កីឡា

កីឡាជឺជីតស៊ូកម្ពុជា ឈ្នះមេដាយមាស ២ ប្រាក់ ២ ពីការប្រកួត Grand Slam កម្រិតពិភពលោកនៅចិន

បានផុស

៩ ខែ មុន

នៅ

ថ្ងៃអង្គារ ៣០ កញ្ញា ២០២៥

ដោយ

ក្រុមកីឡាករជឺជីតស៊ូកម្ពុជា គិតត្រឹមថ្ងៃទី២៩ ខែកញ្ញា ឆ្នាំ ២០២៥ ទទួលបានមេដាយចំនួន ៤ គ្រឿងពីការប្រកួតកីឡាជឺជីតស៊ូអាជីពក្នុងព្រឹត្តិការណ៍កម្រិតពិភពលោក Abu Dhabi Grand Slam Jiu-Jitsu World Tour 2025–2026 នៅប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jasper Paas អនុប្រធានសហព័ន្ធកីឡាជឺជីតស៊ូកម្ពុជា បានផ្តល់រូបភាព និងព័ត៌មានខ្លះៗមកកាន់«កម្ពុជាថ្មី»ថា កីឡាករជម្រើសជាតិកម្ពុជា មឿនលីម សុបញ្ញា ធ្វើបានយ៉ាងល្អឥតខ្ចោះដោយគិតចាប់ពីការប្រកួតដំបូង រហូតដល់វគ្គផ្តាច់ព្រ័ត្រ រូបគេបានឃ្លេដៃគូឲ្យចុះចាញ់ទាំងអស់ដើម្បីទទួលបានមេដាយមាស។

ជាមួយគ្នានេះ កីឡាករបរទេសហ្វឹកហាត់កម្ពុជា Guchkov Volodymyr ប្រកួតតំណាងឲ្យក្លិបកម្ពុជា CamEd Jiu Jitsu Club ក៏ទទួលបានមេដាយមាស។ ចំណែកកីឡាករកម្ពុជា កាំង ម៉េងហុង ទទួលបានមេដាយប្រាក់។

អនុប្រធានសហព័ន្ធកីឡាជឺជីតស៊ូកម្ពុជារូបនេះបានសង្កត់ធ្ងន់ថា អ្វីដែលថ្នាក់ដឹកនាំ និងលោកផ្ទាល់មានមោទនភាពបំផុតគឺការបណ្តុះបណ្តាលថ្នាលយុវជនទទួលបានលទ្ធផលគួរជាទីគាប់ប្រសើរ។ កីឡាករអាយុ១៥ឆ្នាំ មឿនលីម សុវិរៈ ដែលជាថ្នាលយុវជនរបស់សហព័ន្ធ បានឈានដល់វគ្គផ្តាច់ព្រ័ត្រ។

កីឡាករថ្នាលវ័យ ១៥ឆ្នាំ មឿនលីម សុវិរៈ បានបោះជំហ៊ានទៅវគ្គផ្តាច់ព្រ័ត្រ និងទទួលបានមេដាយប្រាក់ បន្ទាប់ពីចាញ់យុវជនប្រេស៊ីលក្នុងវគ្គផ្តាច់ព្រ័ត្រ។ ទោះជាមិនបានមេដាយមាស ប៉ុន្តែនេះជាផ្លែផ្កាដ៏សំខាន់នៃការបណ្តុះបណ្តាលថ្នាលយុវជន ហើយឈានដល់ការប្រកួតកម្រិតពិភពលោក ដូច្នេះរូបគេជាទំពាំងដ៏ល្អសម្រាប់អនាគតជម្រើសជាតិ។

សូមបញ្ជាក់ថា ព្រឹត្តិការណ៍ The Abu Dhabi Grand Slam Jiu-Jitsu World Tour ដែលត្រូវបានស្គាល់ Abu Dhabi Grand Slam ជាកម្មវិធីប្រកួតកម្រិតអន្តរជាតិរបស់សហព័ន្ធកីឡាជឺជីតស៊ូអន្តរជាតិ ត្រូវបានរៀបចំជារៀងរាល់ឆ្នាំ ដោយសហព័ន្ធកីឡាជឺជីតស៊ូអារ៉ាប់រួម (UAEJJF) នៅតាមបណ្តាទីក្រុងធំៗទូទាំងពិភពលោក។ កម្មវិធីនេះត្រូវបានរៀបចំលើកដំបូងកាលពីឆ្នាំ ២០១៥ ដោយមានវិញ្ញាសាប្រកួតជាច្រើនប្រភេទ ទាំងបុរស និងនារី។ ប្រទេសដែលធ្លាប់បានរៀបចំកន្លងមកដូចជា ជប៉ុន អាមេរិក ប្រេស៊ីល អង់គ្លេស អារ៉ាប់រួម ចិន រុស្ស៊ី និង អូស្ត្រាលី ជាដើម។

សហព័ន្ធកីឡាជឺជីតស៊ូកម្ពុជា ទើបត្រូវបានបង្កើតឡើងប៉ុន្មានឆ្នាំចុងក្រោយ ប៉ុន្តែទទួលបានលទ្ធផលគួរជាទីគាប់ចិត្តសម្រាប់ការប្រកួតអន្តរជាតិប្រមាណ៣ឆ្នាំចុងក្រោយនេះ៕