ព័ត៌មានជាតិ

លោកស្រី មិថុនា ភូថង ស្នើភាគីពាក់ព័ន្ធចូលរួមបង្កើនការយល់ដឹង និងទប់ស្កាត់ប្រឆាំងព័ត៌មានក្លែងក្លាយ

បានផុស

១០ ខែ មុន

នៅ

ថ្ងៃអង្គារ ១ កក្កដា ២០២៥

ដោយ

លោកស្រី មិថុនា ភូថង អភិបាលខេត្តកោះកុង នៅថ្ងៃទី ១ ខែកក្កដា ឆ្នាំ ២០២៥ នេះ បានស្នើដល់គ្រប់ភាគីពាក់ព័ន្ធទាំងអស់ នៅមូលដ្ឋានខេត្ត គប្បីចូលរួមបង្កើនការយល់ដឹងឱ្យកាន់តែច្រើន និងទប់ស្កាត់ប្រឆាំងគ្រប់ព័ត៌មានក្លែងក្លាយដែលកើតមាន។

ការស្នើឡើងយ៉ាងដូច្នេះរបស់ លោកស្រីអភិបាលខេត្តកោះកុង ធ្វើឡើងក្នុងយុទ្ធនាការនិយាយថាទេចំពោះព័ត៌មានក្លែងក្លាយ ដែលមានកងកម្លាំងប្រដាប់អាវុធ រដ្ឋបាលក្រុងស្រុក ពលរដ្ឋ និងយុវជនជិត ៤០០ នាក់ ចូលរួម។

លោកស្រីអភិបាលខេត្ត សង្កត់ធ្ងន់ថា ការផ្សព្វផ្សាយព័ត៌មានមិនពិត ដោយប្រើប្រាស់ប្រព័ន្ធឌីជីថលថ្មីបានបង្កើតឱ្យមានការផ្ទុះឡើងនូវអំពើហិង្សា ការស្អប់ខ្ពើម ការរើសអើង ការមាក់ងាយ ដែលធ្វើឱ្យមានផលប៉ះពាល់ទៅដល់ ផ្នែកសន្តិសុខ សណ្ដាប់ធ្នាប់ សង្គម សេដ្ឋកិច្ច នយោបាយ និងប៉ះពាល់ដល់ទំនាក់ទំនងសង្គម។

លោកស្រី មិថុនា ភូថង មើលឃើញថា នៅរយៈពេលចុងក្រោយនេះ នៅលើពិភពលោកបាននិងកំពុងប្រឈមនឹងបញ្ហាភូមិសាស្ត្រនយោបាយ បញ្ហាភូមិសាស្ត្រសេដ្ឋកិច្ច ទន្ទឹមនេះក៏ត្រូវប្រឈមមុខចំពោះការបញ្ចេញនូវព័ត៌មានក្លែងក្លាយដែលប៉ះពាល់ដល់កិច្ចប្រឹងប្រែងការពារសន្តិភាព និងស្ថិរភាពពិភពលោកផងដែរ។ លើសពីនេះទៅទៀត បញ្ញាសិប្បនិមិត្ត (AI) ត្រូវបានគេយកទៅប្រើប្រាស់បង្កើតនូវព័ត៌មានដែលមានចរិតបំភាន់ និង បំពុលសង្គម ព្រមទាំងងាយស្រួលបោកប្រាស់ប្រជាពលរដ្ឋដែលមិនសូវចេះប្រើប្រាស់បច្ចេកវិទ្យាបែបទំនើប ឬយើងហៅថា«អ្នកអក្ខរកម្មព័ត៌មាន»។

ក្នុងនាមថ្នាក់ដឹកនាំរដ្ឋបាលខេត្ត លោកស្រី មិថុនា ភូថង ក៏សូមអំពាវនាវដល់អ្នកបង្កើតមាតិកា អ្នកសារព័ត៌មាន ពិសេសក្រុម MMO (Make Money Online) កុំព្រោះតែប្រយោជន៍ខ្លួន កុំព្រោះតែលុយ បង្កើតនូវព័ត៌មានក្លែងក្លាយដើម្បីបានប្រយោជន៍ពីការផ្សាយនោះ ធ្វើឱ្យប្រាសចាកពីក្រមសីលធម៌ និងវិជ្ជាជីវៈរបស់ខ្លួន និងសូមស្នើឱ្យអ្នកសារព័ត៌មាន អ្នកបង្កើតមាតិកាសង្គម ប្រកាន់ខ្ជាប់នូវសីលធម៌វិជ្ជាជីវៈឱ្យបានល្អ គោរពនូវតម្លៃសង្គម កិត្តិយសជាតិ និងសីលធម៌។

ទន្ទឹមនោះ លោកស្រីអភិបាលខេត្ត បានថ្លែងអំណរគុណចំពោះក្រុមការងារអ្នកនាំពាក្យរបស់រដ្ឋបាលខេត្តកោះកុង ក្រុមការងារព័ត៌មានវិទ្យារដ្ឋបាលខេត្ត ក្រុង ស្រុក និងតាមបណ្តាមន្ទីរអង្គភាពជុំវិញខេត្ត និងអ្នកសារព័ត៌មានក្នុងខេត្តទាំងអស់ ដែលបានបំពេញតួនាទីភារកិច្ចរបស់ខ្លួនបានយ៉ាងល្អប្រសើរ ឆ្លើយតបបានទាន់ពេលវេលានៅពេលទទួលបាននូវសំនួរ ចម្ងល់ សំណូមនានារបស់ប្រជាពលរដ្ឋដែលបានលើកឡើងក្នុងផេកហ្វេសប៊ុក របស់រដ្ឋបាលខេត្តកោះកុង ឬផេកហ្វេសប៊ុករបស់លោកស្រីផ្ទាល់។

បន្ថែមលើនេះទៀត លោកស្រីអភិបាលខេត្តកោះកុង បានកោតសរសើរចំពោះអ្នកសារព័ត៌មាន និងអ្នកមានឥទ្ធិពលក្នុងបណ្ដាញសង្គម ដែលបានផលិតមាតិកាផ្សព្វផ្សាយអំពីសមិទ្ធផលនានាដែលរដ្ឋបាលខេត្តសម្រេចបាននាពេលកន្លងមក និងសក្ដានុពល នៃតំបន់ទេសចរណ៍នានាក្នុងខេត្ត និងសូមលើកទឹកចិត្តដល់អ្នកសារព័ត៌មាន និងអ្នកផលិតមាតិកាផ្សព្វផ្សាយក្នុងបណ្តាញសង្គមទាំងអស់ បន្តផលិតមាតិកាផ្សព្វផ្សាយអំពីសក្ដានុពលសំខាន់ៗ នៃតំបន់ទេសចរណ៍ក្នុងខេត្តកោះកុង ឱ្យបានកាន់តែច្រើនបន្ថែមទៀត សម្រាប់ទាក់ទាញអ្នកទេសចរឱ្យមកលេងកម្សាន្តនៅតាមតំបន់ទេសចរណ៍នានាទូទាំងខេត្តកោះកុង និង ចូលរួមជាមួយរាជរដ្ឋាភិបាលក្នុងការគាំទ្រដល់គោលនយោបាយលើកកម្ពស់វិស័យទេសចរណ៍ និង ចូលរួមលើកកម្ពស់ជីវភាពប្រជាពលរដ្ឋក្នុងមូលដ្ឋានផងដែរ។

ដោយឡែក លោក មុំ ម៉ាលិកា ប្រធានមន្ទីរព័ត៌មានខេត្តកោះកុង លើកឡើងថា យុទ្ធនាការនេះ នឹងត្រូវបានអនុវត្តទូទាំងប្រទេសកម្ពុជាក្នុងរយៈពេល ១២ ខែ គឺផ្តើមពីថ្ងៃទី ១ ខែមេសា ឆ្នាំ ២០២៥ ដល់ថ្ងៃទី ៣១ ខែមីនា ឆ្នាំ ២០២៦ ហើយចាំបាច់មានការចូលរួមពីគ្រប់ភាគីពាក់ព័ន្ធទាំងអស់ ក្នុងគោលបំណងដើម្បីលើកកម្ពស់ការយល់ដឹងជាសាធារណៈអំពីគ្រោះថ្នាក់ និងផលវិបាក នៃព័ត៌មានក្លែងក្លាយ។

លោកប្រធានមន្ទីរព័ត៌មានខេត្ត បានបន្ថែមទៀតថា ការបញ្ជ្រាបការយល់ដឹងដល់ប្រជាពលរដ្ឋក្នុងសហគមន៍ និងពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយ ជាកត្តាដ៏សំខាន់មួយ ដើម្បីផ្លាស់ប្ដូរឥរិយាបថរបស់ពលរដ្ឋដែលជាអ្នកប្រើប្រាស់បណ្ដាញទំនាក់ទំនងសង្គម និងប្រព័ន្ធផ្សព្វផ្សាយទំនើបឱ្យមកចូលរួមទប់ស្កាត់ការរីកសាយភាយនូវព័ត៌មានក្លែងក្លាយ។ ក្នុងបរិបទនេះ លោកប្រធានមន្ទីរព័ត៌មានខេត្ត ជឿជាក់ថា តាមរយៈយុទ្ធនាការនេះ នឹងផ្តល់ប្រយោជន៍យ៉ាងសំខាន់ដល់អ្នកពាក់ព័ន្ធទាំងឡាយ ហើយចូលរួមតាមដានទប់ស្កាត់ព័ត៌មានក្លែងក្លាយប្រកបដោយការទទួលខុសត្រូវខ្ពស់ ផ្សព្វផ្សាយព័ត៌មានដែលពិតប្រាកដ ចៀសវាងបំភ្លៃការនាំឱ្យមានទោសទណ្ឌប្រការណាមួយ៕

អត្ថបទ ៖ សិរីវឌ្ឍនៈ