ព័ត៌មានជាតិ

អភិបាលរាជធានី ណែនាំឲ្យអភិបាលខណ្ឌទាំង ១៤ ចាំទទួល និងជួយសម្របសម្រួលនៅពេលពលករពឹងពាក់រកការងារធ្វើ

បានផុស

១២ ខែ មុន

នៅ

ថ្ងៃពុធ ៦ សីហា ២០២៥

ដោយ

លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានធ្វើការណែនាំឲ្យអាជ្ញាធរខណ្ឌទាំង ១៤ និងមន្ទីរចំណុះឲ្យរដ្ឋបាលរាជធានីភ្នំពេញទាំងអស់ ត្រូវយកចិត្តទុកដាក់ឲ្យបានខ្ពស់ ពាក់ព័ន្ធការត្រៀមទទួលពលករដែលត្រឡប់ពីប្រទេសថៃមកស្រុកកំណើតវិញ ជាមួយនឹងការជួយសម្របសម្រួលពេលពួកគាត់ពឹងពាក់រកការងារធ្វើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំបែបនេះរបស់ លោក ឃួង ស្រេង នេះ បានធ្វើឡើងនារសៀលថ្ងៃទី ០៦ ខែសីហា ឆ្នាំ ២០២៥ នៅសាលារាជធានីភ្នំពេញ ក្នុងកិច្ចប្រជុំជាមួយអាជ្ញាធរខណ្ឌទាំង ១៤ និងកងកម្លាំងមានសមត្ថកិច្ចទាំង ០៣ ប្រភេទ និងមន្ទីរចំណុះឲ្យរដ្ឋបាលរាជធានីភ្នំពេញទាំងអស់។

លោក ឃួង ស្រេង លើកឡើងថា មកដល់ពេលនេះ ពលករកម្ពុជា បាននិងកំពុងសម្រុកចាកចេញពីប្រទេសថៃចូលមកប្រទេសកម្ពុជាវិញយ៉ាងច្រើនសន្ធឹកសន្ធាប់។ គិតមកដល់ពេលនេះមានពលរដ្ឋកម្ពុជាចាកចេញពីប្រទេសថៃប្រមាណជាង ៦០ ម៉ឺននាក់ហើយ។ ដូច្នេះទេ លោក ស្នើឲ្យអាជ្ញាធរខណ្ឌទាំង ១៤ និងមន្ទីរទាំងអស់ចំណុះឲ្យរដ្ឋបាលរាជធានីភ្នំពេញ ត្រូវយកចិត្តទុកដាក់ចំពោះជីវភាពរស់នៅរបស់ពួកគាត់។ ពោល នៅពេលដែលពលរដ្ឋមកពឹងពាក់រកការងារធ្វើ អាជ្ញាធរ ត្រូវជួយសម្របសម្រួលជួយពួកគាត់ ដោយមិនគិតពីនិន្នាការនយោបាយអ្វីទាំងអស់ ព្រោះជាឈាមជ័រដូចគ្នា ខ្មែរតែមួយ។

ពាក់ព័ន្ធការងារខាងលើនេះ លោក ឃួង ស្រេង សង្កត់ធ្ងន់ថា អ្វីដែលអាជ្ញាធរធ្វើបាន អ្វីជាចំណុចខ្វះខាត ត្រូវរាយការណ៍មកថ្នាក់លើភ្លាមៗ សំដៅធ្វើយ៉ាងណាឲ្យប្រជាពលរដ្ឋមានភាពកក់ក្តៅជាមួយអាជ្ញាធរ។ អាជ្ញាធរទាំង ១៤ ខណ្ឌ ក៏ត្រូវត្រៀមអាហារសម្រាប់ប្រជាពលរដ្ឋដែលជាពលករត្រឡប់ពីក្រៅប្រទេសមកកម្ពុជាវិញផងដែរ តាមរយៈការដាក់អ្នកប្រចាំការ ២៤ ម៉ោង លើ ២៤ ម៉ោង ដើម្បីជួយពួកគាត់ទាំងលើបញ្ហាជីវភាព និងការជួយសម្រួលរកការងារធ្វើ ដោយមិនទុកឲ្យពលរដ្ឋឯកោនោះទេ៕

អត្ថបទ ៖ ស្រីរ័ត្ន