ភាគខាងត្បូងថៃក៏រឹតតែវឹកវរដែរ ខណៈក្រុមផ្តាច់ខ្លួនបើកការវាយប្រហារសឹងរាល់ថ្ងៃ

ភាគខាងត្បូងប្រទេសថៃ រឹតតែវឹកវរខ្លាំងទៅៗ ខណៈក្រុមផ្តាច់ខ្លួនក៏បើកការវាយប្រហារសឹងរាល់ថ្ងៃដែរ ដោយការវាយប្រហារចុងក្រោយបំផុតបានកើតឡើងកាលពីវេលាម៉ោង១២:៥៣នាទីអធ្រាត្រឈានចូលថ្ងៃអង្គារទី៧ខែតុលាឆ្នាំ២០២៥ ដែលពួកគេបានបំផ្ទុះគ្រាប់បែកនៅក្នុងខេត្ត Pattani។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពីប៉ូលិស សារព័ត៌មាន Bangkok Post បានផ្សាយថា ជនបះបោរមួយក្រុមមានគ្នា៥ទៅ៦នាក់ បានចាប់ចងនិងប្លន់យកកាំភ្លើងពីឆ្មាំសន្តិសុខនៅឯសាកលវិទ្យាល័យ Fatoni ក្នុងស្រុក Yarang រួចក៏បំផ្ទុះទូ ATM របស់ធនាគារ Islamic Bank នៅក្បែរនោះ ប៉ុន្តែមិនអាចលួចយកលុយបានទេ។

សមត្ថកិច្ចកំពុងធ្វើការស៊ើបអង្កេតលើករណីនេះនិងកំពុងតាមចាប់ខ្លួនជនល្មើស ហើយមន្ត្រីមូលដ្ឋាន បានបញ្ជាក់យ៉ាងច្បាស់ថា ក្រុមបះបោរកំពុងព្យាយាមធ្វើសកម្មភាពដើម្បីរកប្រាក់យកទៅផ្គត់ផ្គង់បណ្តាញផ្តាច់ខ្លួនរបស់ពួកគេ។

ហេតុការណ៍នេះកើតឡើងបន្ទាប់ពី ក្រុមចោរ បានប្លន់ហាងមាសដោយប្លន់គ្រឿងអលង្ការសរុបជាតម្លៃ ៣៦លានបាត ស្មើនឹង ១ ១១០ ៦៨២ ដុល្លារអាមេរិក កាលពីល្ងាចថ្ងៃអាទិត្យទី៥ខែតុលានៅខេត្ត Narathiwat។

តាមរបាយការណ៍សមត្ថកិច្ច, ពួកគេមានគ្នា១០នាក់ ចូលប្លន់ហាងមាស Yaowarat Krungthep ក្នុងផ្សារទំនើប Big C នៅស្រុក Su-ngai Kolok។ ក្រោយប្លន់បានសម្រេច ពួកគេក៏ធ្វើដំណើរតាមផ្លូវក្នុងឃុំ Sakor នៃស្រុក Waeng ដើម្បីឆ្លងដែនចូលទៅក្នុងប្រទេសម៉ាឡេស៊ី។

ដោយសារស្ថានការណ៍ភាគខាងត្បូងប្រទេសថៃ កំពុងវិវត្តកាន់តែធ្ងន់ធ្ងរ មេភូមិភាគ១ ក៏បានបញ្ជូនទាហាន៨០០នាក់ ទៅជួយពង្រឹងសន្តិសុខនៅទីនោះដែរ ក្រោមផែនការឆ្នាំ២០២៦។

ទាហានទាំង៨០០នាក់ ត្រូវបានមេភូមិភាគ១ Worayos Luangsuwan យកចេញពីកងពលធំថ្មើរជើងលេខ៩ លេខ១១ និងលេខ១១ ដើម្បីបញ្ជូនទៅកាន់ខេត្តភាគខាងត្បូង ក្រោមការដឹកនាំរបស់កងទ័ពពិសេស Narathiwat។ ដូច្នេះបានន័យថា ទ័ពទាំង៨០០នាក់ នឹងត្រូវចូលរួមជាមួយទាហានភូមិភាគ៤ តទល់ជាមួយក្រុមប៉ះបោរផ្តាច់ខ្លួន ដែលកំពុងធ្វើសកម្មភាពរឹតតែខ្លាំងៗឡើង៕

អត្ថបទ៖ សុខ សុវណ្ណ

ចុចអាន៖ ភូមិភាគ១ថៃ បញ្ជូនទ័ព ៨០០នាក់ ទៅភាគខាងត្បូង ដើម្បីតទល់ជាមួយក្រុមបះបោរ