អភិបាលខេត្តប៉ៃលិន ប្រាប់ឱ្យពលករខ្មែរដែលធ្វើការនៅប្រទេសថៃ ប្រញាប់វិលត្រឡប់មកស្រុកកំណើតវិញ

លោកស្រី បាន ស្រីមុំ អភិបាលខេត្តប៉ៃលិន ប្រាប់ឱ្យពលករខ្មែរ និងប្រជាពលរដ្ឋខ្មែរ ដែលកំពុងស្នាក់នៅ និងធ្វើការនៅក្នុងប្រទេសថៃ ប្រញាប់វិលត្រឡប់មកស្រុកកំណើតវិញ ព្រោះស្ថានភាពបច្ចុប្បន្នមិនល្អនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវរបស់លោកស្រី គឺបន្ទាប់ពីកងទ័ពថៃបានចាប់ផ្តើមវាយប្រហារមកលើកងទ័ពកម្ពុជាមុន នៅតំបន់ប្រាសាទតាមាន់ធំ និងបានរាលដាលដល់តំបន់ផ្សេងទៀតក្នុងទឹកដីកម្ពុជា កាលពីថ្ងៃទី២៤ ខែកក្កដា ម្សិលមិញ និងបន្តផ្ទុះអាវុធមកលើកម្ពុជារហូតមកដល់ពេលនេះនៅមិនទាន់ថមថយនៅឡើយ។

តាមរយៈទំព័រហ្វេសប៊ុក របស់លោកស្រី បាន ស្រីមុំ នៅព្រឹកថ្ងៃទី២៥ ខែកក្កដា ឆ្នាំ២០២៥ នេះ បានបញ្ជាក់ដូច្នេះថា «ដោយស្ថានភាពមិនល្អបច្ចប្បន្នបើមិនមានការចាំបាច់ សូមប្រញាប់វិលត្រឡប់មកស្រុកកំណើតវិញ តាមច្រកទ្វារព្រំដែនអន្តរជាតិព្រំ ខេត្តប៉ៃលិន យើងបានរៀបចំក្រុមការងាររង់ចាំជួយសម្របសម្រួលជួយបងប្អូនពលករ ទោះបីមានឯកសារ ឬគ្មានឯកសារ»។ បន្ថែមពីនេះ រដ្ឋបាលខេត្តប៉ៃលិន ក៏បានត្រៀមរថយន្តក្រុង សម្រាប់ជូនបងប្អូនវិលត្រលប់ទៅស្រុកកំណើត ដល់លំនៅដ្ឋានគ្រប់ខេត្ត/ក្រុង ទូទាំងព្រះរាជាណាចក្រកម្ពុជា ដោយឥតគិតថ្លៃផងដែរ។

លោកស្រីអភិបាលខេត្ត បានបញ្ជាក់ថា ចំពោះករណីពលករខ្មែរ កំពុងស្ថិតនៅក្នុងប្រទេសថៃ ជួបបញ្ហាផ្សេងៗ ឬមិនទាន់បើកប្រាក់ខែ និងគ្មានមធ្យាបាយធ្វើដំណើរមកដល់ព្រំដែនកម្ពុជា តែមានបំណងចង់វិលត្រឡប់ទៅស្រុកកំណើត សូមទំនាក់ទំនងតាមរយៈលេខទូរស័ព្ទ ០៩៧ ៥៧៩ ៧៨ ៧៨ / ០៨៨ ៣៦៩ ៦៦៦៦ នោះក្រុមការងារនឹងរង់ចាំជួយសម្របសម្រួលជួយដោយឆន្ទៈខ្មែរតែមួយ៕