បណ្ឌិត ជេត ជាលី៖ សូមយុវជនទាំងអស់គោរពស្រលាញ់វីរកងទ័ពយើង លើកដៃសំពះ ប្រើសម្តីទន់ភ្លន់ចំពោះកងទ័ព

សាកលវិទ្យាធិការនៃសាកលវិទ្យាល័យភូមិន្ទភ្នំពេញ បណ្ឌិត ជេត ជាលី បានផ្តាំទៅយុវជនកម្ពុជាទាំងអស់ឱ្យគោរព ស្រឡាញ់វីរកងទ័ពកម្ពុជា ដែលបានលះបង់ជីវិត ការពារបូរណភាពទឹកដីពីការឈ្លានពានរបស់ថៃ លោកថា យុវជនសូមលើកដៃសំពះ ប្រើសម្តីទន់ភ្លន់ នៅពេលជួបកងទ័ពទោះក្នុងស្ថានភាពបែបណា។

លោកបណ្ឌិត លើកឡើងតាមរយៈការបង្ហោះលើបណ្តាញសង្គមហ្វេសប៊ុកនៅថ្ងៃទី២៩ ខែកក្កដា ឆ្នាំ២០២៥។ ក្នុងស្ថានភាពដែលថៃឈ្លានពានទឹកដីកម្ពុជាមុន ប្រើប្រាស់អាវុធធុនធំ និងទំនើបៗ មានទាំងផ្សែងពុល គ្រាប់ផ្លោង បណ្ឌិត​ ជេត ជាលី ថា មានតែកងទ័ពកម្ពុជាជួរមុខនេះហើយ ដែលប្តូរជីវិតច្បាំងទប់ទល់ជាមួយទាហានថៃ យ៉ាងមោះមុត ក្លាហាន មិនរត់បាក់ទ័ពទោះបីជាភាគីម្ខាងទៀតមានអាវុធទំនើបៗយ៉ាងណាក្តី។

សាកលវិទ្យាធិការ បណ្ឌិត ជេត ជាលី សង្កត់ធ្ងន់ថា៖ “ពួកគាត់ទាំងនេះហើយជាអ្នកប្រយុទ្ធដ៏ស្មោះត្រង់ និងអង់អាចរបស់ខ្មែរ។ មិនខាតពេល មិនអន់ទេគ្រាន់តែលើកដៃសំពះអ្នកមានគុណចំពោះជាតិ ចំពោះទឹកដី។ សូមប្អូនៗយុវជនយើងបង្កើតវប្បធម៌នេះដែលជាចំណែកនៃវប្បធម៌ខ្មែរដ៏ល្អរបស់យើង”។

លោកបណ្ឌិត បន្ថែមថា ពាក្យថា «អរគុណសន្តិភាព» មានតម្លៃបំផុតសម្រាប់រូបលោក និងរំឭកលោកពីអតីតកាលដ៏សែនរន្ធត់ ព្រោះលោកបណ្ឌិតបានកើត និងរស់នៅក្នុងសង្គ្រាមពេញមួយវ័យកុមារភាព។ ចំណែកបងប្អូនរបស់លោកបណ្ឌិតដែលជាកងទ័ព ក៏បានលះបង់ជីវិតច្រើននាក់ដែរក្នុងសមរភូមិរំដោះ និងការពារទឹកដីនាពេលនោះ។ ហេតុនេះ លោកថា សន្តិភាពដែលបានមកពីសម្តេចតេជោ គឺមានតម្លៃណាស់ ជាសម្បត្តិសម្រាប់កម្ពុជាពេលមុន និងពេលនេះ៕