អាជ្ញាធរខេត្តកំពត បង្កើនការងារជំរុញចលនាភូមិ១ផលិតផល១ ដើម្បីឈានទៅដល់ឈប់ប្រើប្រាស់ទំនិញថៃ

កំពត ៖ នៅថ្ងៃទី ១១ ខែសីហា ឆ្នាំ២០២៥នេះ អាជ្ញាធរខេត្តកំពតបានជំរុញឱ្យមន្ត្រីជំនាញលេខាធិការដ្ឋាននៃគណៈកម្មាធិការ ជំរុញចលនាភូមិ១ផលិតផល១ខេត្តកំពត បានលើកឡើងថា ដើម្បីលើកកម្ពស់ផលិតផលក្នុងស្រុក ជំរុញទីផ្សារ ការផលិត ការដាំដុះ និងការចិញ្ចឹមរបស់ប្រជាកសិករឱ្យប្រកបដោយគុណភាព សុវត្ថិភាព និងបរិមាណច្រើន អាចផ្គត់ផ្គង់តម្រូវការទីផ្សារ មន្ត្រីលេខាធិការដ្ឋាននឹងរៀបចំផែនការសកម្មភាពឱ្យកាន់តែប្រសើរ ដើម្បីឈានទៅដល់ឈប់ប្រើប្រាស់ទំនិញថៃ បានក្នុងកិច្ចប្រជុំក្រុមការងារលេខាធិការដ្ឋានជំរុញចលនាភូមិ១ ផលិតផល១។

លោក ង៉ែត សាវឿន អនុប្រធានលេខាធិការដ្ឋាន នៃគណៈកម្មាធិការជំរុញចលនាភូមិ១ផលិតផល១ខេត្តកំពត បានលើកឡើងថា ដោយអនុវត្តតាមគោលនយយោបាយ និងការណែនាំរបស់រាជរដ្ឋាភិបាល ក៏ដូចជាគណៈកម្មាធិការជាតិជំរុញចលនាភូមិ១ផលិតផល១ ពិសេសតាមចង្អុលបង្ហាញពីលោកអភិបាលខេត្តកំពត ក្រុមការងារលេខាធិការដ្ឋានបានមកជួបជុំគ្នាធ្វើបច្ចុប្បន្នភាពលើការងារជំរុញចលនាភូមិ១ផលិតផល និងគ្រោងរៀបចំផែនការឲ្យកាន់តែល្អប្រសើរថែមទៀត ដើម្បីលើកកម្ពស់ផលិតផលក្នុងស្រុក ជំរុញទីផ្សារ ការផលិត ការដាំដុះ និងការចិញ្ចឹមរបស់ប្រជាកសិករឱ្យប្រកបដោយគុណភាព សុវត្ថិភាព និងបរិមាណច្រើន អាចផ្គត់ផ្គង់តម្រូវការទីផ្សារ ក៏ដូចជារួមចំណែកទាក់ទាញភ្ញៀវទេសចរផងដែរ ពិសេសដើម្បីឈានទៅឈប់ប្រើប្រាស់ទំនិញថៃ។

សមាជិកលេខាធិការដ្ឋាន នៃគណៈកម្មាធិការជំរុញចលនាភូមិ១ ផលិតផល១ របស់ខេត្តកំពត លោក ស្មាន់ វណ្ណនីមល បានបញ្ជាក់ថា តាមផែនការរបស់គណៈកម្មាធិការជាតិជំរុញចលនាភូមិ១ផលិតផល១ គឺគ្រោងរៀបចំវេទិកាផ្គូផ្គងរវាងអ្នកផលិត អ្នកទិញ និងការតាំងបង្ហាញផលិតផលក្នុងស្រុក នៅក្នុងខេត្តកំពតនៅថ្ងៃទី ២៩ ដល់ថ្ងៃទី ៣១ ខែសីហាឆ្នាំ២០២៥ខាងមុខនេះ។

ហើយក្នុងឱកាសនោះខេត្តកំពតមានគណៈកម្មាធិការនឹងពិចារណាចុះបញ្ជីផលិតផលខេត្តកំពតប្រមាណ២០មុខបន្ថែមទៀតជាផលិតផល ភូមិ១ផលិតផល១  ខណៈដែលផលិតផល៥៧មុខត្រូវបានចុះបញ្ជីរួចរាល់។

បើតាមការបញ្ជាក់របស់ក្រុមការងារលេខាធិការដ្ឋានដែលមកពីតាមបណ្តាក្រុងស្រុក ថាខេត្តកំពតនៅមានផលិតផលជាច្រើនទៀត ដែលមានសក្តានុពលអាចចុះបញ្ជីជាផលិតផល ភូមិ១ផលិតផល១៕

ដោយ ៖ សឹង រ៉ាត់