ព័ត៌មានជាតិ

អ្នកបម្រើតាមផ្ទះជាង ៩៤០ នាក់ បានចុះឈ្មោះចូលជាសមាជិក ប.ស.ស

បានផុស

១ year មុន

នៅ

ថ្ងៃសៅរ៍ ១២ កក្កដា ២០២៥

ដោយ

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអ្នកនាំពាក្យ នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅព្រឹកថ្ងៃទី ១២ កក្កដា នេះថា គិតត្រឹមខែមិថុនា ឆ្នាំ ២០២៥ មានម្ចាស់ផ្ទះចំនួន ៤៦៥ បានចុះបញ្ជីជាមួយ ប.ស.ស.ដោយមានអ្នកបម្រើតាមផ្ទះចំនួន ៩៤៥ នាក់ ស្រី ៦៨០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត ហេង សុផាន់ណារិទ្ធ បានបន្តថា អ្នកបម្រើតាមផ្ទះអាចទទួលបានអត្ថប្រយោជន៍ នៃរបបសន្តិសុខសង្គមពេញលេញដូចកម្មករ-និយោជិតដែលកំពុងបម្រើការងារក្នុងវិស័យឯកជនដទៃទៀតដែរ ដូចជា ទទួលរបបថែទាំសុខភាព របបគ្រោះថ្នាក់ការងារ និងរបបសោធន។ ប៉ុន្តែអ្នកបម្រើតាមផ្ទះចូលជាសមាជិក ប.ស.ស. តម្រូវឱ្យម្ចាស់ផ្ទះ ត្រូវបំពេញតួនាទីក្នុងនាមជានិយោជកតាមរយៈការចុះបញ្ជិកា និងប្រកាសបង់ភាគទានទាំងរបបហានិភ័យការងារថែទាំសុខភាព និងរបបប្រាក់សោធនជូនដល់ពួកគេ។

ការចុះបញ្ជីអ្នកដែលកំពុងបម្រើការងារក្នុងផ្ទះ ម្ចាស់ផ្ទះ ត្រូវមកស្នើសុំចុះបញ្ជីជាមួយ ប.ស.ស ត្រូវបំពេញតម្រង់ដូចជា កម្មករ-កម្មការិនីបម្រើការងារនៅតាមរោងចក្រសហគ្រាសដែលមានអត្តសញ្ញាណប័ណ្ណ ឬលិខិតឆ្លងដែន ទីតាំងផ្ទះ រូបថត ៤ គុណនឹង ៦ សៀវភៅគ្រួសារ ឬសៀវភៅស្នាក់នៅ។ ពេលម្ចាស់ផ្ទះបំពេញទៅតាមលក្ខខណ្ឌរួចរាល់ហើយ ម្ចាស់ផ្ទះ ត្រូវបញ្ជូនអ្នកបម្រើការងារក្នុងផ្ទះទៅចុះបញ្ជីដើម្បីមានសិទ្ធិក្នុងការប្រើប្រាស់សេវា ប.ស.ស ជាមួយនឹងការទទួលបានអត្ថប្រយោជន៍របបសន្តិសុខសង្គមជាច្រើនទៀត។

លោកបណ្ឌិត បានបន្ថែមថា ចំពោះការបង់ភាគទានប្រចាំខែសម្រាប់ផ្នែកហានិភ័យការងារផ្នែកថែទាំសុខភាព គឺ ម្ចាស់ផ្ទះជាអ្នកបង់ជំនួស។ ចំណែកផ្នែកប្រាក់សោធនដែលត្រូវបង់ ៤ ភាគរយ នៃប្រាក់ខែរបស់អ្នកបម្រើការងារក្នុងផ្ទះ ត្រូវបង់ពាក់កណ្ដាលម្នាក់ គឺ ម្ចាស់ផ្ទះបង់ ២ ភាគរយ និងអ្នកបម្រើការងារក្នុងផ្ទះ ត្រូវបង់ ២ ភាគរយ។

លោកបណ្ឌិត បានអំពាវនាវដល់ម្ចាស់ផ្ទះត្រូវបំពេញកាតព្វកិច្ចជាម្ចាស់ផ្ទះល្អដោយអាចចុះបញ្ជិកាអ្នកបម្រើក្នុងផ្ទះរបស់ខ្លួន តាមរយៈប្រព័ន្ធចុះបញ្ជិកា WebBase Application របស់ ប.ស.ស. ឬអាចអញ្ជើញទៅសាខា ប.ស.ស.ផ្ទាល់ណាមួយដែលជិតបំផុត និងត្រូវភ្ជាប់ឯកសារមកជាមួយនូវសៀវភៅស្នាក់នៅ ឬលិខិតតូបករណ៍គតិយុត្តិសមមូលដទៃទៀត និងអត្តសញ្ញាណប័ណ្ណសញ្ជាតិខ្មែររបស់ខ្លួន។

គួរបញ្ជាក់ថា គិតត្រឹមខែមិថុនា ឆ្នាំ ២០២៥ នេះ ប.ស.ស. មានសមាជិកកើនឡើងដល់ ៣ លាន ២ សែននាក់ ស្រី ១,៨ លាននាក់។ ក្នុងនោះ បុគ្គល នៃវិស័យសាធារណៈ ៥១ ម៉ឺន ៨ ពាន់នាក់ បុគ្គល នៃវិស័យឯកជន ១ លាន ៩៥ ម៉ឺននាក់ បុគ្គលស្វ័យនិយោជន៍ ៥២ ម៉ឺននាក់ និងអ្នកក្នុងបន្ទុកសមាជិក ប.ស.ស. ២០ ម៉ឺន ៣ ពាន់នាក់៕

អត្ថបទ ៖ សំអឿន