បានទាំងបង្ហាញភាពកតញ្ញូ​ចំពោះគ្រូ បានទាំងរង្វាន់ ក្នុងឱកាសទិវាគ្រូបង្រៀន ៥ តុលា

ដើម្បីអបអរសាទរទិវាគ្រូបង្រៀន ០៥ តុលា ២០២២ ខាងមុខនេះ ក្រសួងអប់រំ យុវជន និងកីឡា ផ្ដល់ឱកាសដល់សាធារណជន ក្នុងការរំលឹកអនុស្សាវរីយ៍ និងភាពកត្តញ្ញូចំពោះអ្នកគ្រូលោកគ្រូដែលខ្លួនបានក្រេបចំណេះវិជ្ជា តាំងពីខ្លួនមិនចេះអ្វីសោះ រហូតមានចំណេះ មានការងារ មុខរបរ មានគ្រួសារដូចសព្វថ្ងៃ។

ក្រសួងអប់រំ យុវជន និងកីឡា នៅព្រឹកនេះ បានជូនដំណឹងតាម គេហទំព័រថា មហាជនទូទៅអាចចូលរួមផ្ញើសារ ជាអត្ថបទ វីដេអូ រូបភាព អត្ថបទចម្រៀង កំណាព្យ ឬរឿងនិទាន ជូនលោកគ្រូ-អ្នកគ្រូ សាស្ត្រាចារ្យរបស់ខ្លួន ដោយបញ្ជាក់ឈ្មោះ គ្រឹះស្ថានសិក្សា រាជធានី-ខេត្ត ដែលពួកគាត់ធ្លាប់បាន ឬកំពុងបម្រើការងារ ដើម្បីអបអរសាទរទិវាគ្រូបង្រៀន ០៥ តុលា ២០២២ ក្រោមប្រធានបទ “គ្រូបង្រៀនយើង អនាគតយើង ប្រទេសជាតិយើង” ដោយផ្ញើសារតាមរយៈ៖ https://bit.ly/WTD2022MoEYS ។

ក្រសួងអប់រំ យុវជន និងកីឡានបានឱ្យដឹងបន្ថែមថា មាតិកាដែលមានប្រជាប្រិយភាពនៅក្នុងព្រឹត្តិការណ៍នេះ នឹងទទួលបានរង្វាន់ ព្រមទាំងត្រូវបានចែករំលែកបន្តលើទំព័របណ្ដាញសង្គមហ្វេសប៊ុកផ្លូវការក្រសួងអប់រំ យុវជន និងកីឡា ថែមទៀតផង។

ក្រសួង បានបញ្ជាក់ថា ចំនួនប្រជាប្រិយភាព គិតតែលើមាតិកាដែលត្រូវបានបង្ហោះនៅក្នុងព្រឹត្តិការណ៍ទិវាគ្រូបង្រៀនតាមរយៈតំណភ្ជាប់ខាងលើតែប៉ុណ្ណោះ។

គួរបញ្ជាក់ថា ទិវាគ្រូបង្រៀន ៥ តុលា ត្រូវបានកើតឡើងក្រោមគំនិតផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាំងពីឆ្នាំ១៩៩៧ ក្នុងគោលបំណងបំផុសឡើងវិញ នូវវប្បធម៌ និងប្រពៃណីនៃការរំលឹកគុណូបការៈដ៏ថ្លៃថ្លារបស់សិស្ស ចំពោះគ្រូបង្រៀននៅទូទាំងប្រទេស។ ជាងនេះទៅទៀតទិវាគ្រូបង្រៀនធ្វើឡើង ដើម្បីរំលឹកពីគុណបំណាច់របស់គ្រូបង្រៀន ដែលបានខិតខំ អំណត់ព្យាយាមក្នុងការបំពេញភារកិច្ចជាអ្នកបណ្តុះបណ្តាលដើម្បីផ្ទេរនូវចំណេះដឹងដ៏មានតម្លៃនៃវិទ្យាសាស្រ្តបច្ចេកវិទ្យា ព្រមទាំងទូន្មានគ្រប់កម្រិតឱ្យសិស្សានុសិស្សធ្វើតែអំពើល្អ ស្គាល់ខុសត្រូវគោរពចាស់ទុំ។ តាមគំនិតថ្មីនៃការអប់រំ គឺរៀនដើម្បីមានចំណេះដឹង រៀនដើម្បីមានចំណេះធ្វើ រៀនដើម្បីមានសីលធម៌ល្អ និងរៀនដើម្បីរួមរស់នៅជាមួយគ្នាប្រកបដោយភាពសុខដុម៕

អត្ថបទ៖ ច័ន្ទ វីរៈ