ជាល្បិចឬយ៉ាងណា? ក្រោយអនុព័ន្ធយោធាបរទេសមិនខ្វល់ស្តាប់ ទាហានថៃ ៥នាក់ទៀតក៏ដើរជាន់មីន 

ទាហានថៃចំនួន៥នាក់បានដើរជាន់មីនទៀតហើយ ដោយក្នុងនោះមានម្នាក់ត្រូវដាច់ជើងស្តាំ ដែលហេតុការណ៍នេះកើតឡើងកាលពីល្ងាចថ្ងៃពុធទី២៣ខែកក្កដាឆ្នាំ២០២៥ នៅតំបន់ជម្លោះដែលថៃអះអាងជាទឹកដីរបស់ខ្លួន។

ហេតុការណ៍នេះកើតឡើងមិនយូរប៉ុន្មានឡើយបន្ទាប់ពីប្រទេសថៃ បានអញ្ជើញអនុព័ន្ធយោធាបរទេសចំនួន៤៧ប្រទេសមកស្តាប់ការបកស្រាយនិងមើលព័ស្តុតាង ចោទប្រកាន់មកលើកម្ពុជាថាជាអ្នកដាក់មីនបណ្តាលឲ្យទាហានរបស់ខ្លួន៣នាក់របួស កាលពីសប្តាហ៍មុន។

ទោះបីជាយ៉ាងណាក៏ដោយ ថៃត្រូវបាក់មុខយ៉ាងខ្លាំង ព្រោះតែក្នុងចំណោមអនុព័ន្ធយោធាបរទេសដែលត្រូវអញ្ជើញ មានតែ១៨ប្រទេសប៉ុណ្ណោះដែលចូលរួម ហើយតំណាងទាំងនោះមិនខ្វល់ស្តាប់សម្តីរបស់ថៃទៀត។

បន្ទាប់ពីកិច្ចប្រជុំបញ្ចប់មិនយូរប៉ុន្មាន មេទ័ពភូមិភាគ២ថៃ Boonsin Padklang ក៏ប្រកាសថា មានទាហានថៃចំនួន៥នាក់ទៀតហើយ ដែលដើរជាន់មីនពេលល្បាតនៅស្រុក ណាំយឿន ខេត្ត Ubon Ratchathani ក្នុងនោះមានម្នាក់របួសធ្ងន់ត្រូវដាច់ជើងម្ខាង និងបួននាក់ទៀតតឹងទ្រូងនិងហឹងត្រចៀក។

វាពិតជាគួរឲ្យសង្ស័យមែនទែន ដែលហេតុការណ៍នេះកើតឡើងចំពេលវេលាសំខាន់ ដោយប្រទេសថៃ ហាក់ដូចជាព្យាយាមរៀបចំសម្តែងនិងប្រើល្បិចដើម្បីឲ្យអន្តរជាតិមើលឃើញថា ខ្លួនជាជនរងគ្រោះ ដោយស្នាដៃរបស់កម្ពុជា ទាំងដែលអន្តរជាតិគេស្គាល់ច្បាស់ណាស់ពីក្រយៅរបស់ថៃ។

រឿងហេតុថ្មីនេះ បានបញ្ឆេះភាពតានតឹងរវាងប្រទេសទាំងពីរឲ្យឡើងដល់កម្រិតខ្ពស់ ដោយកម្ពុជា បានសម្រេចទម្លាក់កម្រិតទំនាក់ទំនងការទូតជាមួយថៃ ឲ្យមកនៅទាបបំផុត ត្រឹមកម្រិតលេខាទី២ និងដកមន្ត្រីផ្សេងទៀតទាំងអស់ ដែលបម្រើការងារនៅស្ថានទូតកម្ពុជា ក្នុងទីក្រុងបាងកក ឲ្យត្រឡប់មកប្រទេសកម្ពុជាវិញ និងតម្រូវឲ្យមន្ត្រីការទូតថៃ ចេញពីកម្ពុជាដូចគ្នា ដែលជាការឆ្លើយតបទៅនឹងទង្វើរបស់ថៃ ដែលធ្វើដូចគ្នានេះ៕

អត្ថបទ៖ សុខ សុវណ្ណ

ចុចអាន៖ ​នាយករដ្ឋមន្ត្រីចាំផ្ទះថៃ ​កោះហៅ​ឯកអគ្គរាជទូត​​ពីកម្ពុជា​​ក្នុងទង្វើដែលថៃបង្កហេតុ​​ជាន់មីនថ្មី​​