សាលាឧទ្ធរណ៍ខេត្តបាត់ដំបង ឧបត្ថម្ភថវិកា និងសម្ភារៈជូនកងទ័ពព្រំដែន

លោក សម ប៊ុនថុន ប្រធានសាលាឧទ្ធរណ៍ខេត្តបាត់ដំបង និងជាសមាជិកក្រុមគណៈកម្មការនាយក នៃក្រុមកីឡាសេនាយុត្តិធម៌ កាលពីរសៀលថ្ងៃទី១២ ខែកញ្ញា ឆ្នាំ២០២៥ បានដឹកនាំក្រុមការងារ អញ្ជើញចុះសួរសុខទុក្ខសំណេះសំណាល និងនាំអំណោយប្រគល់ជូនកងទ័ពជួរមុខ ដែលកំពុងឈរជើងការពារតាមបន្ទាត់ព្រំដែន កម្ពុជា-ថៃ ក្នុងខេត្តឧត្តរមានជ័យ។

ដំណើរអញ្ជើញចុះសួរសុខទុក្ខ សំណេះសំណាល និងនាំអំណោយប្រគល់ជូនកងទ័ព ដែលដឹកនាំដោយលោក សម ប៊ុនថុន ប្រធានសាលាឧទ្ធរណ៍ ខេត្តបាត់ដំបង នាពេលនេះ គឺលោកអញ្ជើញចុះចំនួន៣ទីតាំងគឺមានដូចជា ៖ តំបន់ប្រាសាទតាក្របី ប្រាសាទតាមាន់ធំ និងជប់គគីរ។

ក្រៅពីប្រគល់សម្ភារប្រើប្រាស់ គ្រឿងឧបភោគបរិភោគ និងថវិកាដល់កងទ័ពទាំង៣ទីតាំង លោកប្រធានសាលាឧទ្ធរណ៍ ក៏បានប្រគល់ម៉ូតូ និងថវិកា ដល់កងទ័ពចំនួន២នាក់ ដោយក្នុងម្នាក់ៗទទួលបានម៉ូតូ១គ្រឿង និងថវិកា២លានរៀល ផងដែរ។

ក្នុងនាមសមរភូមិក្រោយ លោក សម ប៊ុនថុន បានថ្លែងនូវការកោតសរសើរដល់វីរកងទ័ពយើងទាំងអស់ ដែលបានលះបង់គ្រប់បែបយ៉ាង ការពារបូរណភាពទឹកដីមិនឱ្យចោរសៀមឈ្លានពានបានឡើយ។

ជាចុងក្រោយ លោកប្រធាន​សាលាឧទ្ធរណ៍ ក៏សូមថ្លែងអំណរគុណដល់ថ្នាក់ដឹកនាំ និងសមាជិកក្រុមកីឡាសេនាយុត្តិធម៌ ដែលបានចូលរួមឧបត្ថម្ភសម្ភារ ថវិកា ហូបអាហារ ជូនកងទ័ពជួរមុខ នៅខេត្តឧត្តរមានជ័យផងដែរ៕

អត្ថបទ ៖ ចាន់ ធី