ពីដៃកាន់មេក្រូបង្អួតសំនៀង! វី ឌីណែត ទម្លាយរូបភាពក្រោយហ្វឹកហាត់ក្នុងជួរទាហាន ជាមួយឆន្ទ:ស្នេហាជាតិ

តារាចម្រៀងវ័យក្មេងកញ្ញា វី ឌីណែត ថ្មីៗនេះបានធ្វើឱ្យមហាជនអ្នកគាំទ្រ មានការភ្ញាក់ផ្អើលនិងចាប់អារម្មណ៍គ្រប់គ្នា ខណ:ដែលតារាចម្រៀងស្រីរូបនេះ បានបង្ហាញឆន្ទ:ស្ម័គ្រចិត្តចូលហាត់ទាហានការពារជាតិមិនខ្លាចខូចសម្រស់ ឬសូម្បីតែគ្រោះថ្នាក់។

ជាការពិត នៅលើបណ្តាញសង្គមហ្វេសប៊ុករបស់តារាចម្រៀងកញ្ញា វី ឌីណែត ដែលជាកូនស្រីបង្កើតតារាចម្រៀងជើងចាស់សំឡេងស្អកល្បីឈ្មោះលោក ហួរ ឡាវី កាលពីល្ងាចថ្ងៃទី០៩ ខែកក្កដា ឆ្នាំ២០២៥ បានទម្លាយរូបភាពជាច្រើនសន្លឹកដោយបង្ហាញពីស្នាមរបួសលើដងខ្លួន កំឡុងពេលចាប់ផ្តើមចូលហ្វឹកហាត់លើកដំបូងរបស់ខ្លួន។

កញ្ញា វី ឌីណែត បានសរសេររៀបរាប់ដោយឆន្ទ:មោះមុតថា “ស្គាល់ហើយ ដឹងហើយ ឭហើយឃើញហើយ ជួបហើយទោះជាយ៉ាងណា នាងខ្ញុំត្រូវតែស៊ូទ្រាំបន្តទៀតដើម្បីការងារមួយនេះ”។ ដោយឃើញរូបភាពបែបនេះ មានអ្នកគាំទ្រមួយចំនួន បានបង្ហាញការលើកទឹកចិត្តដើម្បីឲ្យនាងខិតខំប្រឹងហ្វឹកហាត់រហូតទទួលបានជោគជ័យ។

ជាមួយគ្នានោះដែរ ក៏មានមហាជននិងអ្នកគាំទ្រតារាចម្រៀងរូបនេះ បានកោតសរសើរចំពោះឆន្ទ:និងការលះបង់តាមរយ:ការស្ម័គ្រចិត្តចូលហាត់ទាហាន ដើម្បីរួមចំណែកការពារជាតិដោយមិនខ្លាចខូចសម្រស់ ឬគ្រោះថ្នាក់ពីសំណាក់តារាស្រីរូបនេះផងដែរ។ ទង្វើនេះ អាចចាត់ទុកថាជាគំរូល្អមួយសម្រាប់យុវជនខ្មែរ និងអ្នកសិល្ប:ឯទៀតផងដែរ៕ អត្ថបទ៖ ចាន់រ៉ា