សេដ្ឋកិច្ច

ពិព័រណ៍ចិន-អាស៊ាន ជាឱកាសកម្ពុជាផ្សព្វផ្សាយផលិតផលសក្តានុពលរបស់ខ្លួនលើទីផ្សារអន្តរជាតិ

បានផុស

៧ ខែ មុន

នៅ

ថ្ងៃព្រហស្បតិ៍ ១៨ កញ្ញា ២០២៥

ដោយ

ពិព័រណ៍ចិន-អាស៊ាន លើកទី២២ ឆ្នាំ២០២៥ ដែលរៀបចំឡើងនៅមជ្ឈមណ្ឌលពិព័រណ៍ក្រុងណាននីង (NICEC) តំបន់ស្វយ័តក្វាងស៊ី នៃសាធារណរដ្ឋប្រជាមានិតចិន គឺជាឱកាសដែលកម្ពុជាអាចផ្សព្វផ្សាយផលិតផលសក្តានុពលរបស់ខ្លួននៅលើទីផ្សារអន្តរជាតិ ជាពិសេសទីផ្សារចិន ពង្រីកទីផ្សារនាំចេញទំនិញពីកម្ពុជា និងទាក់ទាញវិនិយោគិនបរទេស។

ពិព័រណ៍ចិន-អាស៊ាន គឺជាវេទិកាដ៏ធំមួយដែលថ្នាក់ដឹកនាំកំពូលចិន-អាស៊ាន យកចិត្តទុកដាក់ខ្ពស់ និងបានមកជួបជុំគ្នាផ្លាស់ប្តូរបទពិសោធ ពង្រឹងនិងពង្រីកកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ វប្បធម៌ នយោបាយ ការទូត ទំនាក់ទំនងប្រជាជននិងប្រជាជន និងវិស័យឯកជន។

ព្រឹត្តិការណ៍ពាណិជ្ជកម្មនេះ បានផ្តល់ឱកាសដល់វិនិយោគិន ធុរជន ពាណិជ្ជករ និងអាជីវករ ជួបប្រាស្រ័យទាក់ទងគ្នា ស្វែងរកដៃគូសហការ និងសហប្រតិបត្តិការ ជាពិសេសសំដៅពង្រឹងភាពជាម្ចាស់នៃវិស័យឯកជន។

ជាក់ស្តែង ក្នុងឆ្នាំ២០២៥នេះ កម្ពុជាទទួលបាននូវទីតាំងទំហំ ២០០០ម៉ែត្រក្រឡា សម្រាប់រៀបចំស្តង់ពាណិជ្ជកម្មដាក់តាំងបង្ហាញផលិតផល និងសេវាកម្ម របស់ក្រុមហ៊ុន/សហគ្រាស សរុបចំនួន ៥៦ ស្មើនឹង ៩៣ ស្តង់ ដែលក្នុងនោះ មានផលិតផលកសិកម្មចំនួន ២២ ស្តង់, សេវាកម្ម និងគម្រោងវិនិយោគចំនួន ២០ស្តង់, អាហារ និងភេសជ្ជៈចំនួន ៩ស្តង់, សិប្បកម្ម វត្ថុអនុស្សាវរីយ៍ ត្បូង និងគ្រឿងអលង្ការចំនួន ២២ស្តង់ និងប្រភេទចម្រុះផ្សេងៗចំនួន ២០ស្តង់ ដោយមានការចូលរួមជាច្រើនពីវិស័យឯកជន ដែលបានធ្វើឱ្យចំនួនស្ដង់ពិព័រណ៍ពាណិជ្ជកម្មកម្ពុជានៅក្នុងឆ្នាំ២០២៥ មានការកើនឡើងគួរឱ្យកត់សម្គាល់បើធៀបនឹងឆ្នាំមុនៗ។

លោក វង្សី វិស្សុត ឧបនាយករដ្ឋមន្ត្រីប្រចាំការ បានកោតសរសើរចំពោះក្រុមការងារក្រសួង ស្ថាប័ន និងភាគីពាក់ព័ន្ធទាំងអស់ ដែលបានចូលរួម និងខិតខំប្រឹងប្រែងរៀបចំតាំងបង្ហាញផលិតផលរបស់ខ្មែរនាពេលនេះដោយជោគជ័យ។

លោកឧបនាយករដ្ឋមន្ត្រីប្រចាំការ ក៏បានលើកទឹកចិត្តដល់ក្រសួងស្ថាប័ន វិនិយោគិន ធុរជន សមាគម ក្រុមហ៊ុន និងសហគ្រាសនានា ពិសេសសហគ្រាសធុនតូច និងមធ្យម សូមបន្តជំរុញការនាំចេញផលិតផលកសិកម្ម ឧស្សាហកម្ម កសិ-ឧស្សាហកម្ម និងកសិ-ពាណិជ្ជកម្មឱ្យបានកាន់តែច្រើន ដើម្បីម្ខាងជួយដល់ពលរដ្ឋដោយផ្ទាល់ និងម្ខាងទៀត រួមចំណែកគាំទ្រដល់គោលនយោបាយរបស់រាជរដ្ឋាភិបាលកម្ពុជា។

សម្រាប់ការចូលរួមនៅក្នុងពិព័រណ៍ចិន-អាស៊ាន លើកទី២២ ឆ្នាំ២០២៥ នេះដែរ ក្រសួងពាណិជ្ជកម្មក្នុងនាមគណៈកម្មការរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ បានរៀបចំសាងសង់ពន្លាជាតិ (Cambodia National Pavilion) ទំហំ ១៦០ម៉ែត្រការ៉េ ដោយជ្រើសរើសខេត្តព្រះសីហនុ ជាទីក្រុងស្រស់ប្រិមប្រិយ ដើម្បីបង្ហាញអំពី វប្បធម៌ អរិយធម៌ខ្មែរ សេដ្ឋកិច្ច ពាណិជ្ជកម្ម ទេសចរណ៍ និងវិនិយោគ។

ការរចនាពន្លាជាតិកម្ពុជាបានបំផុសគំនិត ដោយជ្រើសរើសក្រុងព្រះសីហនុជាទីក្រុងស្រស់ប្រិមប្រិយ និងបានយកសមុទ្រ និងទឹករលកជាគោល។

ក្នុងនោះប្លង់បាតនៃពន្លាជាតិកម្ពុជា ត្រូវបានរចនាឡើងរួមមាន៖ ១. ច្រកចូល (ក្លោងទ្វាកណ្តាលរចនាបែបសហសម័យច្នៃចេញពីទឹករលក និងនាគ អមដោយនិម្មិតសញ្ញា Cambodia Kingdom of Wonder នៅផ្នែកខាងលើ, ស្លាបឆ្វេងបានរៀបចំជាប្រអប់ពន្លឺ Lightbox ដាក់បញ្ជាំងរូបព្រះថោងតោងស្បៃនាងនាគ ដែលជានិមិត្តរូបនៃបុព្វការីរបស់ជនជាតិខ្មែរ ដោយបានផ្សារភ្ជាប់យ៉ាងជ្រៅជាមួយនឹងវប្បធម៌ ប្រពៃណី និងទំនៀមទម្លាប់នៃប្រជាជាតិខ្មែរ និងជាទីតាំងទាក់ទាញភ្ញៀវទេសចរមួយនៅក្នុងខេត្តព្រះសីហនុ), បន្តដោយទិដ្ឋភាពតំបន់អភិរក្សព្រៃកោងកាង និងបានតុបតែងដោយផ្កាថ្មចម្រុះ និងដើមកោងកាង, ស្លាបខាងស្តាំងផ្នែកខាងក្រៅបានដាក់តាំងបង្ហាញអំពីទិដ្ឋភាពឆ្នេរអូត្រិះដ៏ស្រស់ស្អាត ដែលមានឆ្នេខ្សាច់វែង និងសរក្បុស។

ទី២.ការដាក់តាំងបង្ហាញផលិតផល (រៀបចំកន្លែងដាក់តាំងផលិតផលពាក់ម៉ាកសម្គាល់ភូមិសាស្រ្ត ផលិតផលសក្កានុពលនាំចេញរបស់កម្ពុជាចំនួន១៧មុខ រួមមាន ១-សូត្រ, ២-ថាសប្រាក់, ៣-ប្រហុកម្សៅ, ៤-ស្វាយចន្ទីរ, ៥-ក្រូចថ្លុងកោះទ្រុង, ៦-ទឹកឃ្មុំមណ្ឌលគិរី, ៧-ស្ករត្នោតកំពង់ស្ពឺ, ៨-ម្រេចកំពត, ៩-ទឹកត្រីកំពត-កែប, ១០-អំបិលកំពត-កែប, ១១-អង្ករកម្ពុជា, ១២-ដំណាប់ស្វាយ, ១៣-ទុរេន, ១៤-ក្តាមថ្មកោះកុង, ១៥-សំបុកត្រចៀកកាំ, ១៦-បង្កងតាកែវ, និង ១៧-អង្ករម្លិះក្រហម) នៅក្នុងប្រអប់រង្វង់មានភ្លើងបំភ្លឺមានរាងជាបង្អួចកាប៉ាល់ (Sub-marine) អមដោយ QR Code សម្រាប់សេ្គនដើម្បីទទួលបានព័ត៌មានបន្ថែមនៅស្លាបខាងឆ្វេង និងខាងស្តាំផ្នែកខាងក្នុងពន្លាជាតិ, ទី៣.នៅចំកណ្តាលមានរៀបចំជាម៉ាកែតក្រុងព្រះសីហនុ និងកំពង់ផែស្វយ័តក្រុងព្រះសីហនុ ដើម្បីបង្ហាញអំពីសក្កានុពលសេដ្ឋកិច្ច ពាណិជ្ជកម្ម និងវិនិយោគក្នុងខេត្តព្រះសីហនុ (ចំពោះបាតក្រោមបានរៀបចំជាទិដ្ឋភាពបាតសមុទ្រ និងខ្សាច់) និង ទី៤ .ឆាកសម្តែង និង LED Screen៖ មានរៀបចំជាឆាកសម្រាប់រៀបចំកម្មវិធីសម្តែងសិល្បៈ និង LED Screen សម្រាប់បញ្ចាំងវីដេអូផ្សព្វផ្សាយអំពីសក្តានុពលពាណិជ្ជកម្ម ទេសចរណ៍ វិនិយោគ នៅក្នុងខេត្តព្រះសីហនុ និងព្រះរាជាណាចក្រកម្ពុជា។

បន្ថែមលើនេះ ក្រសួងពាណិជ្ជកម្ម ក៏បានរៀបចំឱ្យមានការសម្តែងសិល្បៈ ដោយសិល្បៈករ-សិល្បៈការិនី មកពីក្រសួងវប្បធម៌ និងវិចិត្រសិល្បៈ ជាប់ជាប្រចាំជូនភ្ញៀវទស្សនា ដោយប្រភេទសម្តែងមាន ១០ របាំ រួមមាន របាំជូនពរ, របាំនេសាទ, របាំគោះត្រឡោក, សុវណ្ណមច្ឆា, របាំផ្លិត, របាំក្ងោកប៉ៃលិន, របាំក្រាប, ឆៃយ៉ាំ, ភួងនារី, និងក្រម៉ា៕