្ធសាស្រ្តដ៏ឆ្នើម គប្បីសិក្សារៀនសូត្រឱ្យបានច្រើនបំផុតពីសម្តេចតេជោ ហ៊ុន សែន ប្រ​ធានគណបក្សប្រជាជនកម្ពុជា អតី​តនាយករដ្ឋមន្រ្តីនៃកម្ពុជា ដែលប្ចុចប្បន្នសម្តេច ជាប្រធាន​ព្រឹទ្ធ​សភា និង​ជា​ប្រធានក្រុមឧត្តមប្រឹក្សា​ព្រះ​មហា​ក្សត្រកម្ពុជា។

លោក ពៅ សុខ បញ្ជាក់ទៀតថា នៅក្នុងសៀវភៅ «អ្នកុទ្ធសាស្រ្តវ័យក្មេងនៅអាស៊ី» ទាំង៤ភាគ ដែលមានកម្រាស់ជិត ២ពាន់ទំព័រ ដែល​លោកចំណាយពេលរៀបរៀងឡើងវិញជាង៣ឆ្នាំមកនេះ មានរៀបរាប់ទាំងអស់អំពីភាពបន់បែន ភាពប៉ិនប្រសប់ដ៏​ឈ្លាសវៃនៃយុទ្ធសាស្រ្តនានា ទាំងនយោបាយការទូត និងយោធា ដែលសម្តេចតេជោ ហ៊ុន សែន ក្នុងឋានៈជាអ្នកដឹក​នាំប្រ​ទេស​ដ៏វ័យ​ក្មេងជាងគេនៅលើពិភពលោក នាគ្រានោះ បានប្រើប្រាស់ក្នុងការចរចាស្វែងរកសន្តិភាព ជាមួយសម្តេចព្រះនរោត្តម សីហនុ ព្រះបរមរតនកោដ្ឋ ក៏ដូចជាត្រីភាគី។

លោក ពៅ សុខ ឱ្យដឹងទៀតថា ប្រសិនបើអ្នកសិក្សា ឬអ្នកនយោបាយទាំងឡាយបានអានសៀវភៅ«អ្នកយុទ្ធសាស្រ្តវ័យ​ក្មេងនៅអាស៊ី» ទាំង៤​ភាគជាប់គ្នា នោះពួកគេនឹងអាចក្លាយជាអ្នកនាំពាក្យ អ្នកការទូត អ្នកនយោបាយ អ្នកសេដ្ឋកិច្ច និង​អ្នក​យុទ្ធសាស្រ្តចំណានដូចសម្តេចតេជោដែរ ឬហោចណាស់ក៏បានជ្រាបខ្លះនូវយុទ្ធសាស្រ្តមួយចំនួន ដែលសម្តេចតេជោ បាន​ប្រើ​ប្រាស់ ក្នុងការអូសទាញគូបដិបក្ខ ឱ្យយល់ស្របតាមគំនិតផ្តួចផ្តើម និងទស្សនរបស់សម្តេច។

លោក បានលើកឡើងថា នៅពេលបានអានសៀវភៅ មិត្តអ្នកអានក៏ប្រហែលជាអាចក្លាយជាអ្នកឃោសនា ទាំងផ្នែកនយោបាយ ឬការធ្វើជំនួញដ៏មានទេពកោសល្យ និងប៉ិនប្រសប់ ព្រោះដំណាក់កាលចរចាសន្តិភាព ចាប់ពីថ្ងៃទី០២ ខែធ្នូ ឆ្នាំ១៩៨៧ រហូតដល់ថ្ងៃ២៩ ខែធ្នូ ឆ្នាំ១៩៩៨ រយៈពេល១១ឆ្នាំនេះ ទាំងប្រៃ ល្វីង ជូរចត់ និងផ្អែមល្ហែម គឺសម្តេចតេជោ បានឆ្លងកាត់​ទាំង​អស់។ ដំណាក់កាលចរចាសន្តិភាព ពេលខ្លះ សម្តេច ក៏ប្រើប្រាស់វិធីសាស្រ្តរឹងត្អឹងបំផុត គឺការពារទស្សនៈរបស់សម្តេច ក៏ដូចជា​គណបក្សប្រជាជនកម្ពុជា ពេលខ្លះក៏បត់បែន ពេលខ្លះក៏​សម្រប​សម្រួល ដើម្បីឧត្តមផលប្រយោជន៍ជាតិ ហើយសម្រាប់​អ្នក​នយោបាយបច្ចុប្បន្ន ប្រហែលមិនមែនជាដៃគូយុទ្ធសាស្រ្ត នៃវិថី​នយោ​បាយជាមួយសម្តេចតេជោ ហ៊ុន សែន ឡើយ។

លោកសង្កត់ធ្ងន់ថា សៀវភៅខាងលើនេះពុំមែនជាការសរសេរឡើងវិញថ្មីទេ ប៉ុន្ដែគ្រាន់តែជាការរៀបរៀងឡើង​វិញបន្តពី​ឯកសារ​​ដើមទាំងស្រុងដែលរក្សាទុកដោយលោក កែវ បាភ្នំ ហើយក៏មិនមែនជាការអួតអាងថា លោក ជាអ្នករៀបរៀងដ៏ល្បី និងជា​ការ​ផ្សព្វផ្សាយ ដើម្បីលក់សៀវភៅដែរ៕