អាជ្ញាធរសង្កាត់ចោមចៅទី៣​ កំពុងប្រែក្លាយផ្លូវមួយខ្សែទៅជាផ្លូវបេតុង និងគ្រោងស្ថាបនាមួយខ្សែទៀតពេលចប់រួចរាល់

ផ្លូវលំមួយខ្សែស្ថិតនៅភូមិ​ជម្ពូវ័ន២​ សង្កាត់ចោមចៅទី៣​ ខណ្ឌពោធិ៍សែនជ័យ ដែលធ្លាប់តែទ្រុឌទ្រោមរងនូវការខូចខាតពិបាកក្នុងការធ្វេីដំណេីរ​ និងប្រកបរបរផ្សេងៗរបស់ពលរដ្ឋ ពេលនេះត្រូវបានកែប្រែក្លាយជាផ្លូវបេតុងឆ្អឹងដែកហេីយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក​ វ៉ា​ សាវឿន​ ចៅសង្កាត់ចោមចៅទី៣​ បានឲ្យដឹងថា​ ដោយមានការយកចិត្តទុកដាក់ និងចង្អុលបង្ហាញពីលោក​ សក់​ ច័ន្ធកញ្ញារិទ្ធ​ អភិបាលនៃគណៈអភិបាលខណ្ឌពោធិ៍សែនជ័យ​ លោកដឹកនាំមន្ត្រីជំនាញចុះពិនិត្យជាក់ស្តែង​ និងណែនាំជូនដំណឹងដល់ពលរដ្ឋដែលសង់សំណង់ប៉ះពាល់ឲ្យរុះរេីចេញដេីម្បីងាយស្រួលក្នុងការដាក់គ្រឿងចក្រឈូសឆាយផ្លូវខាងលេីនេះ។

លោក​ចៅសង្កាត់បានបន្តថា​ ការប្រែក្លាយជាផ្លូវបេតុងនេះមានទទឹង ៥ម៉ែត្រ និងបណ្តោយ ៤៧០ម៉ែត្រ កម្រាស់ ១តឹក កន្លះ ដែលជាគម្រោងអភិវឌ្ឍន៍មូលនីធិរបស់សាលាសង្កាត់ចោមចៅទី៣ ឆ្នាំ២០២៥​ ហេីយរហូតពេលនេះ ការស្ថាបនាបាន៣០ភាគរយហេីយ។ លោកចៅសង្កាត់បន្ថែមថា ក្រោយស្ថាបនាផ្លូវនេះរួច​ អាជ្ញាធរនឹងបន្តស្ថាបនាផ្លូវបេតុងឆ្អឹកដែកដូចគ្នានៅភូមិអូដឹម​មួយខ្សែទៀត ដូច្នេះសរុបទាំង២ភូមិមានប្រវែង៦៧៧ម៉ែត្រ​ ក្នុងមូលដ្ឋានសង្កាត់ចោមចៅទី៣៕

អត្ថបទ៖​ សុខា