ព័ត៌មានអន្ដរជាតិ

ឥណ្ឌូណេស៊ី EU គ្រោងចុះកិច្ចព្រមព្រៀងពាណិជ្ជកម្មគ្រប់ជ្រុងជ្រោយចុងខែនេះ

បានផុស

៨ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

រដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto បានប្រកាសថា ឯកសារកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយឥណ្ឌូណេស៊ី-សហភាពអឺរ៉ុប (IEU CEPA) គ្រោងនឹងត្រូវចុះហត្ថលេខានៅថ្ងៃទី ២៣ ខែកញ្ញា ឆ្នាំនេះ។ នេះបើតាមការចុះផ្សាយរបស់ភ្នាក់ងារព័ត៌មានរដ្ឋ Antara កាលពីថ្ងៃព្រហស្បតិ៍។

លោក Airlangga បានប្រាប់សារព័ត៌មានក្រោយកិច្ចពិភាក្សាជាមួយសភាពាណិជ្ជកម្ម និងឧស្សាហកម្មឥណ្ឌូណេស៊ី (Kadin) ក្នុងទីក្រុងហ្សាកាតា យ៉ាងដូច្នេះថា៖ «IEU CEPA នឹងត្រូវបានចុះហត្ថលេខានៅថ្ងៃទី ២៣ ខែកញ្ញា។ នៅពេលកិច្ចព្រមព្រៀងត្រូវបានចុះហត្ថលេខា ដំណើរការនឹងបន្តនៅថ្នាក់សភានៃភាគីរៀងៗខ្លួន»។

លោកបានគូសបញ្ជាក់ថា ស្នងការអឺរ៉ុបទទួលបន្ទុកពាណិជ្ជកម្ម និងសន្តិសុខសេដ្ឋកិច្ច លោក Maroš Šefovi គ្រោងនឹងធ្វើទស្សនកិច្ចនៅឥណ្ឌូណេស៊ី ដើម្បីចុះហត្ថលេខាលើឯកសារកិច្ចព្រមព្រៀងនេះ។

ទោះបីជាយ៉ាងណាក៏ដោយ លោកបានកត់សម្គាល់ថា ការចុះហត្ថលេខានឹងមិនធ្វើឱ្យ IEU CEPA ចូលជាធរមានដោយស្វ័យប្រវត្តិនោះទេ ព្រោះវានៅតែទាមទារឱ្យមានការអនុម័តពីសភានៃប្រទេសជាសមាជិកសហភាពអឺរ៉ុបទាំង ២៧ ប៉ុន្តែរំពឹងថាវាអាចចូលជាធរមាននៅត្រីមាសទី ១ ឆ្នាំ ២០២៧ ។

គួរគូសបញ្ជាក់ថា ឥណ្ឌូណេស៊ី និង EU បានឆ្លងកាត់ការចរចារតាំងពីឆ្នាំ ២០១៦ មុនបិទបញ្ចប់ ដែលប្រកាសឡើងដោយប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ និងប្រធានគណៈកម្មការអឺរ៉ុប លោកស្រី Ursula von der Leyen កាលពីពាក់កណ្ដាលខែកក្កដា។ IEU CEPA ត្រូវបានគេរំពឹងថានឹងបង្កើតផ្លូវថ្មីសម្រាប់ទំនាក់ទំនងពាណិជ្ជកម្ម សេដ្ឋកិច្ច និងការវិនិយោគកាន់តែស៊ីជម្រៅរវាងភាគីទាំង២។

កាលពីថ្ងៃទី ៤ ខែសីហា អគ្គនាយកនៃកិច្ចចរចាពាណិជ្ជកម្មអន្តរជាតិនៅក្រសួងពាណិជ្ជកម្មឥណ្ឌូណេស៊ី លោក Djatmiko Bris Witjaksono បានគូសបញ្ជាក់ថា នៅពេលចូលជាធរមាន កិច្ចព្រមព្រៀងនឹងផ្តល់ការលើកលែងពន្ធលើផលិតផលមួយចំនួនរបស់ឥណ្ឌូណេស៊ី ដែលនាំចេញទៅ EU រួមទាំងវាយនភណ្ឌ និងប្រេងដូងផងដែរ៕