ព័ត៌មានជាតិ

ក្រុមហ៊ុនអភិវឌ្ឍន៍ខុនដូ Picasso នឹងឡើងផ្សារហ៊ុននាពេលឆាប់ៗនេះ

បានផុស

៩ ខែ មុន

នៅ

ថ្ងៃចន្ទ ២១ កក្កដា ២០២៥

ដោយ

ផ្សារមូលបត្រកម្ពុជា (CSX) បានផ្តល់ការឯកភាពជាគោលការណ៍ដល់ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន (Picasso City Garden Development) លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិ នៅទីផ្សារកំណើន (Growth Board) នាពេលដ៏ខ្លីខាងមុខ។

យោងតាមសេចក្តីជូនដំណឹងកាលពីថ្ងៃទី១០ ខែកក្កដារបស់ CSX បានឱ្យដឹងថា ខ្លួនបានឯកភាពជាគោលការណ៍លើការពាក្យស្នើសុំរបស់ក្រុមហ៊ុន Picasso ដែលមានបំណងក្នុងការបោះផ្សាយមូលបត្រកម្មសិទ្ធិនៅផ្សារហ៊ុនដើម្បីកៀរគទុនក្នុងការពង្រីកអាជីវកម្មបន្ថែមទៀ។

«ផ្សារមូលបត្រកម្ពុជា (CSX) សូមជម្រាបជូនដំណឹងដល់សាធារណជនថា CSX បានសម្រេចឯកភាពជាគោលការណ៍ លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិ នៅទីផ្សារកំណើនរបស់ ក្រុមហ៊ុន ពីកាសូ ស៊ីធី ហ្គាដិន នៅថ្ងៃទី០៨ ខែកក្កដា ឆ្នាំ២០២៥។ ដើម្បីអាចចុះបញ្ជី និងជួញដូរ ជាផ្លូវការនៅ CSX ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន (Picasso City Garden Development) ត្រូវតែទទួលបានការអនុញ្ញាតឱ្យបោះផ្សាយ លក់មូលបត្រកម្មសិទ្ធិជាសាធារណៈពីនិយ័តករមូលបត្រកម្ពុជា (SERC) និងត្រូវបំពេញនូវលក្ខខណ្ឌផ្សេងៗមួយចំនួនទៀតពាក់ព័ន្ធនឹងការចុះបញ្ជីនៅ CSX»។

ក្រុមហ៊ុន ពីកាសូ ស៊ីធី ហ្គាដិន ឌីវេឡុបម៉ិន ជាក្រុមហ៊ុនទីមួយដែលទទួលបានការឯកភាពជាគោលការណ៍ លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិនៅទីផ្សារកំណើនសម្រាប់ឆ្នាំ ២០២៥នេះ ។ គួរកត់សម្គាល់ផងដែរថា ក្រុមហ៊ុន ពីកាសូ ជាក្រុមហ៊ុនដេលមានសកម្មភាព អាជីវកម្មចម្បងគឺអភិវឌ្ឍន៍គម្រោងខុនដូ លំដាប់ខ្ពស់ ជាពិសេសដោយបំផុសនូវរចនាបថសិល្ប គំនូររូបរបស់វិចិត្រករ ដ៏ល្បីល្បាញ លោក Pablo Picasso ។

លោក ហុង សុហួរ អគ្គនាយនៃផ្សារមូលបត្រកម្ពុជាបានថ្លែងមកកាន់កម្ពុជាថ្មីថា ក្រុមការងារបច្ចេកទេសរបស់លោកនឹងត្រូវការពេល១ខែក្នុងការត្រួតពិនិត្យលើឯកសារស្នើសុំ។

«យើងនឹងមើលជាក់ស្តែងថាទៅលើស្ថានភាពអាជិវកម្ម និងហិរញ្ញវត្ថុរបស់ក្រុមហ៊ុន ថាតើពួកគាត់មានគុណវុឌ្ឍន៍គ្រប់គ្រាន់ក្នុងការចុះបញ្ជីបានហើយឬនៅ។ ដូច្នេះយើងមិនទាន់ធ្វើការសន្និដ្ឋានបាននៅឡើយទេពេលនេះ ដោយសារយើងត្រូវការពិនិត្យបន្ថែមទៀត។ ចំណុចដែលសំខាន់នោះក្រុមហ៊ុនត្រូវតែច្បាស់ថាខ្លួនមានស្ថានភាពហិរញ្ញវត្ថុរឹងមាំ»។ នេះបើតាមការបញ្ជាក់របស់លោកសុហួរ។

បើតាម CSX ) អស់រយៈពេលជាង ១៣ ឆ្នាំ នៃការបើកដំណើរការផ្សារហ៊ុននៅក្នុងប្រទេសកម្ពុជា ផ្សារមូលបត្របានចូលរួមកៀរគរថវិកាបានប្រមាណជិត ៥០០ លានដុល្លារអាមេរិក។ បានលើកឡើងថា រយៈពេលជាង ១៣ឆ្នាំហើយ ចាប់តាំងពីទីផ្សារហ៊ុនបើកដំណើរការនៅក្នុងប្រទេសកម្ពុជា បច្ចុប្បន្នទីផ្សារមូលបត្រកម្ពុជា មានក្រុមហ៊ុនដែលចុះបញ្ជីជាភាគហ៊ុនជាមួយមានចំនួន ១១ ក្រុមហ៊ុន ដោយក្នុងនោះក្រៅពីភាគហ៊ុន ក៏នៅមានផលិតផលផ្សេងទៀតគឺមានសញ្ញាប័ណ្ណចំនួន ១៤ បន្ថែម សរុបក្រុមហ៊ុនទាំងអស់មានចំនួន ២៥។ ក្រុមហ៊ុនទាំង ២៥ នេះ បានកៀរគរទុនជូនដល់រាជរដ្ឋាភិបាលកម្ពុជា បានប្រមាណជិត ៥០០លានដុល្លារ៕