អុិន លក្ខិណា សារភាពថា ខ្លួនស្ទើរតែបញ្ចប់អាជីពបវរកញ្ញាម្តងៗ ព្រោះតែតូចចិត្តនឹងពាក្យរិះគន់ជាន់ពន្លិច

បើទោះបីជាជាប់ Top 10 ក្នុងកម្មវិធី Miss Cosmo Cambodia 2024 និងធ្លាប់តំណាងកម្ពុជាប្រកួតលើឆាកអន្តរជាតិក៏ដោយ អុិន លក្ខិណា នៅតែរងការរិះគន់ ខណៈទើបតែមានមតិផ្ទុយមួយចំនួន បានទិតៀនលើរូបសម្រស់របស់នាង រហូតធ្វើឱ្យបវរកញ្ញារូបនេះ ចេញមកបង្ហាញពីការតូចចិត្តកន្លងមករហូតដល់ពេលនេះ។

ទោះមានអ្នកមួយចំនួនតូច នៅតែបន្តរិះគន់លើ អុិន លក្ខិណា ក៏ពិតមែន ប៉ុន្តែបវរកញ្ញារូបនេះ ត្រូវបានគេចាត់ទុកថា ជាបវរកញ្ញាមានសក្ដានុពលក្នុងចិត្តមហាជនជាច្រើនឆ្នាំមកហើយ។ ក្នុងនោះ កញ្ញាតែងលេចវត្តមានចូលរួមកម្មវិធីបវរកញ្ញា ឬកម្មវិធីផ្សេងៗទាំងក្នុងនិងក្រៅប្រទេសជាបន្តបន្ទាប់ផងដែរ។

តួយ៉ាង ថ្មីៗនេះបវរកញ្ញាកម្ពុជា អុិន លក្ខិណា ក៏បានបង្ហាញសកម្មភាពវីដេអូក្នុងកម្មវិធី Fashion Show មួយនៅឯប្រទេសវៀតណាម ខណ:កញ្ញាត្រូវបានគេអញ្ជើញឲ្យចូលរួមដើរម៉ូដជាថ្មី។ ប៉ុន្តែអ្វីដែលនឹកស្មានមិនដល់គឺស្រាប់តែមានម្ចាស់គណនីហ្វេសប៊ុកមួយក្នុងចំណោមនោះ ប្រើពាក្យរិះគន់ចំអន់រូបសម្រស់របស់នាង ផ្ទុយពីមតិគាំទ្រដទៃទៀត។

អុិន លក្ខិណា បន្ថែមថា អ្វីដែលអាចឱ្យខ្លួននៅបន្តបាន ក៏ព្រោះមានអ្នកគាំទ្រជាច្រើនស្រឡាញ់គាំទ្រនាងខ្លាំង ជាពិសេសគឺនាងហ៊ាននិយាយថា ខាងវៀតណាមឱ្យតែមានកម្មវិធីបង្ហាញម៉ូដ គឺមិនដែលភ្លេចនាងឡើយ។ គួរបញ្ជាក់ដែរថាកញ្ញា អុិន លក្ខិណា គឺជាអតីត​កញ្ញាឯក​ លំដាប់​រង​ទី​១កញ្ញាឯក​ដ៏​អស្ចារ្យ​នៃ​កម្ពុជាឆ្នាំ​២០២១ និង​ជា​ម្ចាស់​មកុដ Miss Supranational Cambodia 2022 ដែលទទួលបានការគាំទ្រច្រើនពីមហាជននាពេលកន្លងម៕ ចាន់រ៉ា