វប្បធម៌ ជំនឿ

អាជ្ញាធរជាតិអប្សរារៀបចំពិធីបួងសួងរំលឹកគុណអង្គរ និងសុំពរជ័យពីបុព្វបុរស

បានផុស

៧ ខែ មុន

នៅ

ថ្ងៃអាទិត្យ ១៤ ធ្នូ ២០២៥

ដោយ

អាជ្ញាធរជាតិអប្សរាបានរៀបចំពិធីបួងសួងចម្រើនសេចក្តីសុខនៅប្រាសាទអង្គរវត្ត ក្នុងឱកាសបុណ្យរំលឹកគុណអង្គរ លើកទី៥ អរគុណដល់បុព្វបុរស និងសុំក្ដីសុខចម្រើន សន្ដិភាពដល់មាតុភូមិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះធ្វើឡើងនៅនៅស្ពានហាលប្រាសាទអង្គរវត្តព្រឹកថ្ងៃទី១៤ ខែធ្នូ ឆ្នាំ២០២៥នេះ ដើម្បីរំលឹកដល់គុណបុព្វបុរសខ្មែរដែលជាអ្នកកសាងអង្គរ ព្រមទាំងសុំឱ្យមានសេចក្តីសុខសន្តិភាពដល់មាតុភូមិកម្ពុជាទាំងមូល និងឧទ្ទិសកុសលផលបុណ្យជូនចំពោះវិញ្ញាណក្ខ័ន្ធបុព្វបុរសខ្មែរ វិរៈ កងទ័ពខ្មែរគ្រប់ៗជំនាន់ ដែលបានពលីក្នុងបុព្វេហេតុការពារទឹកដី និងជាតិមាតុភូមិ។

ក្រៅ តែពិធីបួងសួងដែលមាន ព្រះសង្ឃនៃព្រះពុទ្ធសាសនាជាច្រើនអង្គនិមន្តស្វាធ្យាយជយន្តោ និងបង្សុកូលឧទ្ទិសចំពោះវិញ្ញាណក្ខ័ន្ធបុព្វបុរស វិរៈជនការពារជាតិរួចមក រដ្ឋមន្ត្រីវប្បធម៌លោកស្រី ភឿង សកុណា និងថ្នាក់ដឹកនាំ ក៏បានអញ្ជើញទៅអុជធូបបួងសួងនៅតាមទីសក្តិសិទ្ធិ ជាច្រើនកន្លែងក្នុងបរិវេណប្រាសាទអង្គរវត្តផងដែរ។

គួរឱ្យដឹងផងដែរថា បុណ្យរំលឹកគុណ«អង្គរ»លើកទី៥ នឹងត្រូវរៀបចំរយៈពេល៣ថ្ងៃនៅរមណីដ្ឋានអង្គរ ចាប់ពីថ្ងៃទី១៤ ដល់ថ្ងៃទី១៦ ខែធ្នូនេះ ដោយមានពិធីបុណ្យសាសនា កម្មវិធីប្រពៃណី និងកម្មវិធីសមាធិផ្សេងៗអមមកជាមួយ។

ហើយពិធីនេះមិនត្រឹមតែឆ្លុះបញ្ចាំងអំពីសីលធម៌របស់ប្រជាជនខ្មែរ ដែលមានការគោរពដឹងគុណចំពោះម្ចាស់ទឹកម្ចាស់ដី ទេវតារក្សាលោក និងបុព្វបុរសខ្មែរគ្រប់ជំនាន់ប៉ុណ្ណោះទេ ហើយវាក៏បានឆ្លុះ បញ្ចាំងពីទំនៀមទម្លាប់ និងប្រពៃណីដែលជាផ្នែកមួយនៃអត្តសញ្ញាណជាតិ និងវប្បធម៌ខ្មែរ ដែលប្រជាជនតែងតែប្រារព្ធធ្វើតាមស្រុកតាមភូមិនីមួយៗ។

ការប្រារព្ធពិធីនេះនៅទីនេះ ក៏ជាការរួមចំណែកផ្សព្វផ្សាយពីវប្បធម៌ខ្មែរ និងសំណង់ស្ថាបត្យកម្មខ្មែរបុរាណទៅកាន់ពិភពលោក ក៏ដូចជា ការទាក់ទាញទេសចរជាតិ និងអន្តរជាតិមកទស្សនានៅប្រទេសកម្ពុជាផងដែរ៕