តាមជំនឿប្រជ្រុយជាផ្នែកមួយនៃសំណាង ឬអាចជាគ្រោះទៅលើម្ចាស់ប្រជ្រុយ តាមទីតាំងដែលវាកើតមាន។ ជាការពិតប្រជ្រុយខ្លះ ពិតជាពុំគួរទុកនោះទេ ព្រោះមិនត្រឹមតែអាក្រក់មើល ថែមទាំងនាំស៊យទៀតផង។ ផ្ទុយទៅវិញ ប្រជ្រុយត្រង់កន្លែងមួយចំនួន ថ្វីត្បិតមិនសូវស្អាត ប៉ុន្តែវាជាប្រជ្រុយនាំសំណាងដល់ម្ចាស់របស់វា។ ជាក់ស្ដែង ​ប្រជ្រុយលើផ្ទៃមុខ ត្រង់ ៤កន្លែងខាងក្រោម ចាស់ៗថា​នាំសំណាង​ ជោគជ័យ កិត្យានុភាព ក៏ដូចជាភាពសម្បូរបែបផងដែរ។

១. ប្រជ្រុយកណ្តាលប្រជុំចិញ្ចើមទាំងសងខាង

ប្រសិនមានប្រជ្រុយមួយនេះ មិនគួរកាត់ចេញទេ ព្រោះជាប្រជ្រុយរបស់មនុស្សល្បី មានអំណាច កិត្យានុភាព និងមនុស្សមានគុណូបការៈ ប្រៀបដូចជាមានភ្នែកទី៣ ដែលអាចមើលវាសនាអនាគតអ៊ីចឹង។ ដូច្នេះ​អ្នក​ណា​មាន​វា គេចាត់​ទុក​ថា​ល្អ​ណាស់។

២. ប្រជ្រុយត្រង់គល់សក់ (កន្លែងណាក៏ដោយ)

មនុស្សណាមានប្រជ្រុយត្រង់ណេះ បុរាណថាជាមនុស្សវៃឆ្លាត ឆាកជីវិតនឹងភព្វប្រសព្វតែភាពជោគជ័យផ្ទួនៗ។ បើទោះបីជួបវិបត្តិ ព្យុះភ្លៀងយ៉ាងណា ក៏គង់ឆ្លងផុតដោយងាយ ហើយដោយសារភាពតស៊ូ ជីវិតរបស់គេនឹងក្លាយជាម្ចាស់មាសម្ចាស់ពេជ្រ រស់នៅដោយសុខសប្បាយ។

៣. ប្រជ្រុយលើមាត់ (មិនថាខាងឆ្វេង ឬខាងស្តាំ ជុំវិញមាត់)

ចាស់ៗចំណាំពោលថា មនុស្សជំពូកនេះ ពូកែនិយាយច្រើន ហើយគេនឹងជោគជ័យយ៉ាងត្រចះត្រចង់ដោយសារវោហារសព្ទរបស់គេនោះឯង។

៤. ប្រជ្រុយនៅលើបបូរមាត់

​មនុសុ្សប្រភេទនេះវិញ ក៏ពូកែនិយាយមិនធម្មតាដែរ។ ដោយសារមាត់របស់គេប៉ិន​​ចរចា ​គេក្លាយជាទីចាប់អារម្មណ៍នៃមនុស្សជាច្រើន ហើយជាការពិតភាព​ជោគជ័យនៅមិនឆ្ងាយពីគេនោះទេ។ មនុស្សនេះ នឹងក្លាយជាបុគ្គលដ៏លេចធ្លោក្នុងសង្គម ទោះបីមិនល្បីល្បាញអស្ចារ្យ ក៏ឆាកជីវិតកម្រជួបពាក្យថាបរាជ័យណាស់៕

អត្ថបទ៖ សន្យា

ចុចអាន៖ នារីមានប្រជ្រុយលើដើមទ្រូងទាំង ៤កន្លែងនេះ ជាមនុស្សសំណាងធំ

ចុចអាន៖ ប្រជ្រុយអាក្រក់ ២កន្លែង ចាស់ៗមិនចង់ឱ្យទុក ព្រោះអាចនាំចង្រៃ