ព័ត៌មានអន្ដរជាតិ

លោក ត្រាំ ប្រាប់ថា ជំនួបតាមទូរសព្ទជាមួយ ពូទីន «គ្មានបានសាច់ការអីទេ»

បានផុស

១០ ខែ មុន

នៅ

ថ្ងៃសុក្រ ៤ កក្កដា ២០២៥

ដោយ

Chheang

ប្រធានាធិបតីអាមេរិក ដូណាល់ ត្រាំ បានសម្តែងការខកចិត្តបន្ទាប់ពីកិច្ចសន្ទនាតាមទូរសព្ទរយៈពេលជិតមួយម៉ោងជាមួយសមភាគីស្ស៊ីលោក វ៉្លាឌីមៀរ ពូទីន ដោយនិយាយថា វា«គ្មានបានសាច់ការអ្វីឡើយ» ក្នុងការឆ្ពោះទៅរកបទឈប់បាញ់នៅអ៊ុយក្រែន។

លោក ដូណាល់ ត្រាំ និងលោក វ៉្លាឌីមៀរ ពូទីន (រូបថត៖ AP)

លោក ត្រាំ បានលើកឡើងកាលពីថ្ងៃព្រហស្បតិ៍ទី៣ខែកក្កដាថា «វាជាការហៅទូរសព្ទដ៏យូរណាស់… ខ្ញុំមិនសប្បាយចិត្តនឹងរឿងនោះទេ។ ខ្ញុំមិនទទួលបានលទ្ធផលអ្វីទាល់តែសោះជាមួយគាត់»។ លោក ត្រាំ បានជំរុញឲ្យមេដឹកនាំរុស្ស៊ីទទួលយកបទឈប់បាញ់ដោយគ្មានលក្ខខណ្ឌ ដែលសម្របសម្រួលដោយអាមេរិក ប៉ុន្តែមិនបានផលនោះឡើយ។

ការហៅទូរសព្ទរវាងមេដឹកនាំទាំងពីរ គឺជាកិច្ចសន្ទនាជាសាធារណៈលើកទី៦ គិតចាប់តាំងពីខែមករាមក។ លោក ត្រាំ និងលោក ពូទីន ក៏បានពិភាក្សាគ្នាលើបញ្ហាផ្សេងផងដែរក្រៅពីអ៊ុយក្រែន ដូចជា ស្ថានភាពនៅប្រទេសអ៊ីរ៉ង់ និងភូមិសាស្ត្រនយោបាយជាច្រើនទៀត ព្រមទាំងពាណិជ្ជកម្មរវាងប្រជាជាតិទាំងពីរ។

ក្រោយការហៅទូរសព្ទនេះ អ្នកនាំពាក្យវិមានក្រឹមឡាំងលោក Yuri Ushakov បានប្រាប់ថា លោក ពូទីន និយាយទៅកាន់លោក ត្រាំ ថា ទីក្រុងមូស្គូនឹងបោះបង់ចោលគោលដៅសង្គ្រាមរបស់ខ្លួននៅអ៊ុយក្រែនទេ ប៉ុន្តែក៏បើកចំហសម្រាប់កិច្ចចរចាជាបន្តបន្ទាប់ផងដែរ។

ចំណែកឯរឿងផ្អាកជំនួយអាមេរិកចំពោះអ៊ុយក្រែន គេមិនទាន់ដឹងថា លោក ត្រាំ និងលោក ពូទីន បានជជែកគ្នាអំពីបញ្ហានេះដែរឬក៏អត់។ យ៉ាងណា បើតាមការអះអាងរបស់លោក ត្រាំ អាមេរិកនៅតែផ្ដល់ជំនួយយោធាដល់អ៊ុយក្រែនដដែល គ្រាន់តែកាត់បន្ថយខ្លះ ពោលគឺផ្ដល់តែអាវុធសំខាន់ៗដែលចាំបាច់ប៉ុណ្ណោះ៕

ដោយ៖ ឈាង

ចុចអាន៖ ត្រាំ បញ្ជាក់ថា អាមេរិកនៅតែជួយអ៊ុយក្រែនដដែល ប៉ុន្តែជួយតែអាវុធសំខាន់ៗមួយចំនួនប៉ុណ្ណោះ