ដោយសារខ្វះកម្លាំងពលកម្ម ថៃផ្តល់សិទ្ធិការងារដល់ជនភៀសខ្លួនមីយ៉ាន់ម៉ានៅក្នុងជំរុំតាមព្រំដែ

ប្រទេស​ថៃ​បាន​អនុម័ត​គោលនយោបាយ​សំខាន់​មួយ​ដែល​អនុញ្ញាត​ឱ្យ​ជនភៀសខ្លួន​មី​យ៉ាន់​ម៉ា​រាប់​ពាន់​នាក់​នៅ​ជំរុំតំបន់​ព្រំដែន​ដែលជាប់​គាំងជា​យូរ​មក​ហើយ​ធ្វើការ​ដោយ​ស្របច្បាប់​ជា​លើក​ដំបូង​ ខណៈប្រទេសនេះកំពុងខ្វះកម្លាំងពលកម្មក្រោយបង្កជម្លោះជាមួយកម្ពុជា។ នេះបើយោងតាមការចេញផ្សាយរបស់ Human Right Watch។

ជនភៀសខ្លួនប្រហែល ១០ ម៉ឺន ៨ពាន់នាក់រស់នៅក្នុងជំរុំចំនួនប្រាំបួន។ ជិតពាក់កណ្តាលនៃជនភៀសខ្លួនបានកើតនៅក្នុងជំរុំ ហើយមានតែ ៨ម៉ឺន ប៉ុណ្ណោះដែលត្រូវបានចុះឈ្មោះជាផ្លូវការ ហើយក្នុងចំណោមនោះ ប្រហែល ៤ម៉ឺន២ពាន់ មានអាយុគ្រប់គ្រាន់សម្រាប់ធ្វើការ និងអាចស្នើសុំការអនុញ្ញាតបាន។

ជនភៀសខ្លួននឹងអាចស្នើសុំលិខិតអនុញ្ញាតការងាររយៈពេលមួយឆ្នាំ និងការអនុញ្ញាតឱ្យចាកចេញពីជំរុំ ដោយបំបែកការរឹតបន្តឹងជាច្រើនទសវត្សរ៍ ស្របពេលជំនួយបរទេសក៏ធ្លាក់ចុះផងដែរនោះ។ ការផ្លាស់ប្តូរនេះកើតឡើងចំពេលមានការកាត់បន្ថយអាហារូបត្ថម្ភ និងការអស់សង្ឃឹមកាន់តែខ្លាំងនៅក្នុងជំរុំ ក៏ដូចជាកង្វះកម្លាំងពលកម្មនៅក្នុងប្រទេសថៃដែលបណ្តាលមកពីចំនួនប្រជាជនវ័យចំណាស់ និងការចាកចេញរបស់ពលករកម្ពុជានាពេលថ្មីៗនេះ។

ក្រុមអ្នកតស៊ូមតិបានសង្កត់ធ្ងន់ថា ប្រទេសថៃគួរតែមានប្រព័ន្ធអនុញ្ញាតប្រកបដោយតម្លាភាព និងយុត្តិធម៌អាចផ្តល់អំណាចដល់ជនភៀសខ្លួន កាត់បន្ថយការកេងប្រវ័ញ្ច ពង្រឹងសេដ្ឋកិច្ចក្នុងតំបន់ និងធ្វើជាគំរូសម្រាប់គោលនយោបាយជនភៀសខ្លួនផ្អែកលើសិទ្ធិនៅក្នុងតំបន់ បើមិនដូចនេះប្រជាជនមីយ៉ាន់ម៉ានឹងប្រឈមបញ្ហាជាច្រើនក្នុងពេលធ្វើការក្នុងប្រទេសថៃ៕

អត្ថបទ៖ ប៊ុន សុភាព