ព័ត៌មានអន្ដរជាតិ

ត្រាំ គ្រោងដាក់ពន្ធ ១០-១៥% លើប្រទេសជាង ១៥០

បានផុស

១៣ ម៉ោង មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃពុធថា លោកគ្រោងនឹងផ្ញើលិខិតស្ដីពីពន្ធទៅប្រទេសជាង ១៥០ ដោយបញ្ជាក់ពីអត្រាពន្ធដែលពួកគេជាប់ចំពោះទំនិញនាំចេញទៅអាមេរិកចន្លោះពី ១០-១៥ ភាគរយ។ នេះបើតាមការចុះផ្សាយរបស់ Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាង ១៥០ ប្រទេសដែលលោក ត្រាំ បានលើកឡើង អាចសំដៅលើក្រុមប្រទេសដែលជាប់ពន្ធមូលដ្ឋាន ១០ ភាគរយ ដែលលោកបានប្រកាសឡើងក្នុងពេលដំណាលគ្នាជាមួយពន្ធគយបដិការខ្ពស់ កាលពីដើមខែមេសា។

លោកប្រាប់អ្នកយកព័ត៌មាននៅសេតវិមានយ៉ាងដូច្នេះថា៖ «យើងមានជាង ១៥០ ប្រទេស ដែលយើងនឹងផ្ញើការជូនដំណឹងអំពីអ្វីដែលពួកគេត្រូវបង់។ ការជូនដំណឹងនោះ នឹងបញ្ជាក់ពីអត្រាពន្ធប៉ុន្មានៗ។ វានឹងដូចៗគ្នា សម្រាប់ក្រុមប្រទេសទាំងនោះ»។ លោកបន្ថែមថា ប្រទេសទាំងនោះមិនមែនជាប្រទេសធំៗ ហើយធ្វើអាជីវកម្មច្រើនទេ។

ក្នុងបទសម្ភាសន៍មួយជាមួយបណ្ដាញផ្សព្វផ្សាយ Real America’s Voice ដែលចេញផ្សាយកាលពីថ្ងៃពុធ លោក ត្រាំ និយាយថា អត្រាពន្ធលើប្រទេសទាំងនោះ អាចមានចន្លោះពី ១០-១៥ ភាគរយ ប៉ុន្តែមិនទាន់សម្រេចនៅឡើយទេ។

គួរគូសបញ្ជាក់ថា ការលើកឡើងពីផែនការនេះរបស់ ត្រាំ ធ្វើឡើងក្រោយលោកបានផ្ញើលិខិតស្ដីពីអត្រាពន្ធខ្ពស់ទៅប្រទេសជាង ២០ រួមទាំងកាណាដា សហភាពអឺរ៉ុប និងបណ្ដាប្រទេសអាស៊ីអាគ្នេយ៍ ដែលភាគច្រើនសុទ្ធសឹងតែជាប់ពន្ធខ្ពស់ចន្លោះ ២៥-៥០ ភាគរយ លើកលែងតែឥណ្ឌូណេស៊ី ដែលលោកបន្ថយពី ៣២ ភាគរយ មកត្រឹម ១៩ ភាគរយ ក្រោមមានការចរចាគ្នា។ ពន្ធខ្ពស់នេះ នឹងចូលជាធរមាននៅថ្ងៃទី ១ សីហា ដោយទុកពេលឱ្យប្រទេសផ្សេងៗចរចា និងផ្ដល់សំណើផ្សេងៗ ជាថ្នូរនឹងការទម្លាក់អត្រាពន្ធនោះចុះ៕