អ្នកនិពន្ធ ចេញមុខបញ្ជាក់ការពិត ក្រោយមានការបៀបធៀបរឿង «ភូមិគ្រឹះអាគម» និង «រាជិនីភូមិគ្រឹះ»

ក្រោយមានការវែកញែក និងរិះគន់ថាភាពយន្តដំបូងរបស់ផលិតកម្ម Film Corner រឿង «ភូមិគ្រឹះអាគម» ដូចគ្នានឹងភាពយន្តភាគដ៏ល្បីរបស់ស្ថានីយទូរទស្សន៍រស្មីហង្សមាស រឿង«រាជិនីភូមិគ្រឹះ» លោក យូ សុភា អ្នកនិពន្ធរឿងទាំងពីរនេះផ្ទាល់ ចេញមុខបញ្ជាក់ថា ជារឿងពីរផ្សេងគ្នា និងមានគោលដៅខុសគ្នាទាំងស្រុង។

បើតាមលោក យូ សុភា ភាពយន្តរឿង «ភូមិគ្រឹះអាគម» និងរឿងភាគទូរទស្សន៍ «រាជិនីភូមិគ្រឹះ» ជារឿងពីរផ្សេងគ្នា គ្រាន់តែឆ្លុះបញ្ចាំងពីសង្គមមួយក្នុងសម័យអាណានិគមបារាំងដូចគ្នាប៉ុណ្ណោះ ហើយពុំមានលក្ខណៈនៃសាច់រឿងដូចគ្នានោះទេ រាប់ចាប់ពីចំណុចចាប់ផ្តើមដល់បញ្ចប់នៃសាច់រឿង។

លោកគូសបញ្ចាក់ដែរថា ដ្បិតតែរឿងទាំងពីរលោកនិពន្ធក៏ពិតមែន ប៉ុន្តែសម្រាប់រឿង «ភូមិគ្រឹះអាគម» ចេញពីគំនិតផ្ទាល់របស់លោក សែម ឡង់ឌី (Peypey Dy) និងកែសម្រួលដោយលោក ពៅ មករា ខណៈក្នុងការដឹកនាំផលិតរឿងនេះ គឺមានការកែប្រែចំណុចខ្លះប៉ុណ្ណោះ។ តែទោះជាបែបនេះ លក្ខណៈនៃរឿងទាំងមូលមិនដូចគ្នានោះឡើយ។

លោកថា អ្វីដែលជាលក្ខណៈដូចគ្នានោះ​ គឺគ្រាន់តែរឿងទាំងពីរឆ្លុះបញ្ចាំងពីសង្គមមួយ ក្នុងសម័យអាណានិគមបារាំងដូចគ្នា មិនថាការរស់នៅ ឬផ្នត់គំនិតរបស់គ្រួសារអភិជននាសម័យនោះ ដែលទាក់ទងនឹងការយកប្រពន្ធច្រើន។ តែយ៉ាងណា រឿងទាំងពីរ ពុំមានលក្ខណៈនៃសាច់រឿងដូចគ្នានោះទេ រាប់ចាប់ពីចំណុចចាប់ផ្តើមដល់បញ្ចប់នៃសាច់រឿង ដោយមួយ ឆ្លុះបញ្ចាំងពីការច្រណែនឈ្នានីសគ្នាក្នុងរង្វង់គ្រួសារអភិជន “ប្រពន្ធដើម ប្រពន្ធចុង”។ ឯមួយទៀត ឆ្លុះបញ្ចាំងពីតថភាពរស់នៅក្នុងសង្គមជាក់ស្តែងមួយ ដែលប្រើប្រាស់អបិយជំនឿដើម្បីដោះស្រាយបញ្ហា ខណៈមានបង្កប់ទាំងចំណោទបញ្ហា និងការដោះស្រាយដោយរបៀបខុសគ្នា។

សូមស្តាប់វីដេអូលម្អិត៖

គួររំលឹកថា លោក យូ សុភា ជាអ្នកនិពន្ធមួយរូបដែលមានស្នាដៃតែងនិពន្ធច្រើន មិនថាភាពយន្តភាគ ឬរឿងខ្លី ដែលត្រូវបានផលិត និងចាក់ផ្សាយតាមប៉ុស្តិ៍ទូរទស្សន៍នៅកម្ពុជាឡើយ។ លោកចាប់ផ្តើមសរសេរប្រលោមលោក តាំងពីឆ្នាំ២០០០ ហើយបានទទួលពានរង្វាន់ និងមេដាយជាច្រើន លើការប្រកួតប្រជែងស្នាដៃអក្សរសិល្ប៍ ខណៈស្នាដៃខ្លះ ត្រូវបានបោះពុម្ពផ្សាយ និងខ្លះត្រូវបានផលិតជាភាពយន្ត៕